ചാമ്പ്യൻസ്ലീഗ് മത്സരങ്ങൾക്ക് മുന്നോടിയായി എതിരാളികൾക്ക് മുന്നറിയിപ്പുമായി രംഗത്തെത്തിയിരിക്കുകയാണ് യുവന്റസ് ഗോൾകീപ്പറായ വോയ്ചെക് ഷെസ്നി. ക്രിസ്ത്യാനോ റൊണാൾഡൊയുടെ മികവിൽ മറ്റൊരു ചാമ്പ്യൻസ്ലീഗ് തിരിച്ചുവരവിനൊരുങ്ങുകയാണ് യുവന്റസെന്നാണ് ഷെസ്നി ലിയോണിന് മുന്നറിയിപ്പ് കൊടുക്കുന്നത്.
വരുന്ന വെള്ളിയാഴ്ച ചാമ്പ്യൻസ് ലീഗിൽ യുവന്റസിനു ഒളിമ്പിക് ലിയോണൈസുമായി സ്വന്തം തട്ടകത്തിൽ വെച്ചാണ് പ്രീക്വാർട്ടർ രണ്ടാം പാദമത്സരം നടക്കുന്നത്. ആദ്യ പാദത്തിൽ ലിയോൺ സ്വന്തം തട്ടകത്തിൽ എതിരില്ലാത്ത ഒരു ഗോളിനു യുവന്റസിനെ തകർത്തിരുന്നു. ഇതിനെതിരെ മികച്ച തിരിച്ചു വരവിനാണ് യുവന്റസ് ഒരുങ്ങുന്നത്. ഗോളാടിയന്ത്രമായ ക്രിസ്ത്യാനോ റൊണാൾഡോയുടെ അത്ലറ്റികോക്കെതിരെ അടിച്ചത് പോലെയുള്ള ഹാട്രിക്ക് പ്രതീക്ഷിക്കാമെന്നാണ് ഷെസ്നി മുന്നറിയിപ്പ് നൽകുന്നത്.
“എന്റെ ടീം റെഡിയാണ്, കഴിഞ്ഞ വർഷത്തെ അത്ലറ്റിക്കോക്കെതിരെയുള്ള മത്സരത്തിനു സമാനമായ സാഹചര്യമാണ് നിലവിലുള്ളത്, ഞങ്ങൾക്കത് ഈ വർഷവും സാധിക്കും. മറ്റൊരു റൊണാൾഡോ ഹാട്രിക്? ക്രിസ്ത്യാനോക്കത് സാധിക്കുമെന്ന് ലോകത്തിലാർക്കും സംശയമില്ലാത്ത ഒന്നാണ്. നിർണായകമായ സമയത്ത് പ്രതിസന്ധികളെ അതിജീവിക്കാനുള്ള കഴിവ് അദ്ദേഹത്തിൽ കാണാൻ കഴിയും.”
“മറ്റൊരു മഹാത്ഭുതത്തിനു അദ്ദേഹം തയ്യാറാണ്. സുപ്രധാനമായ ഒരു ലക്ഷ്യത്തിനു വേണ്ടിയാണു ഞങ്ങൾ കളിക്കാനിറങ്ങുന്നത്. പ്രചോദനം ലഭിക്കാൻ അത്ര ബുദ്ദിമുട്ടില്ല. ഞങ്ങൾ ഏകാഗ്രരാണ്. ലിയോൺ ആരോഗ്യപരമായി നല്ല നിലയിലാണുള്ളത്. ഞങ്ങളും കളിക്കുന്നതിനു തയ്യാറാണ്. നമുക്ക് കാണാം ആരാണ് ക്വാർട്ടർ ഫൈനലിലെത്തുക എന്നത്.” മികച്ച ഗോൾകീപ്പർക്കുള്ള സീരി എ അവാർഡ് നേടിയ ഷെസ്നി വ്യക്തമാക്കി.