ലയണൽ മെസി ബാഴ്സലോണയിലേക്ക് തിരിച്ചു വരുമോയെന്നാണ് ഓരോ മെസി, ബാഴ്സലോണ ആരാധകനും ആകാംക്ഷയോടെ കാത്തിരിക്കുന്നത്. പിഎസ്ജിയിൽ സംതൃപ്തനല്ലാത്ത ലയണൽ മെസി ആരാധകർ കൂടി എതിരായതോടെ ഫ്രാൻസിൽ നിന്നും പോകാനാഗ്രഹിക്കുന്നുണ്ട്. തന്റെ മുൻ ക്ലബായ ബാഴ്സലോണ തന്നെയാണ് അർജന്റീന താരം പ്രധാനമായും ലക്ഷ്യം വെക്കുന്നത്.
സാമ്പത്തിക പ്രതിസന്ധികളുടെ ഇടയിലും ലയണൽ മെസിയെ സ്വന്തമാക്കാനുള്ള പ്രവർത്തനങ്ങൾ നടത്തുമെന്നാണ് ബാഴ്സലോണ നൽകുന്ന സൂചനകൾ. അതേസമയം മെസിയല്ല, മറിച്ച് മറ്റൊരു അർജന്റീന താരത്തെ ടീമിലെത്തിക്കാനാണ് ബാഴ്സലോണ പരിശീലകൻ സാവി ആഗ്രഹിക്കുന്നതെന്ന് സ്പോർട്ട് റിപ്പോർട്ട് ചെയ്യുന്നു. അർജന്റീനക്കൊപ്പം ലോകകപ്പ് നേടിയ യുവാൻ ഫോയ്ത്താണ് ആ താരം.
Xavi has asked Barcelona for a special effort to sign Juan Foyth. However, Villarreal say they are not willing to negotiate on his €60m release clause.
— @sport pic.twitter.com/gumUqIvqOU
— Barça Universal (@BarcaUniversal) April 14, 2023
നിലവിൽ സ്പെയിനിലെ തന്നെ ക്ലബായ വിയ്യാറയലിനു വേണ്ടി കളിക്കുന്ന യുവാൻ ഫോയ്ത്ത് മികച്ച പ്രകടനമാണ് ലീഗിൽ നടത്തുന്നത്. ഒരു പ്രോപ്പർ റൈറ്റ് ബാക്കിനെ ടീമിൽ എത്തിക്കുന്നതിന് വേണ്ടിയാണ് സാവി ഫോയ്ത്തിനെ ലക്ഷ്യമിടുന്നത്. നിലവിൽ റൈറ്റ് ബാക്കായി അരഹോ, കൂണ്ടെ, റോബർട്ടോ എന്നീ താരങ്ങൾ ഉണ്ടെങ്കിലും ഇവരൊന്നും പ്രോപ്പർ റൈറ്റ് ബാക്കുകളല്ല. ഈ സാഹചര്യം ഒഴിവാക്കാനാണ് സാവി ഒരുങ്ങുന്നത്.
അതേസമയം ഫോയ്ത്തിനെ സ്വന്തമാക്കുക ബാഴ്സലോണയെ സംബന്ധിച്ച് വളരെ ബുദ്ധിമുട്ടുള്ള കാര്യമാണ്. താരത്തിന്റെ റിലീസിംഗ് ക്ലോസായ അറുപതു മില്യൺ യൂറോയാണ് വിയ്യാറയൽ ബാഴ്സയോട് ആവശ്യപ്പെടുന്നത്. നിലവിലെ സാഹചര്യത്തിൽ ഈ തുക ബാഴ്സയ്ക്ക് അംഗീകരിക്കാൻ കഴിയില്ല. വിയ്യാറയൽ ചാമ്പ്യൻസ് ലീഗ് യോഗ്യത നേടിയാൽ താരത്തെ ക്ലബ് വിട്ടുകൊടുക്കാനും തയ്യാറാകില്ല.