Tag Archive: Iniesta

  1. മെസിക്ക് കൂട്ടായി ഇനിയേസ്റ്റയും എത്തിയേക്കും, വമ്പൻ പദ്ധതിയുമായി ഇന്റർ മിയാമി

    Leave a Comment

    ഇന്റർ മിയാമിയിലേക്കുള്ള ലയണൽ മെസിയുടെ ട്രാൻസ്‌ഫർ ആരാധകരെ ഞെട്ടിച്ച ഒന്നായിരുന്നു. ഇനിയും യൂറോപ്പിൽ കുറച്ചു വർഷങ്ങൾ കൂടി മികച്ച ഫോമിൽ കളിക്കാൻ കഴിയുമെന്നിരിക്കെയാണ് ലയണൽ മെസി ഇന്റർ മിയാമിയിലേക്ക് ചേക്കേറിയത്. കരിയറിൽ എല്ലാ നേട്ടങ്ങളും സ്വന്തമാക്കിയ മെസി കുടുംബത്തെ പരിഗണിച്ചാണ് ഇന്റർ മിയാമിയിൽ എത്തിയത്.

    ലയണൽ മെസി ഇന്റർ മിയാമിയിലേക്ക് ചേക്കേറിയതിനു പിന്നാലെ താരത്തിനൊപ്പം കളിച്ചിരുന്ന നിരവധി താരങ്ങളും ക്ലബിലെത്തുമെന്ന വാർത്തകളുണ്ട്. മുൻ ബാഴ്‌സലോണ താരങ്ങളായ ബുസ്‌ക്വറ്റ്സ്, ജോർദി ആൽബ എന്നിവരും മുൻ റയൽ മാഡ്രിഡ് നായകൻ സെർജിയോ റാമോസുമാണ് ഇന്റർ മിയാമിയിലേക്ക് ചേക്കേറുന്നത്. ഇതിൽ ബുസ്‌ക്വറ്റ്സ് ക്ലബിലെത്തുമെന്ന് ഉറപ്പിച്ചിട്ടുണ്ട്.

    അതിനിടയിൽ അപ്രതീക്ഷിതമായൊരു നീക്കം കൂടി ഇന്റർ മിയാമിയുടെ ഭാഗത്തു നിന്നും ഉണ്ടാകാൻ സാധ്യതയുണ്ടെന്ന റിപ്പോർട്ടുകളും പുറത്തു വരുന്നുണ്ട്. ലയണൽ മെസിയുടെ മറ്റൊരു മുൻ സഹതാരം ആന്ദ്രെസ് ഇനിയേസ്റ്റയെ ടീമിലെത്തിക്കാനുള്ള പദ്ധതിയാണ് ഇന്റർ മിയാമിക്കുള്ളത്. മെസിക്കൊപ്പം നിരവധി വർഷങ്ങൾ ഒരുമിച്ചു കളിച്ച ഇനിയേസ്റ്റക്കായി ഇന്റർ മിയാമി ഓഫർ നൽകിയിട്ടുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്.

    ബാഴ്‌സലോണ കരിയർ അവസാനിച്ചതിനു ശേഷം ജാപ്പനീസ് ക്ലബായ വീസൽ കൊബെയിലാണ് ഇനിയേസ്റ്റ കളിച്ചിരുന്നത്. അഞ്ചു വർഷം അവർക്ക് വേണ്ടി കളിച്ച താരം ക്ലബ് വിട്ടെങ്കിലും ഇപ്പോഴും ഫുട്ബോൾ കരിയർ അവസാനിപ്പിക്കാനുള്ള തീരുമാനം എടുത്തിട്ടില്ല. മുപ്പത്തിയൊൻപതുകാരനായ താരത്തിന്റെ അവസാനത്തെ ആട്ടം ലയണൽ മെസിക്കൊപ്പം ആയിരിക്കുമോയെന്നാണ് ആരാധകർ ഉറ്റു നോക്കുന്നത്,

  2. മെസിയും സാവിയും ഇനിയേസ്റ്റയും എന്റെ കണ്ണുകൾ തുറപ്പിച്ചു,വെളിപ്പെടുത്തലുകളുമായി ക്രിസ്ത്യൻ പുലിസിച്ച്

    Leave a Comment

    പ്രീമിയർ ലീഗിൽ ചെൽസിക്കൊപ്പം മികച്ച പ്രകടനം നടത്തുന്ന പുതിയ താരമാണ് അമേരിക്കൻ സൂപ്പർതാരം ക്രിസ്ത്യൻ പുലിസിച്ച്. ഈഡൻ ഹാസർഡ് റയൽ മാഡ്രിഡിലേക്ക് ചേക്കേറിയപ്പോൾ ചെൽസി പകരക്കാരനായി കണ്ടെത്തിയത് ബൊറൂസിയ ഡോർട്മുണ്ടിൽ തകർത്തു കളിക്കുന്ന ക്രിസ്ത്യൻ പുലിസിച്ചിനെയാണ്. ചെൽസിയിലെത്തിയതിനു ശേഷം ഈ സീസണിന്റെ തുടക്കത്തിൽ മികച്ച പ്രകടനം കാഴ്ച വെച്ചുവെങ്കിലും പരിക്കിന്റെ പിടിയിലകപ്പെടുകയായിരുന്നു.

    2016ലാണ് ബൊറൂസിയ ഡോർട്മുണ്ടിനു വേണ്ടി പതിനേഴുകാരൻ പുലിസിച്ച് ജർമൻ ഫുട്ബോളിൽ അരങ്ങേറുന്നത്. പിന്നീട് ഒരു വർഷത്തിനു ശേഷം ബൊറൂസിയ ഡോർട്ട്മുണ്ടിനായി ഡിഎഫ്ബി പൊകൽ കിരീടം നേടിക്കൊടുക്കാനും താരത്തിനു സാധിച്ചിരുന്നു. പിന്നീട് ചെൽസിയിലേക്ക് ചേക്കേറിയതിനു ശേഷം താരം ഹാസാർഡിന്റെ തന്നെ ഒരു മറ്റൊരു കളി മെനയുന്ന വേഗതയുള്ള താരമായി ചെൽസിയിൽ ഉയർന്നു വരാൻ താരത്തിനു സാധിച്ചിരുന്നു.

    അമേരിക്കൻ മാധ്യമമായ ജിക്യു മാഗസിനു നൽകിയ അഭിമുഖത്തിൽ സ്വന്തം ഫുട്ബോൾ ജീവിതത്തെക്കുറിച്ച് പുലിസിച്ച് മനസു തുറന്നിരുന്നു. ഫുട്ബോൾ കരിയറിന്റെ തുടക്കത്തിൽ ഉയരക്കമ്മിയെക്കുറിച്ച് ഒരുപാട് വേവലാതിപ്പെട്ടിരുന്നുവെന്നു പുലിസിച്ച് വ്യക്തമാക്കി. എന്നാൽ തന്നെ വലിയ രീതിയിൽ സ്വാധീനിച്ചത് ഉയരം താരതമ്യേനെ കുറഞ്ഞ ഇനിയേസ്റ്റയുടെയും സാവിയുടെയും സാക്ഷാൽ ലയണൽ മെസിയുടെയും കളിമികവായിരുന്നുവെന്നും പുലിസിച്ച് അഭിമുഖത്തിൽ പറഞ്ഞു.

    “ഞാൻ വളരെ മെലിഞ്ഞതും ഉയരം കുറഞ്ഞതുമായ ഒരു ചെറുപ്പക്കാരനായിരുന്നു. എന്നാൽ വളർന്നു വന്നത് കുറേ കാലങ്ങളായി തലയുയർത്തി നിന്നിരുന്ന ബാഴ്‌സലോണയെ പിന്തുടർന്നു കൊണ്ടായിരുന്നു. അവർക്ക് മെസിയും ഇനിയേസ്റ്റയേയും സാവിയുമല്ലാതെ മികച്ച താരങ്ങൾ കൂടുതലില്ലായിരുന്നു. എന്നാൽ ഞാൻ അപ്പോഴാണ് ഞാൻ ചിന്തിക്കുന്നത് ; വൗ.. നമ്മൾ അത്ര വലുതാവേണ്ട കാര്യമൊന്നുമില്ല, ഫുട്ബോൾ കളിക്കാൻ പ്രത്യേകിച്ച് ശരീരപ്രകൃതി നിർബന്ധമൊന്നുമില്ലല്ലോ എന്ന്. ” പുലിസിച്ച് പറഞ്ഞു.

  3. ഒടുവിൽ ബാഴ്സയിൽ ഇനിയെസ്റ്റയുടെ ക്ലോണിനെ കണ്ടെത്തി ലയണൽ മെസി

    Leave a Comment

    ബാഴ്സ മധ്യനിരയിലെ എക്കാലത്തെയും വലിയ നഷ്ടമായാണ്  ഇനിയേസ്റ്റയുടെയും സാവിയുടെയും ബാഴ്സയിൽ നിന്നുള്ള കൊഴിഞ്ഞുപോക്ക് ബാഴ്സ ആരാധകർ  വിശേഷിപ്പിക്കുന്നത്. ഇനിയേസ്റ്റയും സാവിയും മധ്യനിരയിൽ നിന്നും പോയതോടെ സൂപ്പർതാരം ലയണൽ മെസിക്ക് മധ്യനിരകൂടി കൂടുതൽ ശ്രദ്ധിക്കേണ്ട സാഹചര്യവും ഉണ്ടായിട്ടുണ്ട്.  മെസിയുടെ പ്രിയതാരങ്ങളായ നെയ്മറും സുവാരസും നഷ്ടപ്പെട്ടിരിക്കുകയാണ്.

    എന്നാൽ  ബാഴ്സ മധ്യനിരയിൽ ഒരു  പുതിയയുവപ്രതിഭയുടെ പ്രകടനം മെസിക്ക് പുതുജീവൻ നൽകിയിരിക്കുകയാണ്. പെഡ്രോ ഗോൺസാലസ് എന്ന പതിനെട്ടുകാരൻ പെഡ്രിയുടെ ബാഴ്സ മധ്യനിരയിലെ മാന്ത്രിക ടച്ചുകളാണ് ഇന്നു ആരാധകർക്കിടയിൽ ചർച്ചയാവുന്നത്. ബാഴ്സക്ക് മറ്റൊരു ഇനിയേസ്റ്റയെ തിരിച്ചു കിട്ടിയ പ്രതീതിയാണ് ഉയർന്നു വന്നിട്ടുള്ളത്. ഇത്രയും ചെറു പ്രായത്തിൽ തന്നെ മെസിയുമായുള്ള കളിക്കളത്തിലെ ഒത്തിണക്കമാണ് ആ പ്രസ്താവനക്ക് ഉദാഹരണമായി ആരാധകർ ചൂണ്ടിക്കാണിക്കുന്നത്.

    ബാഴ്സയിൽ മെസിയും ഇനിയെസ്റ്റയും കാണിച്ചിരുന്ന ഒരു ആത്മബന്ധവും ഫുട്ബോളിലെ ബുദ്ധിവൈഭവവും പെഡ്രി-മെസി കൂട്ടുകെട്ടിലും നമുക്ക് കാണാനാവും. പതിനെട്ടാം വയസിൽ തന്നെ ആദ്യ സീസണിൽ തന്നെ ഇത് കളിക്കളത്തിൽ കാണാൻ കഴിഞ്ഞതാണ് ഫുട്ബോൾ പണ്ഡിതരെയും അത്ഭുതപ്പെടുത്തുന്നത്. ഇനിയേസ്റ്റയെ ബാഴ്‌സയിലേക്ക് കണ്ടെത്തിയ ആൽബർട്ട് ബെനൈഗസിനു പറയാനുള്ളതും ഇതു തന്നെയാണ്.

    ” അവൻ ഒരു ബുദ്ധിശാലിയാണ്‌. വളരെയധികം സാങ്കേതികതയുള്ള താരമാണ്. അധികം ആക്രമണത്തിൽ ശ്രദ്ധ കൊടുക്കാത്ത താരമാണെങ്കിലും അവൻ നല്ല കഠിനാധ്വാനിയുമാണ്. അങ്ങനെ ചിന്തിക്കുകയാണെങ്കിൽ അവനിൽ നമുക്ക് ഇനിയെസ്‌റ്റയെ കാണാനാനാവും. മനുഷ്യരെന്ന രീതിയിലെന്ന പോലെയും അവർ സദൃശ്യരാണ്. ടീമംഗങ്ങളുമായുള്ള അവരുടെ ഒത്തിണക്കവും നമുക്ക് കാണാനാകും. ” ബെനൈഗസ് പറഞ്ഞു

  4. സാവിയും ഇനിയേസ്റ്റയും പോയതാണ് മെസിയ്ക്ക് തിരിച്ചടിയായത്, തുറന്ന് പറഞ്ഞ് ബാഴ്‌സ താരം

    Leave a Comment

    ബാഴ്സയുടെ മിഡ്‌ഫീൽഡ് ഇതിഹാസങ്ങളായ സാവിയും ഇനിയേസ്റ്റയും ക്ലബ് വിട്ടതാണ് മെസ്സിയുടെ പ്രകടനങ്ങളുടെ മൂർച്ച കുറയാൻ കാരണമെന്നു വെളിപ്പെടുത്തിയിരിക്കുകയാണ് മുൻ ബാഴ്സ-അർജന്റൈൻ താരമായ കാർലോസ് ഹെരെഡിയ. കഡീപോർട്ടീവോ റേഡിയോക്ക് നൽകിയ അഭിമുഖത്തിലാണ് അദ്ദേഹം മെസ്സിയുടെ പ്രകടനത്തെ കുറിച്ച് അഭിപ്രായപ്പെട്ടത്.

    ഇരുവരും ക്ലബ് വിട്ടതിന് ശേഷം ആ പഴയ മെസ്സിയെ ഇതുവരെ കാണാനായിട്ടില്ലെന്നും അദ്ദേഹം ചൂണ്ടിക്കാണിക്കുന്നു. ബാഴ്സയുടെ സുവർണ്ണകാലഘട്ടത്തിലെ നട്ടെല്ലായിരുന്നു മെസ്സി-സാവി-ഇനിയേസ്റ്റ സഖ്യം. 2015-ൽ 17 വർഷങ്ങൾക്ക് ശേഷം സാവി അൽ സാദിലേക്ക് ചേക്കേറുകയും തുടർന്ന് 2018-ൽ ഇനിയേസ്റ്റ ജപ്പാൻ ക്ലബ്‌ ആയ വിസെൽ കോബെയിലേക്കും പോയതോടെ പഴയ മെസ്സിയെ കാണാൻ കഴിഞ്ഞിട്ടില്ലെന്നാണ് ഹെരെഡിയയുടെ പക്ഷം.

    “സാവിയും ഇനിയേസ്റ്റയും പോയതിന് ശേഷം ആ പഴയ മെസ്സിയെ കാണാൻ സാധിച്ചിട്ടില്ല. ആ കാലഘട്ടത്തിൽ അദ്ദേഹം കളിച്ചതുപോലെയുള്ള മത്സരം പിന്നീട് എനിക്ക് കാണാനായിട്ടില്ല. നിലവിൽ മെസ്സി സ്വതസിദ്ധമായ ശൈലിയിലാണ് കളിക്കുന്നത്. അദ്ദേഹം തന്നെ ഗോളുകൾ നേടുന്നു, ഫ്രീകിക്ക് എടുക്കുന്നു.

    യൂറോപ്പിലെതന്നെ മഹത്തായ ഒരു ക്ലബ്ബിനെ അദ്ദേഹം ഒറ്റക്ക് ചുമലിലേറ്റുകയാണ്. മെസ്സിയില്ലെങ്കിൽ ബാഴ്സക്ക് കളിക്കാൻ കഴിയില്ലെന്ന അവസ്ഥയാണുള്ളത്. പതിമൂന്നാം വയസ്സ് വളർന്ന ക്ലബ്ബിനെ മെസ്സി ഉപേക്ഷിച്ചു പോവുമെന്ന് ഞാൻ കരുതുന്നില്ല. മെസ്സി ബാഴ്സയിൽ തന്നെ തുടരണം, ഏറ്റവും മികച്ച മെസിയെ കാണാൻ ആഗ്രഹിക്കുന്നുമുണ്ട്. അതിന് വേണ്ടി ബാഴ്സ ബോർഡ് ഒരുപാട് പണം ചിലവഴിക്കേണ്ടി വരും. മെസ്സി എന്താണോ ആവിശ്യപ്പെടുന്നത് അത് നൽകാൻ ബാഴ്സ ബാധ്യസ്ഥരാണ് ” അദ്ദേഹം സ്പാനിഷ് മാധ്യമമായ മാർക്കയോട് പറഞ്ഞു.