Tag Archive: Laliga

  1. അത്ലറ്റിക്കോക്കൊപ്പം ലാലിഗ കിരീടവിജയം, കളിക്കളത്തിൽ വിതുമ്പി ലൂയിസ് സുവാരസ്

    Leave a Comment

    റയൽ വയ്യഡോലിഡുമായുള്ള ലാലിഗയിലെ അവസാനമത്സരത്തിൽ ഒന്നിനെതിരെ രണ്ടു ഗോളുകളുടെ വിജയം സ്വന്തമാക്കിയതോടെ ഈ സീസണിലെ ലാലിഗ കീരീടം സ്വന്തമാക്കിയിരിക്കുകയാണ് അത്ലെറ്റിക്കോ മാഡ്രിഡ്. വിജയത്തിൽ സുപ്രധാന പങ്കുവഹിച്ച സുവാരസിനെ കുറിച്ചാണ് ആണ് സോഷ്യൽ മീഡിയയിൽ പ്രധാന ചർച്ച നടക്കുന്നത്.

    വിജയഗോളടക്കം അത്ലറ്റിക്കോയുടെ ഈ സീസണിലെ പ്രകടനത്തിൽ ഒരു മികച്ച പങ്ക് ബാഴ്സ കൈവിട്ട സുവാരസിനു തന്നെയാണ്. അതിന്റെ വിഷമം സുവാരസ് തന്നെ പങ്കു വെച്ചിരുന്നു. അത്രത്തോളം സ്നേഹിക്കുന്ന ബാഴ്‌സ തന്നോട് ചെയ്തത് വലിയ വിഷമമുണ്ടാക്കുന്നതാണെന്നും സുവാരസ് മനസു തുറന്നിരുന്നു.

    അതിനുള്ള മധുരപ്രതികാരമെന്നോണമാണ് ലാലിഗ കിരീടം ഫുട്ബോൾ ലോകത്തിനു സുവാരസ് സമർപ്പിക്കുന്നത്. മത്സരശേഷം മൊബൈലിൽ കുടുംബവുമായി വീഡിയോ കാൾ വിളിച്ച് വിതുമ്പുന്ന സുവാരസിനെയാണ് പിന്നീട് നമുക്ക് കാണാനാവുന്നത്.

    അതിന്റെ വീഡിയോ സോഷ്യൽ മീഡിയയിൽ ഇതിനകം തന്നെ വൈറലായിക്കഴിഞ്ഞു. സുവാരസിന്റെ മധുരപ്രതികാരം തന്നെയാണ് ഫുട്ബോൾ ലോകത്തെ നിലവിലെ ചർച്ച. തനിക്ക് വയസായെന്നും വീര്യം ചോർന്നു പോയെന്നും പറഞ്ഞു ഒഴിവാക്കിയ ബാഴ്‌സ ബോർഡിനെതിരെയുള്ള പ്രതിഷേധമായാണ് ഈ നേട്ടം സുവാരസ് കണക്കാക്കുന്നത്.

  2. ഫോട്ടോ ഫിനിഷിൽ ലാലിഗ കൈപ്പിടിയിലൊതുക്കി സിമിയോണിയുടെ അത്ലറ്റിക്കോ, സംപൂജ്യരായി സീസൺ അവസാനിപ്പിച്ച് റയൽ മാഡ്രിഡ്‌

    Leave a Comment

    2014നു ശേഷം അത്ലറ്റിക്കോ മാഡ്രിഡ്‌ വീണ്ടും ലാലിഗയുടെ നെറുകിലെത്തിയിരിക്കുകയാണ്. എൽ ചോളോ എന്നു വിളിപ്പേരുള്ള അത്ലറ്റിക്കോയുടെ ആശാൻ ഡിയെഗോ സിമിയോണി കിരീടം അത്ലറ്റിക്കോ മാഡ്രിഡിന്റെ ഷെൽഫിലെത്തിച്ചിരിക്കുകയാണ്.റയൽ വയ്യഡോലിഡിനെതിരെ നടന്ന മത്സരത്തിൽ ഒരു ഗോളിനു പിറകിൽ നിന്ന ശേഷമാണ് ഏയ്ഞ്ചൽ കൊറെയയുടെയും ലൂയിസ് സുവാരസിന്റെയും നിർണായക ഗോളിൽ ലാലിഗ കിരീടം കൈപ്പിടിയിലൊതുക്കിയത്.

    വിയ്യാറയലിനെതിരെ റയൽ മാഡ്രിഡും പിന്നിൽ നിന്ന ശേഷം ബെൻസിമയിലൂടെയും മോഡ്രിച്ചിലൂടെയും വിജയം സ്വന്തമാക്കിയെങ്കിലും അത്ലറ്റിക്കോയുടെ വിജയം അതെല്ലാം നിഷ്ഫലമാക്കുകയായിരുന്നു. ഇതോടെ ഒരു ട്രോഫിയുമില്ലാതെ റയലിനു ഈ സീസൺ അവസാനിപ്പിക്കേണ്ടി വന്നിരിക്കുകയാണ്.

    2010നു ശേഷം ആദ്യമായാണ് റയലിനു ഇത്തരത്തിൽ ട്രോഫിരഹിതമായ ഒരു സീസൺ അഭിമുഖീകരിക്കേണ്ടി വരുന്നത്. പരിക്കുകളും കോവിഡും പിന്നോട്ട് വലിച്ചെങ്കിലും ഒരു മികച്ച പോരാട്ടം തന്നെ ഈ സീസണിൽ റയൽ മാഡ്രിഡ്‌ കാഴ്ചവെച്ചിരുന്നു എന്നതാണ് ഈ വിഷമഘട്ടത്തിലും ആശ്വാസമായി കരുതാവുന്ന ഒന്ന്.

    കോപ്പ ഡെൽ റെയ് കിരീടം നേടിയെങ്കിലും ലൂയിസ് സുവാരസിനെ ചിരവൈരികളായ അത്ലറ്റിക്കോ മാഡ്രിഡിലേക്ക് വിറ്റൊഴിവാക്കിയത് ലാലിഗ നേടുന്നതിന് ബാഴ്‌സക്ക് തിരിച്ചടിയായി. അത്ലറ്റിക്കോയിൽ മികച്ച പ്രകടനം കാഴ്ചവെച്ച സുവാരസ് ഗോൾവേട്ട തുടർന്നത് കിരീടനേട്ടത്തിൽ നിർണായകമായി. 21 ഗോളുകളുമായി അത്ലറ്റിക്കോയുടെ ടോപ് സ്കോററാണ് സുവാരസ്. സുവാരസിന്റെ കരിയറിലെ അഞ്ചാമത്തെ ലാലിഗ കിരീടമാണിത്.

  3. ലാലിഗ കിരീടം ആർക്ക്?, അവസാന അങ്കത്തിനായി മാഡ്രിഡ്‌ ചിരവൈരികൾ പോർക്കളത്തിലേക്ക്

    Leave a Comment

    ലാലിഗയിൽ ഇന്ന് ആരു കിരീടം നേടുമെന്ന് അറിയാം. ലീഗിലെ അവസാന റൗണ്ട് മത്സരത്തിനായി തയ്യാറെടുക്കുമ്പോൾ വമ്പന്മാർ തമ്മിലുള്ള വാശിയേറിയ പോരാട്ടത്തിനാണ് സാക്ഷിയാകുന്നത്. പോയിന്റ് ടേബിളിൽ രണ്ടാം സ്ഥാനത്തുള്ള റയൽ മാഡ്രിഡ് വിയ്യാറയലിനെ നേരിടുമ്പോൾ ഒന്നാം സ്ഥാനത്തുള്ള അത്‌ലറ്റിക്കോ മാഡ്രിഡിന് റയൽ വയ്യഡോളിഡാണ് എതിരാളികൾ.

    37 റൗണ്ട് മത്സരങ്ങൾ അവസാനിക്കുമ്പോൾ 83 പോയ്ൻ്റുമായി അത്‌ലറ്റിക്കോ മാഡ്രിഡ് ഒന്നാമതും, 81 പോയ്ൻ്റുള്ള റയൽ മാഡ്രിഡ് രണ്ടും സ്ഥാനത്താണ്. സെൽറ്റ വിഗൊക്കെതിരെ കഴിഞ്ഞ മത്സരത്തിൽ തോൽവി രുചിച്ചതോടെ 76 പോയിന്റുമായി ബാഴ്സലോണ ഇതിനകം കിരീട പോരാട്ടത്തിൽ നിന്ന് പുറത്തായെന്നു ഉറപ്പിച്ചിരിക്കുകയാണ്.

    റയൽ മാഡ്രിഡിനെ വിടാതെ പിന്തുടരുന്ന പരിക്കുകൾ അവസാന മത്സരദിവസവും റയൽ മാഡ്രിഡിനു തിരിച്ചടിയായിട്ടുണ്ട്. ഈഡൻ ഹസാർഡ് പരിക്കേറ്റു പുറത്തായതും ടോണി ക്രൂസ് കോവിഡ് പശ്ചാത്തലത്തിൽ ക്വാറന്റൈനിൽ പോയതും സിദാനു തലവേദന സൃഷ്ടിക്കുന്നു. പ്രതിരോധത്തിൽ സെർജിയോ റാമോസും റാഫേൽ വരാനെയും ടീമിൽ മടങ്ങിയത്തിയത് വലിയ ആത്മവിശ്വാസമാണ് റയലിന് സമ്മാനിക്കുന്നത്.

    സമനിലയിൽ പോലും കിരീടം കൈവിട്ടുപോവുമെന്നതിനാൽ വിജയം മാത്രമാണ് റയലും അത്‌ലറ്റിക്കോയും ലക്ഷ്യമിടുന്നത്. വിജയിച്ചാൽ അത്‌ലറ്റിക്കോക്ക് കിരീടം ഉറപ്പിക്കാനാകും. എന്നാൽ റയലിന് വിജയത്തിനൊപ്പം അത്‌ലറ്റിക്കോ വിജയിക്കാതിരിക്കുകയും അനിവാര്യമാണ്. നിർണായകമായ ഈ രണ്ടു മത്സരങ്ങളുടെ ഫലമായിരിക്കും ഇത്തവണത്തെ കിരീടം ആർക്കെന്നു നിർണയിക്കുന്നത്.

  4. സീസൺ അവസാനിപ്പിച്ചു മെസി വിശ്രമത്തിലേക്ക്, ഐബാറിനെതിരെ കളിച്ചേക്കില്ല

    Leave a Comment

    ലാലിഗയിലെ അവസാന മത്സരമായ ഐബാറിനെതിരായ മത്സരത്തിൽ ബാഴ്സലോണ ടീമിനൊപ്പം മെസി ചേരില്ലെന്നു ബാഴ്സലോണ വ്യക്തമാക്കിയിരിക്കുകയാണ്. ബാഴ്സലോണയുടെ ഒഫീഷ്യൽ സോഷ്യൽ മീഡിയ അക്കൗണ്ടിലൂടെയാണ് ഇക്കാര്യം വെളിപ്പെടുത്തിയിരിക്കുന്നത്.

    ഇന്നു നടന്ന പരിശീലനത്തിലും മെസി പങ്കെടുത്തിട്ടില്ല. വരുന്ന കോപ്പ അമേരിക്ക മത്സരങ്ങളുടെയും ലോകകപ്പ് യോഗ്യതാ മത്സരങ്ങൾക്കുമായുള്ള തയ്യാറെടുപ്പിനായായി കൂടുതൽ വിശ്രമം ആവശ്യമായതിനാലാണ് ഈ നീക്കം. വെറും 13 ദിവസം മാത്രമാണ് മെസിക്ക് വിശ്രമത്തിനായി ലഭിക്കുക.

    പരിശീലകൻ കൂമാൻ്റെ സമ്മതത്തോടെയാണ് വിശ്രമത്തിനായി മെസി ഐബാർ മത്സരം ഒഴിവാക്കിയിരിക്കുന്നത്. മെസിയെ കൂടാതെ പെഡ്രിക്കും കൂമാൻ വിശ്രമം അനുവധിച്ചിരുന്നു. ഈ സീസണിൽ ബാഴ്സക്കായി കൂടുതൽ മിനിറ്റുകൾ കളിച്ച താരങ്ങളിലൊരാളാണ് മെസി.

    ജൂൺ 3നു ചിലിയുമായും 8നു കൊളംബിയയുമായും അർജൻ്റീനക്ക് മത്സരങ്ങളുണ്ട്. ജൂൺ 14 മുതൽ കോപ്പ അമേരിക്കയും ആരംഭിക്കുന്നതിൻ്റെ മുന്നോടിയായാണ് മെസിയുടെ ഈ നീക്കം.

  5. ഇത്രയും ബുദ്ദിമുട്ടേണ്ടി വരുമെന്നും ഒരിക്കലും പ്രതീക്ഷിച്ചില്ല, അത്ലറ്റിക്കോയുടെ നിർണായക വിജയത്തെക്കുറിച്ച് സുവാരസ്

    Leave a Comment

    ഒസാസുനക്കെതിരായ ലാലിഗ മത്സരത്തിൽ ഒന്നിനെതിരെ രണ്ടു ഗോളിന്റെ നാടകീയ വിജയം നേടിയിരിക്കുകയാണ്. ഒസാസുനക്കായി 75ആം മിനുട്ടിൽ ബുഡിമിർ നേടിയ ഗോളിനു അവസാനനിമിഷങ്ങളിലൂടെ റെനാൻ ലോധിയുടെയും ലൂയിസ് സുവാരസിന്റെയും ഗോളിലൂടെയും അത്ലറ്റിക്കോ വിജയം കൈപ്പിടിയിലൊതുക്കിയത്.

    എന്നാൽ ഒസാസുനക്കെതിരെ ഇത്രയും ബുദ്ദിമുട്ടേണ്ടി വരുമെന്നു ഒരിക്കലും പ്രതീക്ഷിച്ചില്ലെന്നാണ് വിജയഗോൾ നേടിയ സുവാരസിന്റെ പക്ഷം. എന്നാൽ ലാലിഗ നേടാൻ ഇത്രയും ബുദ്ദിമുട്ടേണ്ടി വരുമെന്നും അതാണ് ഇന്ന്‌ സംഭവിച്ചതെന്നും സുവാരസ് വ്യക്തമാക്കി. മത്സരശേഷം നൽകിയ അഭിമുഖത്തിൽ സംസാരിക്കുകയായിരുന്നു സുവാരസ്.

    “ഇപ്പോൾ ഇങ്ങനെ ബുദ്ധിമുട്ടേണ്ടി വരുമെന്നു ഞാൻ ഒരിക്കലും പ്രതീക്ഷിച്ചിരുന്നില്ല. കാരണം സീസണിലെ തന്നെ ഒരു മികച്ച പകുതി ഞങ്ങൾക്ക് അനുകൂലമായി ലഭിച്ചിരുന്നു. ഞാനടക്കം ഒരുപാട് അവസരങ്ങൾ ഞങ്ങൾ പാഴാക്കി.”

    എന്നാൽ ഇത്തരത്തിലുള്ള ബുദ്ധിമുട്ടുകൾ അനുഭവിച്ചാൽ തന്നെയാണ്‌ ലാലിഗ നേടാനാവുക.അതു തന്നെയാണ് ഇന്നും സംഭവിച്ചത്. ബുദ്ധിമുട്ടുകയെന്നത് അത്ലറ്റിക്കോക്ക് എപ്പോഴുമുള്ള കാര്യമാണെന്ന് എല്ലാവരും പറയാറുണ്ട്. എന്നാൽ ഇത്തരത്തിൽ ബുദ്ധിമുട്ടേണ്ടി വരുമെന്നു ഞാൻ ഒരിക്കലും പ്രതീക്ഷിച്ചിരുന്നില്ല. ” സുവാരസ് പറഞ്ഞു.

  6. കിരീടത്തിനായി അവസാനസെക്കന്റ്‌ വരെയും പോരാടും, നയം വ്യക്തമാക്കി കൂമാൻ

    Leave a Comment

    ലാലിഗ കിരീടപോരാട്ടത്തിൽ ആദ്യ നാലു ടീമുകൾക്കും സാധ്യതയുള്ള ഒരു പ്രത്യേകസാഹചര്യമാണ് നിലവിലുള്ളത്. അത്ലറ്റിക്കോക്കും റയലിനും ബാഴ്സക്കും സെവിയ്യക്കും കിരീടപോരാട്ടത്തിൽ ഇനിയുള്ള മത്സരങ്ങളെല്ലാം വളരെ നിർണായകമായിരിക്കും. ലാലിഗയിൽ മികച്ച പ്രകടനം തുടരുന്ന ലെവാന്റെക്കെതിരെയുള്ള മത്സരത്തിനുള്ള തയ്യാറെടുപ്പിലാണ് കൂമാനു കീഴിൽ ബാഴ്‌സലോണ.

    കഴിഞ്ഞ രണ്ടു മത്സരങ്ങളിലും സസ്പെൻഷൻ മൂലം പുറത്തിരിക്കേണ്ടി വന്ന കൂമാനെ ഇത്തവണ ലെവാന്റെക്കെതിരെ ടച്ച് ലൈനിൽ കണ്ടേക്കും. കിരീടം നേടുക ശ്രമകരമാണെങ്കിലും അവസാന സെക്കന്റ്‌ വരെ പോരാടുമെന്ന് തന്നെയാണ് കൂമാൻ വ്യക്തമാക്കുന്നത്. മത്സരത്തിനു മുന്നോടിയായി നടന്ന അഭിമുഖത്തിൽ സംസാരിക്കുകയായിരുന്നു അദ്ദേഹം.

    “എനിക്ക് തോന്നുന്നത് ഈ അവസരത്തിൽ എല്ലാവർക്കും തുല്യമായാണ് ലീഗിന്റെ സാധ്യതകളുള്ളത്. ഈ ലീഗ് തീർക്കുകയെന്നത് ബുദ്ദിമുട്ടുള്ള ഒരു കാര്യമാണ്. കാരണം ശരീരികമായും മത്സരങ്ങളുടെ എണ്ണവും അതിനെ സ്വാധീനിക്കുന്നുണ്ട്. ഈ അവസാന മത്സരങ്ങളിൽ ഞങ്ങളുടെ പരമാവധി നൽകാൻ തന്നെയാണ് തീരുമാനം.” കൂമാൻ പറഞ്ഞു.

    ഇപ്പോഴും ചാമ്പ്യൻമാരാകുമെന്ന് തന്നെയാണ് വിശ്വസിക്കുന്നതെന്നും അതിനായി അവസാന സെക്കന്റ്‌ വരെ പോരാടുമെന്നും കൂമാൻ അഭിപ്രായപ്പെട്ടു
    ലീഗ് കിരീടം നേടുന്നതിനെ ആശ്രയിച്ചിരിക്കും കൂമാന്റെ ബാഴ്സയിലെ ഭാവിയെന്നും റിപ്പോർട്ടുകൾ ഉയർന്നു വരുന്നുണ്ട്.

  7. സെവിയ്യയുമായി സമനിലക്കുരുക്ക്, വിവാദപെനാൽറ്റിയിൽ പൊട്ടിത്തെറിച്ച് സിദാൻ

    Leave a Comment

    സെവിയ്യയുമായി സ്വന്തം തട്ടകത്തിൽ വെച്ചു നടന്ന ലാലിഗ മത്സരത്തിൽ റയൽ മാഡ്രിഡിനു സമനില കൊണ്ടു തൃപ്തിപ്പെടേണ്ടി വന്നിരുന്നു. സെവിയ്യ നേടിയ രണ്ടു ഗോളുകൾക്ക് അസെൻസിയോയും ക്രൂസും ഗോളിലൂടെ മറുപടി നൽകിയെങ്കിലും ലാലിഗയിൽ ഒന്നാമത്തേതാനുള്ള സുവർണാവസരം റയൽ മാഡ്രിഡ്‌ പാഴാക്കുകയായിരുന്നു.

    മത്സരത്തിൽ സെവിയ്യയുടെ രണ്ടാം ഗോളിനു കാരണമായ വിവാദമായ റഫറിയുടെ പെനാൽറ്റി വിധിക്കെതിരെയും വലിയ വിമർശനങ്ങളാണ് ഉയർന്നു വന്നത്. മത്സരശേഷം റയൽ പരിശീലകൻ സിദാനും റഫറിയുടെ തീരുമാനത്തിൽ പ്രതിഷേധം അറിയിച്ചു. സാധാരണ റഫറിയുടെ വിവാദതീരുമാനങ്ങളിൽ അഭിപ്രായം പ്രകടിപ്പിക്കാത്ത സിദാൻ ഇത്തവണ രോഷാകുലനായാണ് വിമർശനമുന്നയിച്ചത്.

    പെനാൽറ്റി ബോക്സിൽ ബെൻസിമയെ വീഴ്ത്തിയതിനു പെനാൽറ്റി ചെക്ക് നടത്തിയപ്പോൾ അതിന് മുൻപ് റയൽ മാഡ്രിഡ്‌ പെനാൽറ്റി ബോക്സിൽ വെച്ചു റയൽ പ്രതിരോധതാരം എഡർ മിലിറ്റാവോയുടെ ഹാൻഡ്ബോൾ പരിഗണിച്ച് സെവിയ്യക്ക് പെനാൽറ്റി വിധിക്കുകയായിരുന്നു. ഈ വിവാദ തീരുമാനത്തിനെതിരെയാണ്‌ സിദാൻ തുറന്നടിച്ചത്.

    “എനിക്കു ഹാൻഡ് ബോൾ കൊടുത്തത് എന്തിനാണെന്ന് മനസിലായില്ല. അവിടെ മിലിറ്റാവോയുടെ ഹാൻഡ് ബോൾ ആണെങ്കിൽ അപ്പുറത്തു സെവിയ്യയുടേതും ഹാൻഡ് ബോൾ തന്നെയല്ലേ. കാരണമായി റഫറി പറഞ്ഞത് എനിക്കു ഒട്ടും ബോധിച്ചിട്ടില്ല. എങ്കിലും അയാൾ തന്നെയാണ് വിസിൽ വിളിക്കുന്നത്. ഞാൻ ഇതിനെക്കുറിച്ചിങ്ങനെ സംസാരിക്കാത്ത വ്യക്തിയാണ്‌. പക്ഷെ ഇന്നു ഞാൻ അസ്വസ്ഥനാണ്. അവർ എനിക്കു ഹാൻഡ് ബോൾ നിയമങ്ങൾ വിശദീകരിക്കണം. മിലിറ്റാവോയുടേത് ഹാൻഡ് ബോളെങ്കിൽ അപ്പുറത്തു സെവിയ്യയുടേതും അതു തന്നെയാണ്. അതാണ് യഥാർത്ഥ്യം. ” സിദാൻ പറഞ്ഞു.

  8. ലാലിഗയിൽ ഒന്നാമതെത്താൻ റയൽ മാഡ്രിഡ് ഇന്നിറങ്ങുന്നു‌, റയൽ-സെവിയ്യ പോരാട്ടം, സാധ്യതാ ലൈനപ്പ് അറിയാം

    Leave a Comment

    ലാലിഗ അതിന്റെ അവസാനത്തോടടുക്കുമ്പോൾ കിരീടപോരാട്ടത്തിൽ ആദ്യ നാലു സ്ഥാനങ്ങളിലുള്ള ക്ലബ്ബുകൾക്ക് വളരെ നിർണായകമായ മത്സരങ്ങളാണ് വരാനിരിക്കുന്നത്. അത്തരത്തിൽ ഒന്നായ അത്ലറ്റിക്കോ-ബാഴ്സ മത്സരം ഗോൾരഹിത സമനിലയിൽ പിരിയേണ്ടി വന്നത് രണ്ടാം സ്ഥാനത്തുള്ള റയൽ മാഡ്രിഡിനു സുവർണാവസരമാണ് നൽകിയിരിക്കുന്നത്.

    ഇന്ന്‌ അർധരാത്രി നാലാം സ്ഥാനത്തുള്ള സെവിയ്യയുമായി സ്വന്തം തട്ടകത്തിൽ വെച്ചു നടക്കാനിരിക്കുന്ന മത്സരത്തിൽ റയലിനു വിജയിക്കാനായാൽ ലാലിഗയിൽ ഒന്നാമതെത്താൻ ലോസ് ബ്ലാങ്കോസിനു സാധിച്ചേക്കും. റയലിനു കിരീടം നേടാൻ അതിന് ശേഷം ബാക്കിയുള്ള മൂന്നു മത്സരങ്ങളും വിജയിച്ചാൽ മതിയാകും.

    അടുത്തിടെയുള്ള മത്സരങ്ങളിൽ തകർപ്പൻ ഫോമിൽ തുടരുന്ന ടീമാണ് മുൻ റയൽ പരിലീലകൻ ജൂലെൻ ലോപെറ്റെഗിയുടെ സെവിയ്യ. റയൽ പ്രതിരോധ നിരയിൽ സെർജിയോ രമോസും ഫെർലാൻ മെൻഡിയും പരിക്കുമൂലം ഇല്ലാത്തത് സിദാന് കൂടുതൽ തലവേദന നൽകുന്നുണ്ട്. പകരം നാച്ചോയെ പ്രതിരോധത്തിലേക്ക് സിദാൻ പരിഗണിച്ചേക്കും. ഒന്നാമതെത്താൻ റയലിനു ഈ മൂന്നു പോയിന്റ് നിർണായകമായേക്കും.

    സാധ്യതാ ലൈനപ്പ്

    റയൽ മാഡ്രിഡ്‌:- തിബോട് കോർട്വ,ഒഡ്രിയൊസോള,മിലിറ്റവോ,നാച്ചോ, മാഴ്‌സെലോ,കാസമിരോ, ക്രൂസ്, മോഡ്രിച്ച്,വിനിഷ്യസ്,അസെൻസിയോ,ബെൻസിമ.

    സെവിയ്യ:- ബോണോ, നവാസ്,കൂണ്ടേ,കാർലോസ്, അക്യുന,ഫെർണാണ്ടോ,റാക്കിറ്റിച്ച്,സുസോ,ഗോമസ്,ഒകമ്പോസ്‌,എൻ-നെയ്‌സിരി.

  9. ലാലിഗയിൽ നിർണായമായ ബാഴ്സ-അത്ലറ്റിക്കോ മത്സരം സമനിലയിൽ, റയലിനു സുവർണാവസരം

    Leave a Comment

    ലാലിഗ കിരീടപോരാട്ടത്തിൽ നിർണായമായ അത്ലറ്റിക്കോ മാഡ്രിഡ്‌- ബാഴ്‌സലോണ മത്സരം ഗോൾരഹിത സമനിലയിൽ അവസാനിച്ചിരിക്കുകയാണ്. തന്ത്രപരമായി അത്ലറ്റിക്കോ മുന്നിൽ നിന്ന മത്സരത്തിൽ ഇരു ടീമുകൾക്കും ലഭിച്ച അവസരങ്ങൾ ഗോളിലെത്തിക്കാൻ സാധിക്കാതെ പോയതോടെ മത്സരം സമനിലയിലാവുകയായിരുന്നു.

    അത്ലറ്റിക്കോ മാഡ്രിഡിന്റെ ഭാഗത്തു നിന്നും നിരവധി അക്രമണങ്ങളുണ്ടായെങ്കിലും ഭാഗ്യവശാൽ ടെർ സ്റ്റീഗനെ മറികടന്നു പോവാൻ സാധിക്കാതെ പോവുകയായിരുന്നു. മെസിയുടെ ഒരു ഒറ്റയാൾ മുന്നേറ്റത്തിൽ എടുത്ത ഷോട്ട് ഗോളെന്നുറച്ചെങ്കിലും ഗോൾകീപ്പർ യാൻ ഒബ്ലാക്കിന്റെ വിരൽതുമ്പിൽ തട്ടിയകന്നു പോവുകയായിരുന്നു.

    കളിയുടെ അവസാനത്തിൽ മെസിക്ക് ലഭിച്ച ഫ്രീകിക്കും ഗോളിലെത്താതെ പോയി. ബാഴ്സ നടത്തിയ മുന്നേറ്റത്തിൽ ഡെമ്പെലെയുടെ ഹെഡ് ചെയ്തു ഗോളിലെത്തിക്കാൻ ഉള്ള ശ്രമവും വിഫലമായി. സമനിലയോടെ നിലവിൽ 77 പോയിന്റുമായി ഒന്നാം സ്ഥാനത് തന്നെ തുടരുകയാണ് അത്ലറ്റിക്കോ.

    ഇതോടെ നാളെ അർദ്ധരാത്രി നടക്കാനിരിക്കുന്ന സെവിയ്യ- റയൽ മാഡ്രിഡ്‌ മത്സരം കൂടുതൽ നിർണായകമായേക്കും. ജയിച്ചാൽ റയൽ മാഡ്രിഡിനു ഒന്നാം സ്ഥാനത്തെത്താൻ ഉള്ള സുവർണാവസരമാണിത്. കഴിഞ്ഞ മത്സരം തോൽവി രുചിച്ച സെവിയ്യക്ക് കിരീടപോരാട്ടത്തിലേക്ക് തിരിച്ചെത്താനുള്ള അവസരം കൂടിയാണിത്. ആദ്യ നാലിൽ ഉള്ള ഏത് ടീമിനും ഇത്തവണ കിരീടം ഉയർത്താനുള്ള സാധ്യത മത്സരങ്ങളെ കൂടുതൽ ആവേശകരമാക്കുന്നുണ്ട്.

  10. ലാലിഗയിൽ നിർണായകമായ ബാഴ്സ- അത്ലറ്റിക്കോ പോരാട്ടം ഇന്ന്‌, സാധ്യതാ ലൈനപ്പ് അറിയാം

    Leave a Comment

    ലാലിഗ കിരീടപോരാട്ടത്തിൽ നിർണായകമായ അത്ലറ്റിക്കോ-ബാഴ്‌സ മത്സരം ഇന്ന്‌ ക്യാമ്പ് ന്യൂവിൽ അരങ്ങേറും. രണ്ടു പോയിന്റ് മാത്രം വ്യത്യാസത്തിൽ മൂന്നാം സ്ഥാനത്തുള്ള ബാഴ്‌സലോണയ്ക്ക് ഈ മത്സരത്തിൽ വിജയം അനിവാര്യമാണ്. രണ്ടാം സ്ഥാനത്തുള്ള റയൽ മാഡ്രിഡുമായി ഒരേ പോയിന്റ് നിലയിലാണുള്ളതെങ്കിലും രണ്ട് എൽ ക്ലാസിക്കോയിലും റയലിനു വിജയിക്കാനായത് റയലിനു മുൻ‌തൂക്കം നൽകുകയായിരുന്നു.

    പ്രതിരോധപരമായി കൂടുതൽ മികച്ച കൊണ്ടോഗ്ബിയയെ ബാഴ്സയ്ക്കെതിരെ പരിശീലകൻ സിമിയോണി സ്റ്റാർട്ട്‌ ചെയ്യിക്കാനാണ് നീക്കം. വലെൻസിയക്കെതിരെ ഇറക്കിയ അതേ ടീമിനെ ബാഴ്സയ്ക്കെതിരെ പരീക്ഷിക്കാനാണ് സിമിയോണിയുടെ തീരുമാനം. ബാഴ്സക്കൊപ്പം റയൽ മാഡ്രിഡും 72 പോയിന്റുമായി പിറകിലുള്ളത് ഈ മത്സരത്തിൽ അത്ലറ്റിക്കോക്ക് വിജയം അനിവാര്യമാക്കുന്നുണ്ട്.

    വലെൻസിയക്കെതിരെ വിജയം നേടാനായതിൻ്റെ ആത്മവിശ്വാസത്തിലാണ് ബാഴ്സ ഇന്നു അത്ലെറ്റിക്കോയെ നേരിടാനൊരുങ്ങുന്നത്. നിർണായക മത്സരത്തിൽ ജയിക്കാനായാൽ അത്ലറ്റിക്കോയെ മറികടന്ന് ഒന്നാമതെത്താമെങ്കിലും സെവിയ്യയെ മറികടന്നാൽ റയൽ ഒന്നാം സ്ഥാനം തിരിച്ചു പിടിക്കും. അതു കൊണ്ടു ഇനിയുള്ള എല്ലാ മത്സരങ്ങളും ആദ്യ നാലിലുള്ള എല്ലാ ടീമിനും നിർണായകമായിരിക്കും.

    സാധ്യതാ ഇലവൻ

    ബാഴ്സലോണ :- ടെർ സ്റ്റേഗൻ, പിക്വെ, അറോഹോ, ലെങ്ലെറ്റ്, ഡിയോങ്, ബുസ്കെറ്റ്സ്, പെഡ്രി, ഡെസ്റ്റ്, മെസി, ഗ്രിസ്മാൻ, ആൽബ

    അത്ലെറ്റിക്കോ :- ഒബ്ലാക്ക്,ഫിലിപെ, സാവിച്ച്, ഹെർമോസോ, ട്രിപ്പിയർ, കരാസ്കോ, കൊണ്ടോഗ്ബിയ, കോക്കെ,ലെമാർ, ലോറെൻ്റെ, സുവാരസ്.