ഐഎസ്എല്‍ ചാമ്പ്യന്‍മാരായ എടികെ കൊല്‍ക്കത്തയുടെ സൂപ്പര്‍ താരം റോയ് കൃഷ്ണ ക്ലബില്‍ തുടരും. ക്ലബ് വിടാനൊരുങ്ങിയ ഫിജിയന്‍ താരത്തിന് കൂറ്റന്‍ ഓഫര്‍ നല്‍കിയാണ് എടികെ റോയ് കൃഷ്ണയെ പിടിച്ച് നിര്‍ത്തിയത്. പ്രമുഖ മാധ്യമപ്രവര്‍ത്തകന്‍ മാര്‍കസ് മെര്‍ഗുളാനോ ആണ് ഇക്കാര്യം സ്ഥിരീകരിച്ചു.

നേരത്തെ എടികെയില്‍ തുടരാന്‍ താല്‍പര്യമില്ലെന്ന് റോയ് കൃഷ്ണ പരസ്യമായി പറഞ്ഞിരുന്നു. തുടര്‍ന്ന് യൂറോപ്പിലെ ചില ക്ലബുകളും റോയ് കൃഷ്ണയെ നോട്ടമിട്ടിരുന്നു. കൂടാതെ മുംബൈ സിറ്റി അടക്കം രണ്ട് ഐഎസ്എല്‍ ക്ലബുകളും താരത്തിനായി രംഗത്തുണ്ടായിരുന്നു.

കഴിഞ്ഞ ഐഎസ്എല്ലില്‍ എടികെയെ കിരീടവിജയത്തിലെത്തിക്കാന്‍ നിര്‍ണ്ണായക പങ്കാണ് റോയ് കൃഷ്ണ വഹിച്ചത്. 23 മത്സരങ്ങളില്‍ നിന്ന് 15 ഗോളുകളും 6 അസിസ്റ്റും ആണ് സീസണില്‍ റോയ് കൃഷ്ണ നേടിയത്. കിവീസ് ക്ലബായ വെല്ലിങ്ടണ്‍ ഫീനിക്സില്‍ നിന്നായിരുന്നു റോയ് കൃഷ്ണയുടെ ഇന്ത്യയിലേക്കുളള വരവ്.

ഫിജിയ്ക്കായി രാജ്യന്തര ഫുട്ബോളില്‍ 40 മത്സരങ്ങള്‍ കളിച്ചിട്ടുളള റോയ് 29 ഗോളുകളും സ്വന്തമാക്കിയിട്ടുണ്ട്. 2007 മുതല്‍ ഫിജി ടീമില്‍ സ്ഥിരസാന്നിധ്യമാണ് ഈ 32കാരന്‍.