2011ലെ ഏകദിന ലോകകപ്പ് സ്വന്തമാക്കിയതിന് ശേഷം ഇന്ത്യക്ക് രണ്ട് ലോകകപ്പുകളെങ്കിലും നഷ്ടമാവാനുള്ള കാരണം ഇന്ത്യന് താരം ഹാര്ദ്ദിക്ക് പാണ്ഡ്യയുടെ പകരക്കാരനെ കണ്ടെത്താനാകാത്തതാണെന്ന് തുറന്ന് പറഞ്ഞ് മുന് പരിശീലകന് രവി ശാസ്ത്രി. ടോപ് ഓര്ഡറില് ആദ്യ ആറുപേരില് ബൗള് ചെയ്യാന് കഴിയുന്ന ഒരാള് പോലുമില്ലാത്തതാണ് ഇന്ത്യക്ക് രണ്ട് ലോകകപ്പുകളെങ്കിലും നഷ്ടമാക്കാന് കാരണമെന്നാണ് രവി ശാസ്ത്രി വിലയിരുത്തുന്നത്. ഒടിടി പ്ലാറ്റ് പോമായ ഫാന് കോഡിനോടാണ് രവി ശാസ്ത്രി ഇക്കാര്യം പറഞ്ഞത്.
‘ടോപ് സിക്സില് ബൗള് ചെയ്യാന് കഴിയുന്നൊരു ഓള് റൗണ്ടര് വേണമെന്ന് ഞാനെപ്പോഴും പറയാറുണ്ട്. ഹാര്ദ്ദിക് പാണ്ഡ്യക്ക് പരിക്കേറ്റതോടെ അത്തരമൊരു കളിക്കാരനെ കണ്ടെത്താന് കഴിയാതിരുന്നത് വലിയ പ്രശ്നമായിരുന്നു. അതിന് ഇന്ത്യ രണ്ട് ലോകകപ്പുകളിലെങ്കിലും വലിയ വില കൊടുക്കേണ്ടിവന്നു’ ശാസ്ത്രി പറയുന്നു.
‘ടോപ് സിക്സില് ഒരാള് പോലും ബൗള് ചെയ്യാനില്ലാ എന്നത് ഇന്ത്യക്ക് വലിയ ബാധ്യതയായിരുന്നു. സെലക്ടര്മാരോടും ഇക്കാര്യം പറഞ്ഞിരുന്നു. ആരെങ്കിലുമുണ്ടോ എന്ന്. പക്ഷെ, ആരെയും കണ്ടെത്താനായില്ലെന്നും ശാസ്ത്രി കൂട്ടിച്ചേര്ത്തു..
2018ലെ ഏഷ്യാ കപ്പിനിടെ നടുവിന് പരിക്കേറ്റ ഹാര്ദ്ദിക് പാണ്ഡ്യ പിന്നീട് പലപ്പോഴും ടീമില് സ്ഥിര സാന്നിധ്യമായിരുന്നില്ല. 2019ലെ ഏകദിന ലോകകപ്പില് ബൗള് ചെയ്യാന് കഴിയുന്ന ബാറ്ററെന്ന നിലയില് സെലക്ടര്മാര് വിജയ് ശങ്കറെയാണ് ടീമിലെടുത്തത്. അംബാട്ടി റായുഡുവിന് പകരം വിജയ് ശങ്കറെ ത്രീ ഡി പ്ലേയര് എന്ന നിലയില് ടീമിലെടുത്തത് വലിയ വിമര്ശനങ്ങള്ക്ക് ഇടയാക്കുകയും ചെയ്തു.
കഴിഞ്ഞ ടി20 ലോകകപ്പില് ഹാര്ദ്ദിക് കളിച്ചെങ്കിലും പന്തെറിയാനുള്ള ശാരീരികക്ഷമതയുണ്ടായിരുന്നില്ല. തുടര്ന്ന് പല മത്സരങ്ങളിലും ബാറ്ററായാണ് ഹാര്ദ്ദിക് കളിച്ചത്. പിന്നീട് കഴിഞ്ഞ ഐപിഎല്ലില് ഗുജറാത്ത് ടൈറ്റന്സിന്റെ നായകനായ ഹാര്ദ്ദിക് ടീമിന് കിരീടം സമ്മാനിച്ചിരുന്നു. ഐപിഎല്ലിലെ പ്രകടനമികവിന്റെ അടിസ്ഥാനത്തില് ഇന്ത്യന് ടീമില് തിരിച്ചെത്തിയ പാണ്ഡ്യ ഇംഗ്ലണ്ടിനെതിരായ ഏകദിന, ടി20 പരമ്പരകളില് തിളങ്ങുകയും ചെയ്തു.