ധോണിയുടെ വലംകൈയ്യെ റാഞ്ചാന് ഒരുങ്ങി സഞ്ജു, വെല്ലുവിളിച്ച് മറ്റ് രണ്ട് ടീമുകള്

ഐപിഎല് മെഗാ ലേലത്തില് മിസ്റ്റര് ഐപിഎല് സുരേഷ് റെയ്നയെ സ്വന്തമാക്കാന് രാജസ്ഥാന് റോയല്സ് ഒരുങ്ങുന്നതായി സൂചന. രണ്ട് കോടി അടിസ്ഥാന വിലയുളള റെയ്നയെ രാജസ്ഥാനെ കൂടാതെ മറ്റ് രണ്ട് ടീമുകളും നോട്ടമിട്ടുണ്ട്.
നേരത്തെ റോബിന് ഉത്തപ്പയെ ടീമിലെടുത്ത റോയല്സ് ഇക്കുറി റെയ്നയെ നോട്ടമിടുന്നതായി റിപ്പോര്ട്ടുകളുണ്ട്. മധ്യനിരയിലെ റോയല്സിന്റെ ദൗര്ബല്യം മറികടക്കാന് റെയ്നയുടെ വരവുകൊണ്ട് സാധിക്കും. റെയ്നയുടെ പരിചയസമ്പത്തും സാങ്കേതിക്കത്തികവും ടീമിന് മുതല്ക്കൂട്ടാകും.
ഐപിഎല്ലിലെ പുതുമുഖ ടീമുകളായ ലഖ്നൗ സൂപ്പര് ജയന്റ്സ് ആണ് റെയ്നയ്ക്കുവേണ്ടി ലേലത്തില് രംഗത്തിറങ്ങുന്ന മറ്റൊരു ക്ലബ്ബ്. പുതിയ ടീമായതുകൊണ്ടുതന്നെ ലഖ്നൗവിന് പരിചയസമ്പത്തുള്ള കളിക്കാരെ ടീമിനാവശ്യമുണ്ട്. യുവ കളിക്കാരേക്കാള് റെയ്നയെപ്പോലുള്ള കളിക്കാര്ക്കു വേണ്ടിയാകും ലഖ്നൗ ലേലത്തില് ശ്രമം നടത്തുക.
ലഖ്നൗവിനെ കൂടാതെ അഹമ്മദാബാദും റെയ്നയ്്ക്കായി രംഗത്തെത്തിയേക്കും. ഹാര്ദിക് പാണ്ഡ്യ ക്യാപ്റ്റനായ അഹമ്മദാബാദിന് റെയ്നയെ പോലുള്ള മികവുറ്റ ഒരു കളിക്കാരന് മുതല്ക്കൂട്ടാകും. മധ്യനിരയിലെ എക്കാലത്തേയും മികച്ച ഐപിഎല് കളിക്കാരില് ഒരാളായ റെയ്നയ്ക്ക് പുതിയ സീസണില് തിളങ്ങാന് സാധിക്കുമെന്നും അഹമ്മദാബാദ് കണക്കുകൂട്ടുന്നു.
2008നുശേഷം ആദ്യമായാണ് റെയ്ന ലേലത്തിനെത്തുന്നത് എന്ന പ്രത്യേകതയുണ്ട്. ആദ്യ സീസണ് മുതല് സിഎസ്കെ താരമായിരുന്നു. 2016, 2017 സീസണുകളില് ഗുജറാത്ത് ലയണ്സിനായും കളിച്ചു. 2018ല് സിഎസ്കെയില് മടങ്ങിയെത്തി. ഇക്കുറി സിഎസ്കെ താരത്തെ നിലനിര്ത്തിയില്ല.
ഐപിഎല്ലില് 205 മത്സരങ്ങളുടെ കളിപരിചയമുള്ള റെയ്ന 5528 റണ്സ് നേടിയിട്ടുണ്ട്. ഐപിഎല്ലിലെ റണ്വേട്ടക്കാരില് മുന്പന്തിയില് നില്ക്കുന്ന താരമാണ് റെയ്ന എന്നതുകൊണ്ടുതന്നെ വമ്പന് ടീമുകള് താരത്തിനായി ലേലത്തില് പണമിറക്കും.