ഐപിഎല്ലില്‍ ലഖ്‌നൗ സൂപ്പര്‍ ജയന്റ്‌സിന് എതിരെ തകര്‍പ്പന്‍ പ്രകടനം കാഴ്ചവെച്ച ചെന്നൈ സൂപ്പര്‍ കിംഗ്‌സ് താരം ശിവം ദുബെയെ ലോകകപ്പ് സ്‌ക്വാഡിലേക്ക് എടുക്കണം എന്ന് അഭ്യര്‍ത്ഥിച്ച് മുന്‍ ഇന്ത്യന്‍ താരം സുരേഷ് റെയ്‌ന. ദുബെയെ ഐപിഎല്ലിന് ശേഷം ഉടന്‍ നടക്കുന്ന ലോകകപ്പ് സ്‌ക്വാഡിലേക്ക് എടുക്കണമെന്നാണ് സുരേഷ് റെയ്ന ബിസിസിഐ ചീഫ് സെലക്ടര്‍ അജിത് അഗാര്‍ക്കറോട് അപേക്ഷിച്ചത്.

‘ശിവം ദുബെ ലോകകപ്പ് ലോഡിംഗ്! അഗാര്‍ക്കര്‍ ഭായ് ദയവു ചെയ്ത് ദുബെയെ തിരഞ്ഞെടുക്കുക’ റെയ്ന ട്വീറ്റ് ചെയ്തു

ഇന്നലെ ദൂബെ 27 പന്തില്‍ നിന്ന് 66 റണ്‍സ് അടിച്ചു കൂട്ടിയിരുന്നു. 3 ഫോറും 7 സിക്സറുകളും ദൂബെയുടെ ഇന്നലത്തെ ഇന്നിംഗ്‌സില്‍ ഉള്‍പ്പെടുന്നു. ഈ സീസണില്‍ സിഎസ്‌കെക്ക് വേണ്ടി 8 മത്സരങ്ങളില്‍ നിന്ന് 311 റണ്‍സ് നേടാന്‍ ദുബെക്ക് ആയി.

നേരത്തെ സൗരവ് ഗാംഗുലി റിഷഭ് പന്തിനെ ലോകകപ്പ് ടീമില്‍ ഉള്‍പ്പെടുത്താന്‍ ആവശ്യപ്പെട്ടിരുന്നു. ഇതിന് പിന്നാലെയാണ് റെയ്‌ന മറ്റൊരു താരത്തിനായി സമാനമായ ആവശ്യം ഉന്നയിക്കുന്നത്.

മധ്യനിരയില്‍ എവിടേയും ബാറ്റ് ചെയ്യാന്‍ പന്തിന് കഴിയും. എന്നാല്‍ എത്രാം നമ്പറില്‍ പന്ത് ഇറങ്ങണമെന്ന് പറയാന്‍ കഴിയില്ല. ട്വന്റി 20 ക്രിക്കറ്റില്‍ എപ്പോഴാണ് ഒരാള്‍ ബാറ്റ് ചെയ്യേണ്ടി വരികയെന്നത് അപ്പോഴത്തെ തീരുമാനമാണ്. മൂന്ന് മുതല്‍ ഏഴ് വരെയുള്ള ഏത് സ്ഥാനത്തും പന്തിന് ബാറ്റ് ചെയ്യാന്‍ കഴിയും. ഒരു നിശ്ചിത സ്ഥാനം ട്വന്റി 20 ക്രിക്കറ്റില്‍ ഫലം കാണുകയില്ലെന്നും ഗാംഗുലി വ്യക്തമാക്കി.