; )
ഐപിഎല്ലില്‍ മുംബൈ ഇന്ത്യന്‍സിനേയും തോല്‍പിച്ച് രാജസ്ഥാന് റോയല്‍സ് കുതിക്കുന്നതിനിടെ നായകന്‍ സഞ്ജു സാംസണിനെ വാഴ്ത്തി മുന്‍ ഓസ്‌ട്രേലിയന്‍ നായകന്‍ ആരോണ്‍ ഫിഞ്ച്. സഞ്ജുവിന് ഈഗോ ഇല്ലെന്നും ടീമിനായി പക്വതയാര്‍ന്ന പ്രകടനമാണ് പുറത്തെടുക്കുന്നതെന്നും ഫിഞ്ച് വിലയിരുത്തുന്നു.
‘സഞ്ജു വളരെ പക്വതയോടെയയുള്ള പ്രകടനമാണ് ഇന്നലെ മുംബൈക്കെതിരെ പുറത്തെടുത്തത്. ടീമിന് വേണ്ടതും അത് തന്നെയാണ്. ടി20 ക്രിക്കറ്റില്‍ ചിലപ്പോഴെങ്കിലും ബാറ്ററുടെ ഈഗോ ടീമിന്റെ ലക്ഷ്യത്തിന് തടസമാവാന്‍ സാധ്യതയുണ്ട്. എന്നാല്‍ ഓരോ സാഹചര്യത്തിലും ടീമിന് എന്താണോ വേണ്ടത് അതിന് അനുസരിച്ചാണ് സഞ്ജു ഇപ്പോള്‍ കളിക്കുന്നത്’ ആരോണ്‍ ഫിഞ്ച് സ്റ്റാര്‍ സ്‌പോര്‍ട്‌സിലെ ചര്‍ച്ചയില്‍ പറഞ്ഞു.
‘ഈ സീസണില്‍ രാജസ്ഥാനെ അവിശ്വസനീയമായ രീതിയിലാണ് സഞ്ജു നയിക്കുന്നത്. എത്ര സമ്മര്‍ദ്ദത്തിലായാലും അവര്‍ എത്ര ശാന്തരായാണ് അതിനെയെല്ലാം മറികടക്കുന്നത്. ഗുജറാത്ത് ടൈറ്റന്‍സിനെതിരെ മാത്രമാണ് അവര്‍ സമ്മര്‍ദ്ദത്തില്‍ വീണുപോയത്. ഈ സീസണില്‍ രാജസ്ഥാന്റെ വിജയങ്ങളെല്ലാം ആധികാരികമായിരുന്നു. അതിനുള്ള ഫുള്‍ ക്രെഡിറ്റും സഞ്ജുവിനാണ്’ ആരോണ്‍ ഫിഞ്ച് കൂട്ടിച്ചേര്‍ത്തു.
സീസണില്‍ എട്ട് മത്സരങ്ങളില്‍ ഏഴ് ജയവും 14 പോയന്റുമായി പ്ലേ ഓഫിന് തൊട്ടടുത്താണ് രാജസ്ഥാന് റോയല്‍സ് ഇപ്പോള്‍. എട്ട് മത്സരങ്ങളില്‍ 314 റണ്‍സടിച്ച സഞ്ജു റണ്‍വേട്ടക്കാരുടെ ലിസ്റ്റില്‍ നാലാം സ്ഥാനത്തുണ്ട്. എട്ട് കളികളില്‍ 14 പോയന്റുള്ള രാജസ്ഥാന് പ്ലേ ഓഫ് ഉറപ്പിക്കാന്‍ അടുത്ത ആറ് മത്സരങ്ങളില്‍ ഒരു ജയം കൂടി മതിയാവും.