; )
പരിക്കിന്റെ പ്രശ്‌നങ്ങൾ കാരണം ബുദ്ധിമുട്ടുന്ന ബ്രസീലിയൻ താരം കസമീറോയെ മാഞ്ചസ്റ്റർ യുണൈറ്റഡ് വരുന്ന ജനുവരി ജാലകത്തിൽ വിൽക്കാനുള്ള തയ്യാറെടുപ്പിലാണെന്ന് റിപ്പോർട്ടുകൾ. റയൽ മാഡ്രിഡിൽ നിന്നും മാഞ്ചസ്റ്റർ യുണൈറ്റഡിലേക്ക് ചേക്കേറിയ കസമീറോ കഴിഞ്ഞ സീസണിൽ മികച്ച പ്രകടനം നടത്തിയെങ്കിലും ഈ സീസണിൽ ആ നിലവാരം കാത്തു സൂക്ഷിക്കാൻ കഴിഞ്ഞിട്ടില്ല. ഇതിനിടയിലാണ് പരിക്കിന്റെ ബുദ്ധിമുട്ടുകൾ താരം നേരിടുന്നത്.
നവംബർ ആദ്യവാരത്തിലാണ് കസമീറോ അവസാനമായി മാഞ്ചസ്റ്റർ യുണൈറ്റഡിനായി ഒരു മത്സരം കളിക്കുന്നത്. അതിനു ശേഷം ഇതുവരെ കളത്തിലിറങ്ങിയിട്ടില്ലാത്ത താരത്തെ വിറ്റ് ജനുവരിയിൽ ടീമിനെ കൂടുതൽ ശക്തമാക്കാനുള്ള പദ്ധതിയിലാണ് പരിശീലകൻ എറിക് ടെൻ ഹാഗ്. സ്റ്റീവ് മക്ടോമിനായ് ക്ലബിന് വേണ്ടി മികച്ച പ്രകടനം നടത്തുന്നതും ബാക്കപ്പായി മൊറോക്കൻ താരം അംറാബാത് ആ പൊസിഷനിൽ ഉണ്ടെന്നതും കൊണ്ടാണ് കസമീറോയെ വിൽക്കുന്ന കാര്യം അദ്ദേഹം ചിന്തിക്കുന്നത്.
🚨🚨| PSG are interested in Casemiro.
[SZ, via @gffn] pic.twitter.com/WCouP41Lvw
— TTS. (@TransferSector) December 12, 2023
അതിനിടയിൽ താരത്തെ സ്വന്തമാക്കാൻ ഫ്രഞ്ച് വമ്പന്മാരായ പിഎസ്‌ജിക്ക് താത്പര്യമുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. നേരത്തെ തന്നെ കസമീറോക്ക് വേണ്ടി ശ്രമം നടത്തിയ ക്ലബാണ് പിഎസ്‌ജി. എന്നാൽ റയൽ മാഡ്രിഡ് വിടാൻ തീരുമാനമെടുത്ത താരം മാഞ്ചസ്റ്റർ യുണൈറ്റഡിനെയാണ് തിരഞ്ഞെടുത്തത്. ജനുവരിയിൽ ടീമിനെ ശക്തമാക്കുന്നതിനു വേണ്ടിയാണ് ലൂയിസ് എൻറിക് കസമീറോയെ ടീമിലെത്തിക്കാനുള്ള ശ്രമം നടത്തുന്നത്.
അതേസമയം റൊണാൾഡോയുടെ അടുത്ത സുഹൃത്തായ കസമീറോയെ സൗദി പ്രൊ ലീഗിൽ എത്തിക്കാനുള്ള ശ്രമങ്ങളും സജീവമായി നടക്കുന്നുണ്ട്. മാഞ്ചസ്റ്റർ യുണൈറ്റഡ് വിൽക്കാൻ ആഗ്രഹിക്കുന്ന താരങ്ങളുടെ ലിസ്റ്റിലുള്ള കസമീറോ യൂറോപ്പിൽ തന്നെ തുടരാനാണ് ആഗ്രഹിക്കുന്നതെങ്കിൽ പിഎസ്‌ജിയിലേക്ക് ചേക്കേറും. അതല്ലെങ്കിൽ വമ്പൻ തുകയുടെ കരാറിൽ സൗദി അറേബ്യൻ ക്ലബ്ബിലേക്ക് എത്താനാകും കസമീറോ ശ്രമിക്കുക.