പിഎസ്ജി കരാർ ഈ സീസണോടെ അവസാനിക്കുന്ന ലയണൽ മെസി അത് പുതുക്കില്ലെന്ന തീരുമാനം എടുത്തതോടെ താരവുമായി ബന്ധപ്പെട്ട ട്രാൻസ്ഫർ അഭ്യൂഹങ്ങൾ ശക്തമാണ്. ഈ സീസണിൽ മികച്ച പ്രകടനം നടത്തിയ അർജന്റീന താരത്തെ നിലനിർത്താൻ ഫ്രഞ്ച് ക്ലബിന് താൽപര്യമുണ്ടെങ്കിലും ലയണൽ മെസി അതിനു തയ്യാറായിട്ടില്ല. തൻറെ മുൻ ക്ലബായ ബാഴ്സലോണയിലേക്ക് ചേക്കേറാനാണ് താരം ആഗ്രഹിക്കുന്നത്.
ബാഴ്സലോണ ലയണൽ മെസിക്കായി ശ്രമങ്ങൾ നടത്തുന്നുണ്ടെങ്കിലും അവരുടെ സാമ്പത്തിക പ്രതിസന്ധി അതിൽ തടങ്ങൾ സൃഷ്ടിക്കുന്നുണ്ട്. ലാ ലീഗയുടെ അനുമതി ഉണ്ടെങ്കിൽ മാത്രമേ മെസിയെ സ്വന്തമാക്കാൻ കഴിയൂ എന്നതിനാൽ അതിനായി ക്ലബ് കാത്തിരിക്കുകയാണ്. ലാ ലീഗയുടെ അനുമതി ലഭിച്ച് ബാഴ്സയുടെ ഓഫർ ലഭിക്കാനായി മെസിയും കാത്തിരിക്കയാണ്.
Lionel #Messi gets improved offer from Saudi Arabia
Argentine World Cup winner reportedly pitched a deal valued between $500-540mhttps://t.co/CcmuY3087Z— Gulf News (@gulf_news) May 19, 2023
അതിനിടയിൽ ലയണൽ മെസിയെ സ്വന്തമാക്കാൻ മറ്റു ചില ക്ലബുകളും ശ്രമം നടത്തുന്നുണ്ട്. പ്രധാനമായും സൗദി അറേബ്യൻ ക്ലബായ അൽ ഹിലാലാണ് ലയണൽ മെസിക്കായി ശ്രമം നടത്തുന്നത്. താരത്തിനായി നേരത്തെ അൽ ഹിലാൽ ഒരു ഓഫർ നൽകിയിരുന്നു. ഇപ്പോൾ ആ തുക വർധിപ്പിച്ച് പുതിയ ഓഫർ നൽകിയിട്ടുണ്ടെന്നാണ് റിപ്പോർട്ടുകൾ പറയുന്നത്.
സ്പാനിഷ് മാധ്യമത്തിന്റെ റിപ്പോർട്ടുകൾ പ്രകാരം ലയണൽ മെസിയെ സ്വന്തമാക്കാൻ 500 മില്യൺ യൂറോ പ്രതിവർഷം പ്രതിഫലമായി നൽകാമെന്നാണ് അൽ ഹിലാൽ ഓഫർ ചെയ്തിരിക്കുന്നത്. നിലവിൽ ഏറ്റവുമധികം പ്രതിഫലം വാങ്ങുന്ന ക്രിസ്റ്റ്യാനോ റൊണാൾഡോക്ക് ലഭിക്കുന്നതിന്റെ ഇരട്ടി പ്രതിഫലമാണ് ലയണൽ മെസിക്ക് വാഗ്ദാനം ചെയ്തിരിക്കുന്നത്.
എന്നാൽ ലയണൽ മെസി ഈ വാഗ്ദാനം സ്വീകരിക്കാനുള്ള സാധ്യത കുറവാണ്. യൂറോപ്പിൽ തന്നെ തുടരാനാണ് ലയണൽ മെസിക്ക് താൽപര്യം. അതിനു പുറമെ ബാഴ്സയിലേക്ക് തിരിച്ചു പോകാനും താരം ആഗ്രഹിക്കുന്നു. അതുകൊണ്ടു തന്നെ ഓഫർ മെസി തള്ളുമെന്നുറപ്പാണ്.