; )
ഫുട്ബോൾ കരിയറിൽ സാധ്യമായ എല്ലാ നേട്ടങ്ങളും സ്വന്തമാക്കിയ താരങ്ങളിൽ ഒരാളാണ് സെർജിയോ റാമോസ്. റയൽ മാഡ്രിഡിന്റെ എല്ലാമെല്ലാമായിരുന്നെങ്കിലും അവസാനകാലത്ത് പ്രതിഫലവുമായി ബന്ധപ്പെട്ട വിഷയങ്ങളിൽ ക്ലബിനോട് ഇടഞ്ഞ് ഫ്രഞ്ച് ക്ലബായ പിഎസ്‌ജിയിലേക്ക് ചേക്കേറുകയായിരുന്നു സ്‌പാനിഷ്‌ താരം. കഴിഞ്ഞ രണ്ടു സീസണുകളിലായി താരം പിഎസ്‌ജിയിലാണ് കളിച്ചു കൊണ്ടിരിക്കുന്നത്.
എന്നാൽ ഈ സീസണിനപ്പുറം സെർജിയോ റാമോസ് പിഎസ്‌ജിയിൽ തുടരുമോ എന്ന കാര്യത്തിൽ സംശയങ്ങൾ നിലനിൽക്കുന്നുണ്ട്. പരിക്ക് കാരണം ഒരു സീസണിന്റെ ഭൂരിഭാഗവും നഷ്‌ടമായ താരം ഇപ്പോൾ അത്ര മികച്ച ഫോമിലല്ല. വലിയ തുക പ്രതിഫലമായി വാങ്ങുന്നതിനാൽ റാമോസിന്റെ കരാർ പുതുക്കാനുള്ള സാധ്യത ഇല്ലെന്നാണ് റിപ്പോർട്ടുകൾ സൂചിപ്പിക്കുന്നത്.
Saudi side Al-Hilal 'are ready to offer Sergio Ramos more than £26MILLION a season in astronomical two-year deal' https://t.co/PK326Le5t9
— MailOnline Sport (@MailSport) March 31, 2023
അതിനിടയിൽ സെർജിയോ റാമോസിനെ സ്വന്തമാക്കാൻ സൗദി അറേബ്യയിൽ നിന്നും ശ്രമം തുടങ്ങിയെന്ന വാർത്തകൾ പുറത്തു വരുന്നുണ്ട്. നേരത്തെ പോർച്ചുഗൽ സൂപ്പർതാരം ക്രിസ്റ്റ്യാനോ റൊണാൾഡോ സൗദി ലീഗിലേക്ക് ചേക്കേറിയതിനു പിന്നാലെയാണ് റാമോസിനായി സൗദി ക്ലബ് നീക്കങ്ങൾ നടത്തുന്നത്. എന്നാൽ റൊണാൾഡോയുടെ ക്ലബായ അൽ നസ്ർ അല്ല റാമോസിനായി രംഗത്തുള്ളത്.
റിപ്പോർട്ടുകൾ പ്രകാരം അൽ നസ്‌റിന്റെ പ്രധാന എതിരാളികളിൽ ഒരാളായ അൽ ഹിലാൽ ക്ലബാണ് റാമോസിനായി ശ്രമം നടത്തുന്നത്. ഇതിനായി ഒരു വർഷത്തിൽ താരത്തിന് മുപ്പതു മില്യൺ യൂറോ പ്രതിഫലമായി നൽകാമെന്ന ഓഫറും അവർ നൽകിയിട്ടുണ്ട്. കഴിഞ്ഞ ദിവസം മുപ്പത്തിയേഴു വയസായ സെർജിയോ റാമോസിനായി രണ്ടു വർഷത്തെ കരാറാണ് അൽ ഹിലാൽ നൽകാനൊരുങ്ങുന്നത്.
അടുത്ത സീസണിൽ ഇന്റർ മിലാനിൽ നിന്നും സ്‌ക്രിനിയർ പിഎസ്‌ജിയിലേക്ക് ചേക്കേറാൻ പോവുകയാണ്. അതുകൊണ്ടു തന്നെ റാമോസിന് ടീമിൽ അവസരങ്ങൾ കുറയുമെന്നുറപ്പാണ്. ഈ സീസണോടെ കരാർ അവസാനിക്കുന്ന താരത്തിന് പിഎസ്‌ജി പുതിയ കരാർ നൽകുമെന്നും ഉറപ്പില്ല. അതുകൊണ്ടു തന്നെ താരം സൗദിയിൽ എത്താനുള്ള സാധ്യത വളരെ കൂടുതലാണ്.