Tag Archive: Newcastle United

  1. എണ്ണപ്പണം ന്യൂകാസിലില്‍ ഒഴുകില്ല, ക്ലബ്ബ് ഏറ്റെടുക്കുന്നതിൽ നിന്നും സൗദി പിന്മാറി

    Leave a Comment

    പ്രീമിയർലീഗ് ക്ലബ്ബായ ന്യൂകാസിൽ യുണൈറ്റഡിനെ ഏറ്റെടുക്കുന്നതിൽ നിന്നും സൗദി അറേബ്യ ആസ്ഥാനമാക്കിയുള്ള കൺസോർഷ്യം പിൻമാറി. ഈ കൺസോർഷ്യത്തിൽ സൗദി അറേബ്യൻ പബ്ലിക് ഇൻവെസ്റ്റ്മെന്റ് ഫണ്ട്‌, പിസിപി ക്യാപിറ്റൽ പാർട്ണേഴ്സ്, റ്യൂബെൻ ബ്രദേഴ്സ് എന്നിവരാണ് ഉൾപ്പെട്ടിരുന്നത്.

    300 മില്യൺ പൗണ്ടിന് നിലവിലെ ഉടമസ്ഥനായ മൈക്ക് ആഷ്ലിയിൽ നിന്നും ക്ലബ്ബ് വാങ്ങാൻ ഏപ്രിലിൽ ഈ കൺസോർഷ്യം ധാരണയിൽ എത്തിയിരുന്നു. അന്ന് തന്നെ ഇതുമായി ബന്ധപ്പെട്ട ഡോക്യുമെൻ്റ്സ് സമർപ്പിച്ചതാണെങ്കിലും പ്രീമിയർ ലീഗ് അധികൃതരുടെ ഇത് സംബന്ധിച്ച പരിശോധന ഇതുവരെ പൂർത്തിയായിട്ടില്ല.

    ഈ നടപടിക്രമം അനന്തമായി നീണ്ട് പോയതോടെയാണ് ഇപ്പോൾ ഈ ഇടപാടിൽ നിന്നും പിന്മാറാൻ സൗദി ഗ്രൂപ്പ് തീരുമാനിച്ചിരിക്കുന്നത്. ഇക്കാര്യം ഒരു ഔദ്യോഗിക അറിയിപ്പിലൂടെ അവർ വ്യക്തമാക്കിയിട്ടുണ്ട്. ഏതായാലും ന്യൂകാസിൽ യുണൈറ്റഡ് ആരാധകർക്ക് ഏറെ നിരാശ പകരുന്ന ഒരു തീരുമാനമാണിത്.

    ഇംഗ്ലീഷ് പ്രീമിയർ ലീഗിൽ ഈ സീസണിൽ പതിമൂന്നാം സ്ഥാനത്ത് ഫിനിഷ് ചെയ്ത ക്ലബ്ബ് ഈ നീക്കം നടന്നിരുന്നെങ്കിൽ അടിമുടി ഒരു മാറ്റം പ്രതീക്ഷിച്ചിരുന്നു. അതാണിപ്പോൾ ഇല്ലാതായിരിക്കുന്നത്. ഏതായാലും സൗദി ഗ്രൂപ്പ് പിന്മാറിയതോടെ അമേരിക്കൻ ബിസിനസ്സുകാരൻ ഹെൻറി മൗറിസ് ക്ലബ്ബ് വാങ്ങാനുള്ള സാധ്യത തെളിഞ്ഞ് വരുന്നതായി BBC സ്പോർട്സ് റിപ്പോർട്ട് ചെയ്തിട്ടുണ്ട്. ഹെൻറി മൗറിസ് നേരത്തെയും ന്യൂകാസിൽ യുണൈറ്റഡ് ഏറ്റെടുക്കാൻ താൽപര്യം പ്രകടിപ്പിച്ചിരുന്നു.

  2. കുട്ടീഞ്ഞോയെ മറിച്ചുവിൽക്കാൻ ബാഴ്‌സ! ആഴ്സണലും ന്യൂകാസിലും രംഗത്ത്

    Leave a Comment

    120 മില്യണ്‍ യൂറോക്ക് ജര്‍മ്മന്‍ സൂപ്പര്‍ ക്ലബ് ബയേണ്‍ മ്യൂണിക്ക് ഫിലിപ്പെ കൂട്ടിഞ്ഞോയെ വാങ്ങാന്‍ വിസമ്മതിച്ചതോടെ ഈ ട്രാന്‍ഫര്‍ മാര്‍ക്കറ്റില്‍ തന്നെ താരത്തെ വില്‍ക്കാനൊരുങ്ങുകയാണ് ബാഴ്സലോണ. ബാഴ്സയിലേക്ക് മടങ്ങാന്‍ താത്പര്യമില്ലായെന്ന് കൂട്ടിഞ്ഞോ അറിയിച്ചതോടെ താരത്തെ വിറ്റൊഴിച്ച് ഇന്ററില്‍ നിന്ന് ലുവറ്റാരോ മാര്‍ട്ടീനസിനെ ബാഴ്സയിലെത്തിക്കാനുള്ള പണം സ്വരൂപിക്കാനൊരുങ്ങുകയാണ് കാറ്റാലന്‍ ക്ലബ്.

    2018ല്‍ ലിവര്‍പൂളില്‍ നിന്നും 150 മില്യണിനാണ് ഫിലിപ്പെ കൂട്ടീഞ്ഞോ ബാഴ്സയിലേക്ക് കൂടുമാറിയത്. എന്നാല്‍ താരത്തിന് ബാഴ്സയില്‍ തിളങ്ങാനാവാതെ വന്നതോടെ താരത്തെ ബയേണ്‍ മ്യൂണിക്കിലേക്ക് ലോണില്‍ വിടുകയായിരുന്നു. 120 മില്യണ്‍ യുറോക്ക് ബയേണിനു താരത്തെ വാങ്ങാനുള്ള അവസരവും കരാറിലുണ്ടായിരുന്നു.

    എന്നാല്‍ ബയേണിലെ താരപ്പൊലിമക്കൊപ്പം മികച്ച രീതിയില്‍ പ്രകടനം കാഴ്ചവെക്കാന്‍ കഴിയാതിരുന്ന കൂട്ടീഞ്ഞോയെ ബയേണും കൈവിടുകയായിരുന്നു. താരത്തിനെ വാങ്ങിയതില്‍ ബാഴ്സക്ക് വന്‍ നഷ്ടമാണ് വന്നതെങ്കിലും ലുവറ്റാരോ മാര്‍ട്ടിനെസിന് പണം കണ്ടെത്താന്‍ കൂട്ടിഞ്ഞോയെ വില്‍ക്കാന്‍ തീരുമാനിക്കുകയായിരുന്നു.

    പ്രീമിയര്‍ ലീഗ് ക്ലബ്ബുകളായ ആഴ്‌സണലും ന്യൂകാസിലുമാണ് ഇപ്പോള്‍ കൂട്ടിഞ്ഞോയ്ക്കായി മുന്നോട്ടു വന്നിരിക്കുന്നത്. അടുത്തിടെ അറബ് ഉടമകള്‍ ഏറ്റെടുത്തതോടെ അടുത്ത സീസണിലേക്ക് മികച്ച താരങ്ങളെ തങ്ങളുടെ കൂടാരത്തിലെത്തിക്കാന്‍ ശ്രമിക്കുകയാണ് മാഗ്‌പൈസ് എന്ന് വിളിപ്പേരുള്ള ന്യൂകാസില്‍ യുണൈറ്റഡ്. ഈ അവസരത്തില്‍ താരത്തിനെ വില്‍ക്കുന്നത് മാര്‍ട്ടിനെസിനെ കരാറിലെത്തിക്കാന്‍ മുതല്‍കൂട്ടാവുമെന്നാണ് ബാഴ്സ പ്രതീക്ഷിക്കുന്നത്.

  3. അറബിപ്പണം വന്നു, ന്യൂകാസിലിന് കേരളത്തിലടക്കം നിരവധി ആരാധകര്‍ ജനിയ്ക്കുന്നു

    Leave a Comment

    സൗദി അറേബ്യന്‍ രാജകുടുംബം ഇംഗ്ലീഷ് പ്രീമിയര്‍ ലീഗ് ക്ലബായ ന്യൂകാസില്‍ യുണൈറ്റഡിനെ സ്വന്തമാക്കിയതോടെ നിരവധി പേരാണ് പുതുതായി ന്യൂകാസില്‍ ആരാധകരായ മാറിയിരിക്കുന്നത്.

    കേരളത്തിലടക്കം നിരവധി ആരാധകഗ്രൂപ്പുകളാണ് ന്യൂകാസിലിന് പുതുതായി ഉണ്ടായിരിക്കുന്നത് എന്നതാണ് ഏറെ കൗതുകകരം. ന്യൂകാസില്‍ ആരാധകര്‍ക്കായി നിരവധി വാട്‌സാപ്പ്, ഫെയ്‌സ്ബുക്ക് ഗ്രൂപ്പുകളും പുതുതായി ആരംഭിച്ച് കഴിഞ്ഞു.

    നേരത്തെ പിഎസ്ജിയേയും മാഞ്ചസ്റ്റര്‍ സിറ്റിയേയും വിവിധ അറേബ്യന്‍ രാജകുടുംബങ്ങള്‍ സ്വന്തമാക്കിയതോടെ ലോകത്തെ തന്നെ പ്രമുഖ ക്ലബുകളായി ഇവ മാറിയിരുന്നു. ലോകമെമ്പാടും നിരവധി ആരാധകരാണ് ഇരുടീമുകള്‍ക്കും പിന്നീട് ഉണ്ടായത്. സൗദി രാജകുടുംബം ഏറ്റെടുത്തതോടെ ന്യൂകാസിലും സമാനമായ രീതിയില്‍ ലോകത്തെ പ്രമുഖ ക്ലബായി മാറുമെന്നാണ് ആരാധകരുടെ വിശ്വാസം.

    300 മില്യണ്‍ യൂറോ മുടക്കിയാണ് സൗദി അറേബ്യന്‍ രാജകുടുംബം ന്യൂകാസില്‍ യുണൈറ്റഡിനെ സ്വന്തമാക്കിയത്. സൗദി അറേബ്യ പബ്ലിക് ഇന്‍വസ്റ്റ്‌മെന്റ് ഫണ്ടിലേക്കാണ് ന്യൂകാസിലിന്റെ ഉടമസ്ഥാവകാശം പൂര്‍ണ്ണമായും മാറാന്‍ പോകുന്നത്. സൗദി രാജ കുടുംബം തന്നെയാണ് ഇതിനു പിറകില്‍. ക്ലബിന്റെ 80% ഓഹരികളും പി എഫ് ഐ വാങ്ങും.