Tag Archive: Manchester City

  1. ഫൈനലിലെ കൂട്ടിയിടിയിൽ മുഖത്ത് പരിക്ക്, ഡിബ്രൂയ്നെക്ക് യൂറോ നഷ്ടമായേക്കാം

    Leave a Comment

    ചാമ്പ്യൻസ്‌ലീഗ് ഫൈനലിൽ ഏകപക്ഷീയമായ ഒരു ഗോളിനു മാഞ്ചസ്റ്റർ സിറ്റിയെ തോൽപ്പിച്ച് ചെൽസി കിരീടം സ്വന്തമാക്കിയിരിക്കുകയാണ്. മത്സരത്തിന്റെ രണ്ടാം പകുതിയുടെ തുടക്കത്തിൽ തന്നെ സൂപ്പർതാരം കെവിൻ ഡിബ്രൂയ്നെ പരിക്കേറ്റു പുറത്തായത് മാഞ്ചസ്റ്റർ സിറ്റിക്ക് തിരിച്ചടിയായിരുന്നു.

    കളിയിൽ സഹതാരം റിയാദ് മെഹ്റസിന് പന്ത് നൽകി മുന്നോട്ടു ഓടിയ ഡിബ്രൂയ്നെയെ ചെൽസി പ്രതിരോധതാരം അന്റോണിയോ റുഡിഗർ തോളുകൊണ്ട് ഇടിച്ചിടുകയായിരുന്നു. ഇടിയുടെ ആഘാതത്തിൽ ഡിബ്രൂയ്നെയുടെ മുഖത്തിന്‌ സാരമായ പരിക്കേറ്റത് മൂലം മെഡിക്കൽ സംഘം താരത്തെ കൂടുതൽ പരിശോധനക്കായി മത്സരത്തിൽ നിന്നും പിൻവലിക്കുകയായിരുന്നു.

    ഒരു ഗോളിനു പിറകിൽ നിൽക്കുന്ന തന്റെ ടീമിനു വേണ്ടി ഇനി കളിക്കാനാവില്ലെന്നറിഞ്ഞതോടെ താരം കൂടുതൽ വികാരഭരിതനായാണ് കളംവിട്ടത്. പിന്നീട് നടന്ന മെഡിക്കൽ പരിശോധനയിൽ താരത്തിന്റെ മൂക്കിലെ എല്ലിനും ഇടതുകണ്ണിനു താഴെ എല്ലിനും പരിക്കേറ്റതായി വ്യക്തമായിരിക്കുകയാണ്.

    ഇക്കാര്യം താരം തന്നെ ട്വിറ്ററിൽ ആരാധകരോട് വെളിപ്പെടുത്തുകയുണ്ടായി. എന്തായാലും പരിക്കു മൂലം താരത്തിനു ജൂണിൽ നടക്കാനിരിക്കുന്ന യൂറോയിൽ ബെൽജിയം സ്‌ക്വാഡിൽ നിന്നും ഒഴിവാക്കിയേക്കാമെന്നാണ് പുതിയ റിപ്പോർട്ടുകൾ. 11 ദിവസത്തിനുള്ളിൽ തുടങ്ങാനിരിക്കുന്ന ബെൽജിയത്തിന്റെ ആദ്യ മത്സരത്തിൽ റഷ്യയാണ്‌ എതിരാളികൾ.

  2. ഇത്‌ നാണക്കാരനായ കാന്റെയുടെ വിജയം, ചെൽസിക്കൊപ്പം കരിയറിൽ മറ്റൊരു പൊൻതൂവൽ കൂടി

    Leave a Comment

    ചാമ്പ്യൻസ്‌ലീഗ് ഫൈനലിൽ മാഞ്ചസ്റ്റർ സിറ്റിയെ കയ് ഹാവെർട്ടിന്റെ ഏകപക്ഷീയമായ ഒരു ഗോളിനു തോൽപ്പിച്ച് ചെൽസി കിരീടം ചൂടിയിരിക്കുകയാണല്ലോ. ചെൽസിയുടെ ഈ വിജയത്തിൽ പ്രധാന പങ്കു വഹിച്ചിരിക്കുന്നത് ചെൽസിയുടെ നെടുംതൂണായ എൻഗോളൊ കാന്റെയാണ്‌. മത്സരത്തിലെ താരമായി തിരഞ്ഞെടുത്തതും ഈ കുറിയ മനുഷ്യനെ തന്നെയാണ്.

    ഫ്രാൻസിനൊപ്പം വേൾഡ് കപ്പ്‌ കിരീടം നേടിക്കൊടുക്കുന്നതിന് പ്രധാന പങ്കു വഹിച്ച താരം കുറേ കാലമായി അകന്നു നിന്നിരുന്ന ചാമ്പ്യൻസ്‌ലീഗ് കിരീടം നേടിക്കൊടുക്കുന്നതിൽ നിർണായകതാരമായി ഉയർന്നു വന്നിരിക്കുകയാണ്. ക്വാർട്ടർ, സെമി ഫൈനൽ ഇരുപാദങ്ങളിലും സിറ്റിക്കെതിരെ ഫൈനലിലും മാൻ ഓഫ് ദ മാച്ച് പുരസ്‌കാരം നേടി ചെൽസിയുടെ വിജയത്തിനു ചുക്കാൻ പിടിച്ചിരിക്കുകയാണ് ഈ അഞ്ചടി ആറിഞ്ചുകാരൻ.

    വിജയാഘോഷങ്ങളുടെ വെള്ളിവെളിച്ചത്തിൽ നിന്നും എന്നും നാണക്കാരനായി ഒഴിഞ്ഞു മാറുന്ന കാന്റെയുടെ കരിയറിനു കിരീടങ്ങളുടെയും നേട്ടങ്ങളുടെയും കഥകൾ മാത്രമാണ് പറയാനുള്ളത്. 2014ൽ എഫ്സി കാനിനു വേണ്ടി അരങ്ങേറ്റം കുറിച്ച കാന്റെ അധികം വൈകാതെ തന്നെ അടുത്ത വർഷം ലൈസസ്റ്റർ സിറ്റിയിലേക്ക് ചേക്കേറി. 2017ൽ ലൈസസ്റ്ററിനൊപ്പം പ്രീമിയർ ലീഗ് കിരീടം നേടുകയും 2018ൽ ചെൽസിയിലേക്ക് ചേക്കേറുകയും ചെയ്തു.

    ആ വർഷം ചെൽസിക്ക് പ്രീമിയർ ലീഗ് കിരീടം നേടിക്കൊടുക്കുന്നതിൽ പ്രധാനപങ്കു വഹിച്ച കാന്റെ 2018ൽ ഫ്രാൻസിന്റെ മധ്യനിരയിൽ എണ്ണയിട്ട യന്ത്രം പോലെ പ്രവർത്തിച്ച് ലോകകപ്പ് നേടിക്കൊടുക്കുകയും ചെയ്തു. 2019ൽ ചെൽസിക്കൊപ്പം യൂറോപ്പ ലീഗ് ചാമ്പ്യൻമാരാകുകയും 2021ൽ സിറ്റിയെ തോൽപ്പിച്ച് ഇതുവരെ തന്റെ കരിയറിൽ നേടാത്ത ചാമ്പ്യൻസ്‌ലീഗും സ്വന്തമാക്കിയിരിക്കുകയാണ് കാന്റെ. ചാമ്പ്യൻസ്‌ലീഗ് വിജയാഘോഷങ്ങൾക്കിടയിലും വിനയാന്വിതനായി മാറി നിന്നു പുഞ്ചിരിക്കുന്ന കാന്റെയെയാണ് ഓരോ ഫുട്ബോൾ ആരാധകനും കാണാൻ സാധിച്ചത്. ആ നിഷ്കളങ്കത തന്നെയാണ് താരത്തിന്റെ ഓരോ വിജയത്തിനു പിന്നിലെയും രഹസ്യമെന്നാണ് ലോകം വിലയിരുത്തുന്നത്.

  3. ഇതാണ് എനിക്ക് ഏറ്റവും സന്തോഷം നൽകുന്ന വാർത്ത, ഫൈനലിന്റെ തയ്യാറെടുപ്പുകളെക്കുറിച്ച് ചെൽസി പരിശീലകൻ

    Leave a Comment

    മാഞ്ചസ്റ്റർ സിറ്റിക്കെതിരായ ചാമ്പ്യൻസ്‌ലീഗ് ഫൈനലിനായുള്ള തയ്യാറെടുപ്പിലാണ് തോമസ് ടൂഹലിനു കീഴിൽ ചെൽസി. സിറ്റിക്കെതിരെ മുഴുവൻ താരങ്ങളും റെഡിയാണെന്നാണ് തോമസ് ടൂഹൽ വ്യക്തമാക്കുന്നത്. മത്സരത്തിൽ മികച്ച പ്രകടനം നടത്താനാവുമെന്നാണ് ടൂഹൽ പ്രതീക്ഷ പുലർത്തുന്നത്.

    തനിക്ക് ഏറ്റവും സന്തോഷമേകുന്ന വാർത്ത രണ്ടു പ്രധാന താരങ്ങളുടെ തിരിച്ചു വരവാണെന്നാണ് ടൂഹൽ തന്നെ വ്യക്തമാക്കിയത്. ചെൽസിയുടെ വിജയങ്ങളിൽ പ്രധാനികളായ ഗോൾകീപ്പർ എഡ്‌വാർഡ് മെൻഡിയുടെയും എൻഗോളൊ കാന്റെയുടെയും തിരിച്ചുവരവാണ് ടൂഹലിനു കൂടുതൽ സന്തോഷമേകുന്ന വാർത്ത.

    മാഞ്ചസ്റ്റർ സിറ്റിക്കെതിരെ കൂടുതൽ ആരോഗ്യവാന്മാരായി തിരിച്ചെത്തിയ ഇരുവരും മത്സരത്തിൽ നിർണായക സാന്നിധ്യമാകുമെന്നാണ് ടൂഹൽ പ്രതീക്ഷിക്കുന്നത്. ലൈസസ്റ്ററിനെതിരായ മൽസരത്തിൽ തുടക്കേറ്റ പരിക്കിനെ തുടർന്നാണ് കാന്റെയെ ടൂഹൽ പിൻവലിക്കുന്നത്.

    അവസാനമത്സരത്തിൽ ആസ്റ്റൺവില്ലക്കെതിരെ ഗോൾപോസ്റ്റിൽ ഇടിച്ചു മെൻഡിക്കും പരിക്കേറ്റിരുന്നു. എന്നാലിപ്പോൾ ഫൈനലിൽ ഇരുവരുടെയും സേവനം ലഭ്യമാകുമെന്നാണ് റിപ്പോർട്ടുകൾ. സെമി ഫൈനലിൽ റയൽ മാഡ്രിഡിനെതിരെ ഇരുവരുടെയും പ്രകടനം ചെൽസിക്ക് നിർണായകമായിരുന്നു.

  4. ഇത് വളരെയധികം ബുദ്ധിമുട്ടി നേടിയ കിരീടം, ഈ സ്‌ക്വാഡിൽ ഒരുപാട് അഭിമാനിക്കുന്നുവെന്നു പെപ്‌ ഗാർഡിയോള

    Leave a Comment

    ലൈസസ്റ്റർ സിറ്റി ഒന്നിനെതിരെ രണ്ടു ഗോളുകൾക്ക് രണ്ടാം സ്ഥാനത്തുള്ള മാഞ്ചസ്റ്റർ യുണൈറ്റഡിനെ തോൽപ്പിച്ചതോടെ ഈ സീസണിലെ പ്രീമിയർലീഗ് കിരീടം മാഞ്ചസ്റ്റർ സിറ്റി സ്വന്തമാക്കിയിരിക്കുകയാണ്. കഴിഞ്ഞ നാലു വർഷത്തിനിടയിൽ പെപ്‌ ഗാർഡിയോളക്ക് കീഴിൽ മൂന്നാമത്തെ കിരീടമാണ് മാഞ്ചസ്റ്റർ സിറ്റിയും സംഘവും കൈപ്പിടിയിലൊതുക്കിയിരിക്കുന്നത്.

    ഈ സീസണിലെ കിരീടമാണ് നേടാൻ ഏറ്റവും ബുദ്ദിമുട്ടേറിയതെന്നാണ് പരിശീലകൻ പെപ്‌ ഗാർഡിയോള വ്യക്തമാക്കിയത്. കോവിഡ് മഹാമാരിയുടെ കാലത്ത് ഇത് യാഥാർഥ്യമാക്കിയ തന്റെ സ്‌ക്വാഡിനെയും സ്റ്റാഫുകളെയും പ്രശംസിക്കാനും ഗാർഡിയോള മറന്നില്ല. കിരീടവിജയത്തിന് ശേഷം നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

    “ഈ സീസണും പ്രീമിയർലീഗ് കിരീടവും മുമ്പത്തെക്കാൾ വളരെയധികം സവിശേഷതയുള്ളതാണ്. ഇതായിരുന്നു ഏറ്റവും ബുദ്ദിമുട്ടേറിയത്. ലീഗ് നേടിയ രീതികൊണ്ട് തന്നെ ഈ സീസൺ എപ്പോഴും ഞങ്ങളുടെ ഓർമയിലുണ്ടാവും. ഈ താരങ്ങളുടെ മാനേജരാവാൻ സാധിച്ചതിൽ ഞാൻ ഒരുപാട് അഭിമാനിക്കുന്നുണ്ട്.”

    “അവരെല്ലാം വളരെയധികം വിശേഷപ്പെട്ടവരാണ്. ഇത്തരം ബുദ്ദിമുട്ടേറിയ സാഹചര്യങ്ങളെ അതിജീവിച്ച് കളിയിലെ നിലവാരം നിലനിർത്തിയത് ശ്രദ്ധേയമായ കാര്യമാണ്. മികച്ച മനശക്തിയോടെ ഓരോ ദിവസവും പോരാടിയ അവർ ഒരിക്കലും പിൻവാങ്ങാൻ ആഗ്രഹിക്കാത്തവരായി നിലകൊണ്ടു. ” പെപ്‌ പറഞ്ഞു.

  5. അതൊരു മോശം തീരുമാനമായിരുന്നു, ചെൽസിക്കെതിരെ പെനാൽറ്റി പാഴാക്കിയതിനു ക്ഷമ ചോദിച്ച് അഗ്വേറോ

    Leave a Comment

    പ്രീമിയർ ലീഗ് കിരീടം ഉറപ്പിക്കാമായിരുന്ന ചെൽസിക്കെതിരായ മത്സരത്തിൽ മാഞ്ചസ്റ്റർ സിറ്റിക്ക് അപ്രതീക്ഷിത തോൽവി രുചിക്കേണ്ടി വന്നിരുന്നു. ഒന്നിനെതിരെ രണ്ടു ഗോളുകൾക്കാണ് ചെൽസി മാഞ്ചസ്റ്റർ സിറ്റിക്കെതിരെ ജയം നേടിയത്. സിറ്റിക്കായി സ്റ്റെർലിങ് ആദ്യപകുതിയിൽ ലീഡ് നേടിയപ്പോൾ ചെൽസിക്കായി രണ്ടാം പകുതിയിൽ ഹാകിം സിയെച്ചും ഇഞ്ചുറി ടൈമിൽ മാർക്കസ് അലോൺസോ വിജയഗോളും സ്വന്തമാക്കുകയായിരുന്നു.

    എന്നാൽ മത്സരത്തിൽ സിറ്റിക്ക് ലീഡ് നേടിക്കൊടുക്കാൻ പറ്റിയ അവസരമായി ലഭിച്ച പെനാൽറ്റി സെർജിയോ അഗ്വേറോ പാഴാക്കിയിരുന്നു. വ്യത്യസ്തമായ രീതിയിൽ പനെങ്ക കിക്കിലൂടെ ഗോൾ നേടാനുള്ള ശ്രമമാണ് പാഴായിപ്പോയത്. നേരിട്ട് അത് ചെൽസി ഗോൾകീപ്പർ മെൻഡിയുടെ കൈകളിലെത്തുകയായിരുന്നു.

    മത്സരശേഷം പെപ്‌ ഗാർഡിയോള ഇക്കാര്യത്തിൽ അഗ്വേറോയെ വിമർശിച്ചില്ലെങ്കിലും താരം തന്നെ ക്ഷമാപണവുമായി രംഗത്തെത്തുകയായിരുന്നു. ട്വിറ്ററിലൂടെയാണ്‌ താരം തന്റെ മോശം തീരുമാനത്തെ പറ്റി സ്വയം വിമർശനം നടത്തിയത്.

    “പെനാൽറ്റി പാഴാക്കിയതിൽ എന്റെ സഹതാരങ്ങളോടും സ്റ്റാഫുകളോടും ആരാധകരോടും ഞാൻ ക്ഷമ ചോദിക്കാൻ ആഗ്രഹിക്കുകയാണ്. അതൊരു മോശം തീരുമാനമായിരുന്നു. ഞാൻ അതിന്റെ എല്ലാ ഉത്തരവാദിത്തവും ഏറ്റെടുക്കുന്നു.” അഗ്വേറോ ട്വിറ്ററിൽ കുറിച്ചു. ഇതോടെ ഈ സീസണിൽ ഏറ്റവും കൂടുതൽ പെനാൽറ്റി പഴക്കുന്ന ടീമായി മാറിയിരിക്കുകയാണ് സിറ്റി.

  6. സിറ്റിയെ തോല്പിക്കാൻ കളിക്കളത്തിൽ മരിക്കാൻ വരെ തയ്യാറാണ്, മുന്നറിയിപ്പുമായി നെയ്മർ

    Leave a Comment

    ചാമ്പ്യൻസ് ലീഗ് സെമിഫൈനലിൻ്റെ ആദ്യ പാദത്തിൽ സ്വന്തം തട്ടകത്തിൽ അപ്രതീക്ഷിത തോൽവിയേറ്റുവാങ്ങേണ്ടി വന്നെങ്കിലും രണ്ടാം പാദത്തിൽ മാഞ്ചസ്റ്റർ സിറ്റിയുടെ തട്ടകമായ എത്തിഹാദിൽ ശക്തമായ തിരിച്ചു വരവ് നടത്താനാകുമെന്നാണ് പിഎസ്ജി പ്രതീക്ഷിക്കുന്നത്. അതിനു ശക്തമായ പിന്തുണയുമായി നെയ്മർ തന്നെ രംഗത്തെത്തിയിരിക്കുകയാണ്.

    കളിക്കളത്തിൽ മരിച്ചുവീഴേണ്ടി വന്നാലും മാഞ്ചസ്റ്റർ സിറ്റിയെ തോൽപ്പിക്കാൻ വേണ്ടി പരമാവധി ശ്രമിക്കുമെന്നാണ് നെയ്മറുടെ മുന്നറിയിപ്പ്. ആദ്യ പാദത്തിൽ ഒന്നിനെതിരെ രണ്ടു ഗോളിൻ്റെ വിജയം നേടാൻ മാഞ്ചസ്റ്റർ സിറ്റിക്ക് സാധിച്ചിരുന്നു. ക്ലബ്ബിൻ്റെ ഔദ്യോഗിക ചാനലിനു നൽകിയ അഭിമുഖത്തിൽ സംസാരിക്കുകയായിരുന്നു നെയ്മർ.

    “ഇനി ആദ്യം ചെയ്യാനുള്ള പ്രധാന കാര്യമെന്നത് ചാമ്പ്യൻസ്‌ലീഗിൽ കൂടുതൽ ശ്രദ്ധ നൽകുകയെന്നതാണ്. മാഞ്ചസ്റ്റർ സിറ്റിക്കെതിരെ കടുപ്പമേറിയ ആദ്യപാദമാണ് കഴിഞ്ഞു പോയത്. ജയിക്കാനുള്ള സാധ്യതകളും സ്ഥിതിവിവരക്കണക്കുകളും എന്തു പറയുന്നു എന്നു നോക്കാതെ വിജയിക്കുമെന്ന് ഞങ്ങൾക്ക് വിശ്വസിക്കേണ്ടതുണ്ട്.”

    “എനിക്ക് തോന്നുന്നത് പാരീസിലെ എല്ലാവരും ഞങ്ങളിൽ വിശ്വാസമർപ്പിക്കേണ്ടതുണ്ടെന്നാണ്. അവരെ നേരിട്ടു ജയിക്കാനായി ഒരു പോരാളിയെപ്പോലെ ഞാൻ തന്നെയായിരിക്കും മുൻനിരയിലുണ്ടാവുക. ഞാൻ എന്റെ കഴിവിന്റെ പരമാവധി നൽകും. സിറ്റിയെ തോൽപ്പിക്കാനായി കളിക്കളത്തിൽ മരിക്കാൻ വരെ ഞാൻ തയ്യാറാണ്.” നെയ്മർ പറഞ്ഞു.

  7. ബാഴ്സലോണയിലും മ്യൂണിച്ചിലും ജയിച്ചതുപോലെ മാഞ്ചസ്റ്ററിലും ആവർത്തിക്കും, സിറ്റിക്കു മുന്നറിയിപ്പുമായി പൊചെട്ടിനോ

    Leave a Comment

    പിഎസ്‌ജിയുടെ തട്ടകത്തിൽ വെച്ചു നടന്ന ചാമ്പ്യൻസ്‌ലീഗ് സെമി ഫൈനൽ ആദ്യ പാദ മത്സരത്തിൽ ഒന്നിനെതിരെ രണ്ടു ഗോളുകൾക്ക് മാഞ്ചസ്റ്റർ സിറ്റി വിജയം നേടിയിരിക്കുകയാണ്. പിഎസ്‌ജിക്കായി പ്രതിരോധതാരം മാർക്കിഞ്ഞോസ്‌ ഹെഡർ ഗോൾ നേടിയപ്പോൾ സിറ്റിക്കായി കെവിൻ ഡിബ്രൂയ്നെയും ഫ്രീകിക്കിലൂടെ റിയാദ് മെഹ്റെസുമാണ് വിജയഗോൾ നേടിയത്.

    ആദ്യപാദത്തിൽ തോൽവി രുചിക്കേണ്ടി വന്നെങ്കിലും രണ്ടാം പാദത്തിൽ മാഞ്ചസ്റ്ററിന്റെ തട്ടകത്തിൽ വിജയം നേടാനാവുമെന്ന ആത്മവിശ്വാസം പ്രകടിപ്പിച്ചിരിക്കുകയാണ് പിഎസ്‌ജി പരിശീലകനായ മൗറിസിയോ പൊചെട്ടിനോ. ബാഴ്സയുടെയും മ്യൂണിച്ചിന്റെയും തട്ടകത്തിൽ വിജയിക്കാനാവുമെങ്കിലും മാഞ്ചസ്റ്ററിലും വിജയിക്കാനാവുമെന്ന് പൊചെട്ടിനോ പറഞ്ഞു. മത്സരശേഷം നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

    “തീർച്ചയായും. ഞങ്ങൾ ആദ്യപകുതിയിൽ മികച്ച പ്രകടനം കാഴ്ചവെച്ചിരുന്നു. ഒപ്പം ഞങ്ങളുടെ തട്ടകത്തിനു പുറത്ത് മാഞ്ചസ്റ്ററിലും മികച്ച പ്രകടനം കാഴ്ചവെക്കാനാവുമെന്നാണ് ഞങ്ങൾ പ്രതീക്ഷിക്കുന്നത്. ഞങ്ങൾ ബാഴ്സലോണയിലും മ്യൂണിച്ചിലും നന്നായി കളിച്ചിരുന്നു.”

    “വിശ്വാസമാണ് ഏറ്റവും പ്രധാനപ്പെട്ട കാര്യം. ആ ഒരു കാര്യം മനസിലുള്ളത് നല്ല കാര്യമാണ്. കാരണം അതിൽ ഉറച്ചു വിശ്വസിച്ചു തൊണ്ണൂറു മിനുട്ടും താരങ്ങൾക്ക് കളിക്കാനാവും. അതിൽ വിജയിച്ചു മുന്നേറാനുമാവും.” പൊചെട്ടിനോ പറഞ്ഞു.
    മെയ് 5നാണ് രണ്ടാം പാദ മത്സരം നടക്കാനിരിക്കുന്നത്.

  8. എംബാപ്പെ, നെയ്മറിനെക്കുറിച്ചാലോചിച്ചു ഉറക്കം പോലും വരുന്നില്ല, സെമി ഫൈനലിനെക്കുറിച്ച് ഗാർഡിയോള

    Leave a Comment

    ചാമ്പ്യൻസ്‌ലീഗിൽ പിഎസ്‌ജിയുടെ തട്ടകത്തിൽ ചാമ്പ്യൻസ്‌ലീഗ് ഒന്നാം പാദ സെമി ഫൈനൽ പോരാട്ടത്തിനൊരുങ്ങുകയാണ് മാഞ്ചസ്റ്റർ സിറ്റി. നിലവിലെ ചാമ്പ്യന്മാരായ ബയേൺ മ്യൂണിക്കിനെ തോൽപ്പിച്ച ആത്മവിശ്വാസവുമായാണ് പിഎസ്‌ജി ഇറങ്ങുകയെന്നത് സിറ്റിക്ക് കൂടുതൽ സമ്മർദ്ദമേക്കുന്നുണ്ട്.

    അപകടകാരികളായ നെയ്മറും എംബാപ്പെയും തന്നെയായിരിക്കും പിഎസ്‌ജിയുടെ വജ്രായുധങ്ങൾ. അതിനെക്കുറിച്ചു തന്നെയാണ് പെപ്‌ ഗാർഡിയോളയും വാചാലനാകുന്നത്. അതിനെക്കുറിച്ച് ചിന്തിച്ച് ഉറങ്ങാനായില്ലെന്നാണ് പെപ്‌ ഗാർഡിയോള വെളിപ്പെടുത്തിയത്. മത്സരത്തിനു മുന്നോടിയായി നടന്ന അഭിമുഖത്തിൽ സംസാരിക്കുകയായിരുന്നു അദ്ദേഹം.

    ” ഞാൻ എപ്പോഴും ഈ കളിക്കാരുടെ ഗുണഗണങ്ങളിൽ വിശ്വസിക്കുന്നവനാണ്. അവർക്ക് അത് കൂടുതലുണ്ട്. ഞാൻ ഇന്നലെ നന്നായി ഉറങ്ങാൻ ശ്രമിച്ചു. അവരെക്കുറിച്ച് ചിന്തിക്കുമ്പോൾ എനിക്കു അതിന് കഴിയുന്നില്ല.”

    “അവിശ്വസനീയ താരങ്ങളാണവർ. അവരുടെ ഗുണഗണങ്ങളും. ഞങ്ങൾ അവരെ പിടിച്ചുകെട്ടാൻ തയ്യാറായി നിൽക്കുകയാണ്. അവരെ ഒരു ടീമായി തന്നെ പ്രതിരോധിക്കും. മികച്ച കളി തന്നെ കാഴ്ച്ചവെച്ചു ഗോൾ നേടാൻ ശ്രമിക്കും.” ഗാർഡിയോള പറഞ്ഞു.

  9. അവരെപ്പോലെ എന്റെ ഹൃദയവും നുറുങ്ങുകയാണ്, കരബാവോ കപ്പ്‌ ഫൈനൽ തോൽവിയെക്കുറിച്ച് ടോട്ടനം പരിശീലകൻ

    Leave a Comment

    ഈ സീസണിലെ കരബാവോ കപ്പ്‌ ഫൈനലിൽ എതിരില്ലാത്ത ഒരു ഗോളിനു ടോട്ടനം ഹോട്ട്സ്പറിനെ തോൽപ്പിച്ചു മാഞ്ചസ്റ്റർ സിറ്റി കിരീടം സ്വന്തമാക്കിയിരിക്കുകയാണ്. രണ്ടാം പകുതിയിൽ പ്രതിരോധതാരം ഐമെറിക് ലപോർട്ട നേടിയ ഗോളിലാണ് സിറ്റി വിജയം സ്വന്തമാക്കിയത്. ഇതോടെ ചരിത്രത്തിൽ ആദ്യമായി ഒരു കിരീടം നേടണമെന്ന ടോട്ടനം ഹോട്ട്സ്പറിന്റെ പ്രതീക്ഷകളും പൊലിഞ്ഞു പോയിരിക്കുകയാണ്.

    തോൽ‌വി ഹൃദയം നുറുങ്ങുന്ന വേദനയാണ് നൽകിയതെന്നു ടോട്ടനത്തിന്റെ പുതിയ താത്കാലിക പരിശീലകനായ റയാൻ മേസൺ പറഞ്ഞു. ചാമ്പ്യൻസ്‌ലീഗ് യോഗ്യത നേടാനാവാത്തതിന്റെ പരിണിതഫലമായി അടുത്തിടെയാണ് പ്രമുഖ പരിശീലകനായ ഹോസെ മൗറീഞ്ഞോയെ ടോട്ടനം പുറത്താക്കിയിരുന്നു. തോൽ‌വിയിൽ തന്റെ താരങ്ങളെപ്പോലെ മുൻതാരമായിരുന്ന തനിക്കും വലിയ നിരാശയും വേദനയുമാണ് തോന്നുന്നതെന്നും ടോട്ടനം പരിശീലകൻ പറഞ്ഞു. മത്സരശേഷം നടന്ന അഭിമുഖത്തിൽ സംസാരിക്കുകയായിരുന്നു അദ്ദേഹം.

    “ഇത് മുറിവേറ്റപോലെയുള്ള വേദനയാണ് നൽകുന്നത്. ഞാനും അവർക്കൊപ്പം ഒരു കളിക്കാരനെ പോലെ തന്നെയാണ് ഇരുന്നത്. ഞാനും ഈ ഫുട്ബോൾ ക്ലബ്ബിനുവേണ്ടി കളിക്കുകയും ഫൈനലിൽ തോൽക്കുകയും ചെയ്തിട്ടുണ്ട്. എനിക്കറിയാം അതെങ്ങനെയായിരിക്കുമെന്ന്.”

    അപ്പോഴുണ്ടാവുന്ന വികാരം എന്തെന്ന് എനിക്കു നന്നായി അറിയാം. അവർ വേദനിക്കുന്നത് സ്വഭാവികമായ കാര്യമാണ്. കാരണം അത് അവരുടെ ഉത്കണ്ഠയെയാണ്‌ കാണിക്കുന്നത്. ഈ ഒരു കൂട്ടം കളിക്കാർക്ക്‌ ഈ ക്ലബ്ബിനോട്‌ ഒരുപാട് കരുതലുണ്ട്. എനിക്കു തോന്നുന്നത് അവർ ഇന്ന്‌ കഴിവിന്റെ പരമാവധി നൽകിയിട്ടുണ്ടെന്നാണ്. നൂറു ശതമാനം പ്രതിബദ്ധത. ഞങ്ങൾ ഒരുപാട് ശ്രമിച്ചു. പക്ഷെ അത് പോരാതെ വന്നു. അത് വിഷമമുള്ള കാര്യം തന്നെയാണ്.” മേസൺ പറഞ്ഞു.

  10. മെസിയിലേക്കടുത്ത് അഗ്വേറോ, ബാഴ്സയുമായി കരാറിലെത്തിയെന്ന് റിപ്പോർട്ടുകൾ

    Leave a Comment

    സീസൺ അവസാനം കരാർ അവസാനിക്കാനിരിക്കുന്ന മാഞ്ചസ്റ്റർ സിറ്റിയുടെ അർജന്റൈൻ സൂപ്പർതാരമാണ് കുൻ അഗ്വേറോ. ജനുവരിയിൽ ഫ്രീ ഏജന്റായി മാറിയ അഗ്വേറോക്ക് പിന്നാലെ നിരവധി ക്ലബ്ബുകൾ ഉണ്ടായിരുന്നുവെങ്കിലും നിലവിൽ ബാഴ്സലോണയിലേക്ക് ചേക്കേറുമെന്ന അഭ്യൂഹങ്ങളാണ് ഉയർന്നു വരുന്നത്.

    പ്രീമിയർ ലീഗിലെ തന്നെ മറ്റൊരു വമ്പന്മാരായ ചെൽസിയിലേക്ക് ചേക്കേറുമെന്നു അഭ്യൂഹങ്ങളുണ്ടായിരുന്നുവെങ്കിലും നിലവിൽ കുറച്ചു ആഴ്ചകളായി ബാഴ്‌സയുമായി ചർച്ചകൾ നടന്നു കൊണ്ടിരിക്കുകയായിരുന്നു. എന്നാലിപ്പോൾ ബാഴ്‌സയിലേക്ക് തന്നെ ചേക്കേറുമെന്നാണ് അർജന്റൈൻ മാധ്യമമായ ടിവൈസി സ്പോർട്സ് റിപ്പോർട്ട്‌ ചെയ്തിരിക്കുന്നത്.

    രണ്ടുവർഷത്തേക്കുള്ള കരാറാണ് താരം ബാറസയുമായി ഒപ്പിടാൻ പോവുന്നതെന്നാണ് ഇതേ മാധ്യമം തന്നെ റിപ്പോർട്ട്‌ ചെയ്യുന്നത്. മറ്റൊരു മധ്യമമായ ലാ പോർട്ടെയിറോ റിപ്പോർട്ട്‌ ചെയ്യുന്നത് ബാഴ്‌സയിലേക്ക് ചേക്കേറാൻ വേതനം വെട്ടിക്കുറക്കാനും അഗ്വേറോ തയ്യാറായി എന്നതാണ്.

    ഇതോടെ പത്തുവർഷത്തെ പ്രീമിയർലീഗിലെ മികച്ച പ്രകടനത്തിനു ശേഷം ലാലിഗയിലേക്കുള്ള തിരിച്ചു വരവിനുള്ള ശ്രമങ്ങളാണ് നടന്നുകൊണ്ടിരിക്കുന്നത്. തന്റെ പ്രിയ സുഹൃത്തായ ലയണൽ മെസിക്കൊപ്പം ഒത്തുചേരാനുള്ള അവസരമാണ് ഉയർന്നുവന്നിരിക്കുന്നത്. കൂടാതെ അഗ്വേറോയുടെ വരവ് മെസിയെ ബാഴ്സയിൽ തന്നെ പിടിച്ചു നിർത്തുമെന്നാണ് പ്രതീക്ഷിക്കപ്പെടുന്നത്.