പന്തിനെ വിട്ടുകളഞ്ഞപ്പോള്‍ ലോകകപ്പ് നഷ്ടപ്പെട്ടതായാണ് തോന്നിയത്, ടിം സൗത്തി പറയുന്നു
ലോകക്രിക്കറ്റില്‍ ഇന്ത്യന്‍ വിക്കറ്റ് കീപ്പര്‍ ബാറ്റ്‌സ്മാന്‍ റിഷഭ് പന്തിന്റെ പ്രാധാന്യം എത്രത്തോളമുണ്ടെന്ന് വ്യക്തമാക്കി ന്യൂസിലന്‍ഡ് പേസര്‍ ടിം സൗത്തിയുടെ വാക്കുകള്‍. ലോക ടെസ്റ്റ് ചാമ്പ്യന്‍ഷിപ്പ് ഫൈനലില്‍ റിഷഭ് പന്തിന്റെ ക്യാച്ച് നിലത്തിട്ടപ്പോള്‍ ലോകകപ്പ് തന്നെ കൈവിട്ടതായി തോന്നിയെന്നാണ് ടിം സൗത്തി പറയുന്നത്.
ഫൈനലില്‍ ഇന്ത്യയുടെ രണ്ടാം ഇന്നിംഗ്‌സില്‍ അഞ്ച് റണ്‍സില്‍ നില്‍ക്കെയാണ് ജയ്മിസന്റെ പന്തില്‍ റിഷഭ് പന്ത് നല്‍കിയ അനായാസ ക്യാച്ച് രണ്ടാം സ്ലിപ്പില്‍ സൗത്തി കൈവിട്ടത്. മത്സരം റിഷഭിന് അനുകൂലമാണെന്ന് ഇതോടെ തോന്നിയെങ്കിലും പിന്നീട് അനാവശ്യ ഷോട്ട് കളിച്ച് റിഷഭ് പുറത്താകുകയായിരുന്നു.
‘ആ ക്യാച്ച് കൈവിട്ടതിനെക്കുറിച്ച് പിന്നീട് ചിന്തിച്ചില്ല എന്ന് പറഞ്ഞാല്‍ അത് നുണയാകും. അതിന് കാരണം റിഷഭ് പന്തിന്റെ ബാറ്റിം?ഗ് ശൈലി തന്നെയാണ്. അഞ്ചോ ആറോ ഓവറില്‍ മത്സരത്തിന്റെ ഗതിതന്നെ മാറ്റാന്‍ പന്തിനാവും. കടുത്ത പോരാട്ടമായതിനാല്‍ ആ ക്യാച്ച് കൈവിട്ടതോടെ എന്റെ തലയിലൂടെ പല ചിന്തകളും വരാന്‍ തുടങ്ങി. മത്സരം തന്നെ കൈവിട്ടോ എന്നുവരെ ചിന്തിച്ചു. പക്ഷെ അതെല്ലാം മാറ്റിവെച്ച് എനിക്ക് അടുത്ത ഓവറില്‍ പന്തെറിയണമായിരുന്നു’
‘കുറച്ചുനേരത്തേക്ക് പന്തിന്റെ ക്യാച്ച് കൈവിട്ടതിനെക്കുറിച്ചുള്ള ചിന്തകള്‍ എന്നെ അലട്ടി എന്നത് ശരിയാണ്. പക്ഷെ അതില്‍ നിന്ന് പുറത്തുകടന്നല്ലേ മതിയാവു. 41 റണ്‍സെടുത്ത് ഇന്ത്യയുടെ ടോപ് സ്‌കോററായ റിഷഭ് പന്ത് ഒടുവില്‍ ബോള്‍ട്ടിന്റെ പന്തില്‍ പുറത്തായപ്പോള്‍ ഏറ്റവും കൂടുതല്‍ ആശ്വസിച്ചത് ഞാനായിരുന്നു. കാരണം ക്രിക്കറ്റില്‍ ക്യാച്ച് കൈവിടുക എന്നത് എല്ലായ്‌പ്പോഴും വലിയ ദുരന്തമാണ്. ക്യാച്ച് കൈവിടുമ്പോള്‍ നിങ്ങള്‍ സ്വന്തം ടീം അംഗങ്ങളെയാണ് കൈവിടുന്നത്’ സൗത്തി പറഞ്ഞു.
ശ്രീലങ്കക്കെതിരായ ടെസ്റ്റില്‍ തോറ്റാണ് ലോക ടെസ്റ്റ് ചാമ്പ്യന്‍ഷിപ്പില്‍ ന്യൂസിലന്‍ഡ് തുടങ്ങിയത്. എന്നാല്‍ പിന്നീടുള്ള പരമ്പരകളില്‍ മികവു കാട്ടാനായാതാണ് ഫൈനലില്‍ പ്രവേശനം സാധ്യമാക്കിയതെന്നും അതില്‍ ചെറിയ രീതിയില്‍ ഭാ?ഗ്യവും തുണച്ചുവെന്നും സൗത്തി പറഞ്ഞു.