; )
ഒട്ടേറെ വിവാദങ്ങൾ ഉണ്ടാക്കിയാണ് നെയ്‌മർ ആറു വർഷങ്ങൾക്കു മുൻപ് ബാഴ്‌സലോണ വിട്ടത്. ലയണൽ മെസിക്ക് ശേഷം ക്ലബിന്റെ പ്രധാന താരമാകുമെന്ന് ഏവരും പ്രതീക്ഷിച്ച നെയ്‌മർ പക്ഷെ റെക്കോർഡ് തുകയുടെ ട്രാൻസ്‌ഫറിൽ പിഎസ്‌ജിയിലേക്ക് ചേക്കേറി. താരത്തെ ക്ലബിൽ നിലനിർത്താൻ പലരും ശ്രമിച്ചെങ്കിലും തന്റെ തീരുമാനത്തിൽ ഉറച്ചു നിന്ന് ബാഴ്‌സലോണ വിടുകയാണ് താരം ചെയ്‌തത്‌.
പിഎസ്‌ജിയിലേക്ക് ചേക്കേറാനുള്ള തന്റെ തീരുമാനത്തിൽ നെയ്‌മർ പിന്നീട് നിരാശപ്പെട്ടിരുന്നു. ബാഴ്‌സലോണയിലേക്ക് തിരിച്ചെത്താനുള്ള ആഗ്രഹം താരം പലപ്പോഴും പ്രകടിപ്പിക്കുകയും ചെയ്‌തിട്ടുണ്ട്‌. എന്നാൽ പിഎസ്‌ജി താരത്തെ അപ്പോഴൊന്നും വിട്ടുകൊടുക്കാൻ തയ്യാറായില്ല. എന്നാൽ നെയ്‌മറും ബാഴ്‌സലോണയും തമ്മിലുള്ള ബന്ധം സുദൃഢമായി നിലനിൽക്കുന്നു എന്നാണു ഇപ്പോൾ മനസിലാക്കാൻ കഴിയുന്നത്.
Neymar was reportedly a ‘surprise guest’ at Barcelona’s La Liga title winning celebrationshttps://t.co/QBJcTWCDRZ
— talkSPORT (@talkSPORT) May 15, 2023
ജെറാർഡ് റൊമേറോയുടെ റിപ്പോർട്ടുകൾ പ്രകാരം കഴിഞ്ഞ ദിവസം നടന്ന ബാഴ്‌സലോണയുടെ ലീഗ് കിരീടനേട്ടങ്ങളുടെ ആഘോഷത്തിൽ ബ്രസീലിയൻ താരവും പങ്കാളിയായിരുന്നു. എസ്പാന്യോളിനെതിരെ നടന്ന ലീഗ് മത്‌സരത്തിൽ രണ്ടിനെതിരെ നാല് ഗോളുകൾക്ക് വിജയം നേടിയതിനു പിന്നാലെയാണ് ബാഴ്‌സലോണ ലീഗ് കിരീടം സ്വന്തമാക്കിയത്.
ലീഗ് കിരീടം നേടിയതിനു ശേഷം ബാഴ്‌സലോണ ഓപ്പൺ ബസ് പരേഡും അതിനു ശേഷം നൈറ്റ് ക്ലബിൽ ആഘോഷവും നടത്തിയിരുന്നു. നൈറ്റ് ക്ലബിലെ ആഘോഷത്തിലാണ് നെയ്‌മർ എത്തിയത്. ബാഴ്‌സലോണ ക്ഷണിച്ചതിനെ തുടർന്നാണ് താരം എത്തിയത്. രഹസ്യമായാണ് താരം എത്തിയത് എന്നതിനാൽ തന്നെ അതിന്റെ ചിത്രങ്ങൾ പോലും പുറത്തു വന്നിട്ടില്ല.
അതേസമയം ബാഴ്‌സലോണക്ക് നെയ്മറെ സ്വന്തമാക്കാൻ യാതൊരു താല്പര്യവും ഇല്ല. ആഗ്രഹം ഉണ്ടെങ്കിൽ പോലും പിഎസ്‌ജിയുമായി കരാറുള്ള താരത്തെ സ്വന്തമാക്കാൻ അവർക്ക് കഴിയുകയുമില്ല. നിലവിൽ ലയണൽ മെസിയെ ടീമിലെത്തിക്കാനാണ് ബാഴ്‌സലോണ ഒരുങ്ങുന്നത്.