കോപ്പ ഡെൽ റെയിൽ കഴിഞ്ഞ ദിവസം നടന്ന മത്സരം ബാഴ്സലോണ ആരാധകരെ സംബന്ധിച്ച് നിരാശപ്പെടുത്തുന്ന ഒന്നായിരുന്നു. ആദ്യപാദത്തിൽ ബാഴ്സലോണ എതിരില്ലാത്ത ഒരു ഗോളിന് വിജയം നേടിയെങ്കിലും രണ്ടാം പാദത്തിൽ നാല് ഗോളുകൾ തിരിച്ചടിച്ച് റയൽ മാഡ്രിഡ് ഫൈനലിലേക്ക് മുന്നേറുകയായിരുന്നു. ഇതോടെ ഡൊമസ്റ്റിക് ഡബിൾ സ്വന്തമാക്കാമെന്ന ബാഴ്സയുടെ പ്രതീക്ഷകൾ പൂർണമായും ഇല്ലാതായി.
അതേസമയം ബാഴ്സലോണ ആരാധകർക്ക് സന്തോഷം നൽകുന്ന മറ്റൊരു കാര്യം ഇന്നലെ നടന്ന മത്സരത്തിൽ സംഭവിച്ചു. മത്സരത്തിനിടെ ലയണൽ മെസിക്ക് വേണ്ടി ക്യാമ്പ് നൂവിൽ ആരാധകർ ആർപ്പുവിളികൾ ഉയർത്തി. ലയണൽ മെസി പിഎസ്ജി വിടുമെന്ന അഭ്യൂഹങ്ങൾ ശക്തമായ സാഹചര്യത്തിലാണ് ബാഴ്സലോണ ആരാധകർ താരത്തെ തിരിച്ചെത്തിക്കണം എന്നാവശ്യപ്പെട്ടത്.
Barcelona fans are chanting Lionel Messi’s name during El Clasico after rumours about his potential return 👀 pic.twitter.com/NE7oeL2Nz5
— SPORTbible (@sportbible) April 5, 2023
മത്സരത്തിന്റെ പത്താമത്തെ മിനുട്ടിലായിരുന്നു ലയണൽ മെസിക്കായി ആരാധകർ ചാന്റ് നടത്തിയത്. ലയണൽ മെസിയുടെ പത്താം നമ്പർ ജേഴ്സി പ്രതീകമായി കാണിച്ചാണ് ആ സമയം ആരാധകർ തിരഞ്ഞെടുത്തത്. ക്യാമ്പ് നൂ മുഴുവൻ മെസിയുടെ പേര് ഉച്ചത്തിൽ ഉയർന്നത് അർജന്റീന താരത്തിന്റെ തിരിച്ചുവരവിനായി ആരാധകർ എത്രത്തോളം ആഗ്രഹിക്കുന്നുണ്ട് എന്നതിന്റെ തെളിവു കൂടിയാണ്.
ലയണൽ മെസി ഈ സീസണോടെ പിഎസ്ജി വിടാനുള്ള സാധ്യത വളരെ അധികമാണ്. ഫ്രാൻസിൽ മെസിക്ക് ആവശ്യത്തിനുള്ള സ്വാതന്ത്ര്യം ലഭിക്കുന്നില്ലെന്നതും ചാമ്പ്യൻസ് ലീഗിൽ നിന്നും പുറത്തു പോയതോടെ മെസിക്കെതിരെ പിഎസ്ജി ആരാധകർ തിരിഞ്ഞതുമെല്ലാം ഇതിനു കാരണമാണ്. ക്ലബ് മുന്നോട്ടു വെച്ച ഓഫർ മെസി ഇതുവരെ സ്വീകരിക്കാനും തയ്യാറായിട്ടില്ല.
അതേസമയം മെസിയെ തിരിച്ചു കൊണ്ടുവരാൻ ബാഴ്സലോണ ശ്രമം നടത്തുന്നുണ്ട്. ക്ലബ് സാമ്പത്തികപ്രതിസന്ധിയിലൂടെയാണ് കടന്നു പോകുന്നതെങ്കിലും സ്പോൺസർഷിപ്പ് ഡീലുകൾ വെച്ച് അതിനെ മറികടക്കാൻ കഴിയുമോയെന്നാണ് ബാഴ്സലോണ നേതൃത്വം അന്വേഷിച്ചു കൊണ്ടിരിക്കുന്നത്.