; )
ഐപിഎല്ലില്‍ പഞ്ചാബ് കിംഗ്‌സിനായി മികച്ച പ്രകടനം കാഴ്ച്ചവെച്ച യുവതാരം അശുതോഷ് ശര്‍മ്മയെ പ്രശംസ കൊണ്ട് മൂടി മുംബൈ ഇന്ത്യന്‍സ് നായകന്‍ ഹാര്‍ദ്ദിക്ക് പാണ്ഡ്യ. അശുതോഷ് അവിശ്വസനീയ പ്രകടനമാണ് കാഴ്ച്ചവെച്ചതെന്നും അവന് ഭാവി താരമാണെന്ന് ഉറപ്പാണെന്നും ഹാര്‍ദ്ദിക്ക് വിലയിരുത്തുന്നു മത്സര ശേഷം സംസാരിക്കുകയായിരുന്നു മുംബൈ ഇന്ത്യന്‍സ് നായകന്‍.
‘അവിശ്വസനീയ ബാറ്റിംഗ് പ്രകടനമാണ് അശുതോഷ് കാഴ്ചവെച്ചത്. മത്സരത്തിലേക്ക് എത്തിയ ഉടന്‍തന്നെ ഇത്തരത്തില്‍ വലിയ ഇന്നിംഗ്‌സ് കാഴ്ചവെക്കാന്‍ അവന് സാധിച്ചു. നേരിട്ട എല്ലാ പന്തുകളും അവന്റെ ബാറ്റിന്റെ മധ്യ ഭാഗത്ത് തന്നെ കൊള്ളുന്നുണ്ടായിരുന്നു’ ഹാര്‍ദ്ദിക്ക് പറയുന്നു.
അശുതോഷിന്റെ പ്രകടനത്തില്‍ വലിയ സന്തോഷമുണ്ടെന്നും അവന് ഒരു ഭാവി താരമാണ് എന്നത് ഉറപ്പാണെന്നും ഹാര്‍ദ്ദിക്ക് വിലയിരുത്തുന്നു. മത്സരത്തെ കുറിച്ചും ഹാര്‍ദ്ദിക്ക് വാചാലനായി.
‘എന്നെ സംബന്ധിച്ച് ക്രിക്കറ്റിലെ വളരെ നല്ലൊരു മത്സരമാണ് ഇവിടെ നടന്നത്. എല്ലാവരുടെയും പക്വതയും മറ്റും ഇവിടെ പരീക്ഷിച്ചു കഴിഞ്ഞു. ഈ മത്സരത്തില്‍ പലരുടെയും കൃത്യമായ സ്വഭാവ വിശേഷങ്ങള്‍ പരീക്ഷിക്കപ്പെടും എന്ന് ഞാന്‍ മത്സരത്തിന് മുന്‍പ് തന്നെ പറഞ്ഞിരുന്നു. പല സമയത്തും മത്സരത്തില്‍ മുന്‍പില്‍ ഞങ്ങളാണ് എന്ന രീതിയില്‍ ചിന്തകള്‍ വന്നിരുന്നു. എന്നാല്‍ നമുക്കെല്ലാവര്‍ക്കും അറിയാവുന്ന ഒരു കാര്യമുണ്ട്. ഇന്ത്യന്‍ പ്രീമിയര്‍ ലീഗ് ഇത്തരം മത്സരങ്ങള്‍ വരുന്ന ഒരു ടൂര്‍ണമെന്റ് ആണ്’ പാണ്ഡ്യ പറയുന്നു.
‘മത്സരത്തില്‍ എത്ര മികച്ച നിലയിലാണെങ്കിലും നമ്മള്‍ വിജയത്തെപ്പറ്റി തന്നെ ചിന്തിക്കണം എന്ന് ടൈം ഔട്ട് സമയത്ത് ഞാന്‍ പറഞ്ഞിരുന്നു. അതിനാല്‍ മത്സരത്തില്‍ പൂര്‍ണമായും ശ്രദ്ധിക്കാന്‍ സാധിച്ചു. ചില ഓവറുകളില്‍ വളരെ മൃദുവായിട്ടാണ് ഞങ്ങള്‍ മുന്‍പോട്ടു പോയത്. എന്നിരുന്നാലും വിജയം വിജയം തന്നെയാണ്’ ഹര്‍ദിക്ക് കൂട്ടിച്ചേര്‍ക്കുന്നു.