ഇന്ത്യയ്ക്കെതിരായ ഏകദിന പരമ്പരയിലെ ഒരൊറ്റ തോല്വി ദക്ഷിണാഫ്രിക്കന് ക്രിക്കറ്റിനെ അടിമുടി ബാധിച്ചിരിക്കുകയാണ്. രണ്ടാം മത്സരത്തിലെ തോല്വിയോടെ ദക്ഷിണാഫ്രിക്കയ്ക്ക് 2023ല് നടക്കുന്ന ലോകകപ്പില് പങ്കെടുക്കാന് യോഗ്യത റൗണ്ട് കളിത്തേണ്ടി വരും.
ഇനി ഏകദിന സൂപ്പര് ലീഗില് അവശേഷിക്കുന്ന എല്ലാ മത്സരങ്ങളും വിജയിച്ചാല് പോലും അടുത്ത വര്ഷം ഇന്ത്യയില് നടക്കുന്ന ഏകദിന ലോകകപ്പിന് നേരിട്ട് യോഗ്യത നേടുവാന് ദക്ഷിണാഫ്രിക്കയ്ക്ക് സാധിച്ചേക്കില്ല.
ഏകദിന സൂപ്പര് ലീഗില് ആദ്യ എട്ട് സ്ഥാനങ്ങളിലുള്ള ടീമുകളാണ് ഇന്ത്യയില് നടക്കുന്ന ലോകകപ്പിന് നേരിട്ട് യോഗ്യത നേടുക. ആതിഥേയരായതിനാല് തന്നെ നിലവില് ആറാം സ്ഥാനത്തുള്ള ഇന്ത്യ ലോകകപ്പിന് യോഗ്യത നേടികഴിഞ്ഞു. എന്നാല് മത്സരങ്ങളില് നിന്നും വെറും 59 പോയിന്റോടെ പതിനൊന്നാം സ്ഥാനത്താണ് ദക്ഷിണാഫ്രിക്കയുള്ളത്.
ഐ പി എല് മാതൃകയിലുള്ള തങ്ങളുടെ പുതിയ ടി20 ലീഗിനായി അടുത്ത വര്ഷം ഓസ്ട്രേലിയക്കെതിരെ നടക്കേണ്ടിയിരുന്ന ഏകദിന പരമ്പരയില് നിന്നും പിന്മാറിയതാണ് സൗത്താഫ്രിക്കയ്ക്ക് തിരിച്ചടിയായത്. ഇതിനെ തുടര്ന്ന് 30 പോയിന്റുകള് ഐസിസി ഓസ്ട്രേലിയക്ക് നല്കി.
ഇന്ത്യയ്ക്കെതിരായ പരമ്പരയ്ക്ക് ശേഷം തങ്ങളുടെ സ്വന്തം നാട്ടില് ഇംഗ്ലണ്ടിനെതിരെയും നെതര്ലന്ഡ്സിനെതിരെയും നടക്കുന്ന പരമ്പരകള് മാത്രമാണ് ഇനി ഏകദിന സൂപ്പര് ലീഗില് സൗത്താഫ്രിക്കയ്ക്ക് ശേഷിക്കുന്നത്. ഇന്ത്യയ്ക്കെതിരെ ഇനി ശേഷിക്കുന്ന ഒരു മത്സരമടക്കം ഇനി നടക്കാനിരിക്കുന്ന 6 മത്സരങ്ങളിലും ആറിലും വിജയിച്ചാല് പോലും യോഗ്യത ഉറപ്പിക്കാന് ദക്ഷിണാഫ്രിക്കയ്ക്ക് സാധിക്കില്ല.