ഐപിഎല്ലില്‍ ചരിത്രമെഴുതി വിക്കറ്റ് കീപ്പര്‍ ബാറ്റര്‍ എംഎസ് ധോണി. സണ്‍ റൈസേഴ്സ് ഹൈദെരാബാദിനെതിരായ മത്സരത്തില്‍ രണ്ട് അമ്പരപ്പിക്കുന്ന റെക്കോര്‍ഡുകള്‍ സ്വന്തമാക്കിയാണ് ധോണി ഞെട്ടിച്ചത്.

മത്സരത്തില്‍ നിര്‍ണായകമായ മൂന്ന് പുറത്താക്കലുകളാണ് ധോണി നടത്തിയത്. ഇതോടെ ഐപിഎല്‍ ചരിത്രത്തില്‍ ആദ്യമായി 200 പുറത്താക്കലുകള്‍ നടത്തുന്ന താരമായി ഈ നാല്പത്തിയൊന്നുകാരന്‍ മാറി. കൂടാതെ, ടി20 ക്രിക്കറ്റില്‍ ഏറ്റവും അധികം ക്യാച്ചുകള്‍ എടുക്കുന്ന വിക്കറ്റ് കീപ്പറായും ധോണി റെക്കോര്‍ഡ് സൃഷ്ടിച്ചു.

ഐപിഎല്ലില്‍ ക്യാച്ചുകള്‍, സ്റ്റമ്പിങ്ങുകള്‍, റണ്‍ ഔട്ടുകള്‍ എന്നിവ ചേര്‍ത്താണ് 200 പുറത്താക്കലുകള്‍ നേടുന്ന ആദ്യ ക്രിക്കറ്റ് താരമെന്ന എന്ന റെക്കോര്‍ഡ് ധോണി നേടിയത്.

ഇന്നത്തെ മത്സരത്തില്‍ മാക്രമിന്റെ ക്യാച്ചെടുത്തും മായങ്ക് അഗര്‍വാളിനെ സ്റ്റാമ്പ് ചെയ്തും വാഷിംഗ്ടണ്‍ സുന്ദറിനെ റണ്‍ ഔട്ടിലൂടെയും ധോണി പുറത്താക്കിയിരുന്നു. അതോടൊപ്പം, ഇന്നത്തെ മത്സരത്തില്‍ നേടിയ ക്യാച്ചിലൂടെ വിക്കറ്റ് കീപ്പറായി 208 ക്യാച്ചുകള്‍ എന്ന സംഖ്യയിലേക്ക് താരം എത്തി.

വിക്കറ്റ് കീപ്പറായി 207 ക്യാച്ചുകള്‍ നേടിയ ക്വിന്റണ്‍ ഡി കോക്കിനെയാണ് അദ്ദേഹം മറികടന്നത്. 205 ക്യാച്ചുകളുള്ള ദിനേശ് കാര്‍ത്തിക് പട്ടികയില്‍ മൂന്നാമതാണ്.