ഐപിഎല്ലിനിടെ ഏറ്റുമുട്ടിയ റോയല് ചലഞ്ചേഴ്സ് ബാംഗ്ലൂര് താരം വിരാട് കോഹ്ലിയും നവീനുല് ഹഖും തമ്മിലുളള പ്രശ്നത്തിന് മഞ്ഞുരുകിയെന്ന് വിചാരിച്ചവര്ക്ക് തെറ്റി. കോഹ്ലിയോട് താന് ട്വിറ്ററിലൂടെ മാപ്പു ചോദിച്ചുവെന്ന വാര്ത്തകള് തള്ളി ലഖ്നൗ സൂപ്പര് ജയന്റ്സിന്റെ അഫ്ഗാന് പേസര് തന്നെ രംഗത്തെതി.
കഴിഞ്ഞ ദിവസം നവീനുല് ഹഖ് 66 എന്ന ട്വിറ്റര് അക്കൗണ്ടില് നിന്ന് എന്നോട് ക്ഷമിക്കു വിരാട് കോഹ്ലി സര്, എന്ന ട്വീറ്റ് വന്നത്. പിന്നാലെ ഇത് ആരാധകര്ക്കിടയില് വൈറലാവുകയും മണിക്കൂറുകള്ക്കുള്ളില് 25000ത്തോളം പേര് ലൈക്ക് അടിക്കുകയും ചെയ്തിരുന്നു. പിന്നീട് ഈ ട്വീറ്റ് അപ്രത്യക്ഷമായി.
ഇതിന് പിന്നാലെ നവിന്റെ ചിത്രവുമുളള വെരിഫൈഡ് അക്കൗണ്ടുകള്ക്ക് നല്കാറുള്ള നീല ടിക്കുമുള്ള മറ്റൊരു ട്വിറ്റര് അക്കൗണ്ടില് നിന്ന് ലോക ടെസ്റ്റ് ചാമ്പ്യന്ഷിപ്പ് ഫൈനലില് ശുഭ്മാന് ഗില്ലിന്റെയും വിരാട് കോഹ്ലിയുടെയും വിക്കറ്റുകളാണ് ഓസ്ട്രേലിയക്ക് നിര്ണായകമാകുക എന്ന് ട്വീറ്റ് എത്തി. അതിന് മുമ്പ് വരാനിരിക്കുന്ന ഏകദിന ലോകകപ്പില് വിരാട് കോലി ടോപ് സ്കോററാകുകയും രോഹിത് കിരീടം നേടുകയും ധോണി ഇന്ത്യയുടെ മുഖ്യപരിശീലകനായി എത്തുകയും ചെയ്യുക എന്നത് ആരാധകന് എന്ന നിലയില് വലിയ സ്വപ്നമാണെന്നും ട്വീറ്റ് ചെയ്തിരുന്നു.
ഇതോടെയാണ് നവീന് ഇന്സ്റ്റഗ്രാം സ്റ്റോറിയിലൂടെ പ്രതികരണത്തിന് തയാറായത്. ഇത്തരം വ്യാജ പ്രൊഫൈലുകളില് നിന്ന് സന്ദേശം ലഭിക്കുന്നവര് ഉടന് അത് വ്യാജമാണെന്ന് റിപ്പോര്ട്ട് ചെയ്യണമെന്നായിരുന്നു നവീന് ആവശ്യപ്പെട്ടത്. ആരാധകര് തനിക്കെതിരെ കോഹ്ലി ചാന്റ് നടത്തുന്നത് കളിക്കാന് കൂടുതല് പ്രചോദനം നല്കുന്നുവെന്ന് നവീന് ഐപിഎല് എലിമിനേറ്ററില് മുംബൈ ഇന്ത്യന്സിനോട് തോറ്റശേഷം വാര്ത്താസമ്മേളനത്തില് പറഞ്ഞിരുന്നു.