Tag Archive: LIONEL MESSI

  1. ലാറ്റിനമേരിക്കൻ താരങ്ങൾക്ക് കോവിഡ് വാക്‌സിനേഷൻ, കോൺമിബോളിന് സഹായഹസ്തവുമായി ലയണൽ മെസി

    Leave a Comment

    ജൂണിൽ നടക്കാനിരിക്കുന്ന കോപ്പ അമേരിക്കയ്ക്ക് മുന്നോടിയായി ലാറ്റിൻ അമേരിക്കൻ ഫുട്ബോൾ താരങ്ങൾക്ക് കോവിഡ് പ്രതിരോധകുത്തിവെയ്പ്പിന്റെ ഭാഗമായി ലയണൽ മെസ്സി 50,000 ഡോസ് കോവിഡ് വാക്സിൻ കോൺമിബോളിന് സഹായമായി നൽകാൻ തീരുമാനിച്ചിരിക്കുകയാണ്.
    കൊളംബിയയിലും അർജന്റീനയിലും വച്ച് നടക്കുന്ന കോപ്പ അമേരിക്കയിൽ വിദേശലീഗിൽ കളിക്കുന്ന നിരവധി താരങ്ങൾക്ക് വാക്സിനേഷൻ നൽകാൻ സൗത്ത് അമേരിക്കൻ ഫുട്ബോൾ കോൺഫെഡറേഷനായ കോൺമിബോൾ ലക്ഷ്യമിട്ടിരുന്നു.

    ഇതിനായി ചൈനയിൽ നിന്നുള്ള വാക്‌സിൻ നിർമാണ കമ്പനിയായ സിനോവാക്കുമായി മെസി ധാരണയിലെത്തിയെന്നാണ് റിപ്പോർട്ടുകൾ സൂചിപ്പിക്കുന്നത്. അതിനായി മെസി തന്റെ ഒപ്പുകൾ രേഖപ്പെടുത്തിയ മൂന്നു ജേഴ്സികൾ സിനോവാക്കിന് ദാനം ചെയ്തുവെന്നാണ് അറിയാനാകുന്നത്. ഡോസുകൾ നൽകുന്നതിനുമുമ്പ് അർജന്റീനിയൻ സർക്കാർ ആദ്യം ചൈനയുടെ സിനോവാക് വാക്സിൻ അംഗീകരിക്കേണ്ടതുണ്ടെന്നും പ്രമുഖ മാധ്യമമായ ഗാർഡിയൻ റിപ്പോർട്ട് ചെയ്യുന്നുണ്ട്.

    ഉറുഗ്വേ, അർജന്റീന തുടങ്ങിയ രാജ്യങ്ങളിൽ വാക്സിനുകൾ വലിയ ക്ഷാമമാണ് നേരിട്ടുകൊണ്ടിരിക്കുന്നത്. അതിനാലാണ് കോപ്പ അമേരിക്കക്ക് മുൻപേ തന്നെ ഇതിനെതിരെ നടപടിയെടുക്കാൻ കോൺമെബോളിനെ പ്രേരിപ്പിച്ചത്. അതിന് ശക്തമായ പിന്തുണ നൽകിയിരിക്കുകയാണ് ലയണൽ മെസി.

    കോവിഡ് വ്യാപനം നിയന്ത്രിക്കുന്നതിനായി അർജന്റീനിയൻ സർക്കാർ ശക്തമായ ലോക്ക് ഡൌൺ നടപ്പിലാക്കാനാണ് പദ്ധതിയിടുന്നത്. കോവിഡ് മൂലം നീട്ടിവെക്കേണ്ടി വന്ന കോപ്പ അമേരിക്ക ജൂൺ 13 മുതൽ ജൂലൈ 10 വരെ നടത്താനാണ് കോൺമിബോൾ നിശ്ചയിച്ചിരിക്കുന്നത്.

  2. സസ്പെൻഷൻ ഭീതിയിൽ മെസിയും ഡിയോങ്ങും, രണ്ടും കൽപ്പിച്ച് കളിപ്പിക്കാനൊരുങ്ങി കൂമാൻ

    Leave a Comment

    അത്ലറ്റിക്കോ മാഡ്രിഡ്‌ സെവിയ്യയോട് എതിരില്ലാത്ത ഒരു ഗോളിനു തോൽവി രുചിച്ചതോടെ രണ്ടാം സ്ഥാനത്തുള്ള ബാഴ്സക്ക് പോയിന്റ് ടേബിളിൽ അത്ലറ്റിക്കോക്കോക്ക് തൊട്ടടുത്തെത്താനുള്ള അവസരമാണ് സംജാതമായിരിക്കുന്നത്. അത്ലറ്റിക്കോയുമായി 4 പോയിന്റ് വ്യത്യാസമുണ്ടായിരുന്ന ബാഴ്സക്ക് സെവിയ്യക്കെതിരെ സിമിയോണിയുടെ ടീം തോൽവി രുചിച്ചതോടെ പോയിന്റ് വ്യത്യാസം ഇനി ഒന്നായി കുറക്കാൻ സാധിച്ചേക്കും. അതിനായി റയൽ വയ്യഡോലിഡുമായുള്ള മത്സരത്തിൽ ഇന്ന്‌ ബാഴ്സക്ക് ജയം അനിവാര്യമാണ്.

    വയ്യഡോലിഡിനെതിരെ ഇന്നിറങ്ങുമ്പോൾ ഒരു മഞ്ഞക്കാർഡകലെ സൂപ്പർതാരം ലയണൽ മെസിക്കും ഫ്രങ്കി ഡിയോങിനും സസ്പെൻഷൻ ഉണ്ടെന്ന അപകടവും ബാഴ്സക്ക് തലവേദനയായി മുന്നിലുണ്ട്. ഇരുവർക്കും മഞ്ഞക്കാർഡുകൾ ലഭിച്ചാൽ അടുത്ത നിർണായക മത്സരമായ എൽ ക്ലാസിക്കോ ഇരുവർക്കും നഷ്ടമായേക്കും. എന്നാൽ ഇക്കാര്യത്തിൽ തന്റെ അഭിപ്രായം വെളിപ്പെടുത്തിയിരിക്കുകയാണ് പരിശീലകനായ റൊണാൾഡ്‌ കൂമാൻ. മത്സരത്തിനു മുന്നോടിയായി നടന്ന പത്രസമ്മേളനത്തിൽ സംസാരിക്കുകയായിരുന്നു അദ്ദേഹം.

    “എല്ലാവരും ഒരുമിച്ചു പോരാടേണ്ട ഘട്ടത്തിലെത്തി നിൽക്കുകയാണ് ഞങ്ങൾ. ഞങ്ങൾ തയ്യാറായിരിക്കേണ്ടതുണ്ട്. അവർക്ക് പരിക്കുകളുള്ളത് കൊണ്ട് ഇതൊരു എളുപ്പമുള്ള മത്സരമാകുമെന്ന് എനിക്ക് തോന്നുന്നില്ല. ഞങ്ങൾ കൂടുതൽ ഊർജത്തിലും താളത്തിലും കളിക്കേണ്ടതുണ്ട്. ഒപ്പം പന്തിൽ മികവ് പുലർത്തുകയും വേണം. ഞങ്ങൾ ഞങ്ങളുടെ മികവിലേക്ക് തിരിച്ചെത്തേണ്ടതുണ്ട്.” കൂമാൻ പറഞ്ഞു.

    ലയണൽ മെസിക്കും ഫ്രങ്കി ഡിയോങിനും വിശ്രമം നൽകുമോയെന്ന ചോദ്യത്തിനും കൂമാൻ മറുപടി നൽകി.
    “ഈ രണ്ടു താരങ്ങൾക്കും ഓരോ മഞ്ഞക്കാർഡു കിട്ടിയാൽ അടുത്ത മത്സരത്തിൽ കളിക്കാനാവില്ലെന്നു ഞങ്ങൾക്ക് ബോധ്യമുണ്ട്. എന്നാൽ കാർഡിന്റെയോ ഉമേഷത്തിന്റെയോ കാരണത്താൽ താരങ്ങൾക്ക് വിശ്രമം നൽകേണ്ട സമയമല്ലിത്. ഞങ്ങൾക്കിനി പത്തു മത്സരങ്ങൾ ബാക്കിയുണ്ട്. അതുകൊണ്ടു തന്നെ റിസ്കിനുള്ള സാധ്യതയും ഉണ്ടായിരിക്കാം. എങ്കിലും മികച്ചതെന്തെന്നു വെച്ചാൽ മുഴുവൻ താരങ്ങളെയും കളിപ്പിക്കുകയെന്നതാണ്. വിജയിക്കാനാവുമെന്ന് തന്നെയാണ് എനിക്ക് തോന്നുന്നത്.” കൂമാൻ പറഞ്ഞു.

  3. ഞാൻ ക്രിസ്ത്യാനോ – മെസിയെക്കാൾ മികച്ചതാണെന്നു സ്വയം കരുതുന്നു, തന്റെ വിജയരഹസ്യം വെളിപ്പെടുത്തി എംബാപ്പെ

    Leave a Comment

    നിലവിൽ ലോകഫുട്ബോളിന്റെ നെറുകയിലെത്താൻ കഴിവുള്ള യുവപ്രതിഭകളിലൊരാളാണ് പിഎസ്‌ജി സൂപ്പർതാരം കിലിയൻ എംബാപ്പെ. പിഎസ്‌ജിക്കായി തകർപ്പൻ പ്രകടനം കാഴ്ച വെക്കുമ്പോഴും തന്നെ എപ്പോഴും ഉയരങ്ങളിലേക്ക് എത്താൻ സഹായിക്കുന്ന ഒരു രഹസ്യം വെളിപ്പെടുത്തിയിരിക്കുകയാണ് എംബാപ്പെ. താൻ എപ്പോഴും മനസ്സിൽ താലോലിച്ചുകൊണ്ടിരിക്കുന്ന അഹംഭാവമാണ് തന്നെ അതിനു സഹായിക്കുന്നതെന്നാണ് എംബാപ്പെയുടെ വെളിപ്പെടുത്തൽ.

    അതു കൊണ്ടു തന്നെ എപ്പോഴും താൻ സൂപ്പർതാരങ്ങളായ ലയണൽ മെസിയെക്കാളും ക്രിസ്ത്യാനോ റൊണാൾഡോയെക്കാളും മികച്ചവനാണെന്നാണ് കരുതുന്നതെന്നും എംബാപ്പെ പറഞ്ഞു. ക്രിസ്ത്യാനോക്കും മെസിയും തങ്ങളുടെ കരിയറിന്റെ അവസാനത്തിലേക്കടുക്കുമ്പോൾ ഫുട്ബോളിന്റെ നെറുകയിലേക്കുയരുകയാണ് എംബാപ്പെ. ഫ്രഞ്ച് മാധ്യമമായ ആർഎംസി സ്പോർട്ടിനു നൽകിയ അഭിമുഖത്തിൽ സംസാരിക്കുകയായിരുന്നു താരം.

    “അഹംഭാവം? തീർച്ചയായും. നിങ്ങൾ ഒരു വിഷമം പിടിച്ച അവസ്ഥയിലുള്ളപ്പോൾ അതല്ലാതെ ആരും മുന്നോട്ടു നയിക്കാനുള്ള ഊർജം നമുക്ക് തരുന്നില്ല. ഇനിയും വന്മലകൾ കടന്നു മുന്നേറാനുള്ളതാണെന്നു നിങ്ങൾ നിങ്ങളെ ബോധ്യപ്പെടുത്തേണ്ടതുണ്ട്. ആളുകൾ പലപ്പോഴും അഹംഭാവം എന്തെന്ന് മനസിലാക്കാറില്ല. നിങ്ങൾ മോശപ്പെട്ട അവസ്ഥയിലാകുമ്പോൾ ആരും നിങ്ങളുടെ വീട്ടിൽ വന്നു നിനക്കത് ചെയ്യാനാവും എന്നു ആത്മവിശ്വാസം നൽകാറില്ല. അത് നിങ്ങൾക്കും നിങ്ങളുടെ മനസ്ഥിതിക്കും മാത്രമേ സാധിക്കുകയുള്ളു. നിങ്ങൾക്ക് മാത്രം.”

    “മികവുറ്റ കാര്യങ്ങൾ ചെയ്യാനാവുമെന്ന് നിങ്ങൾ തന്നെ നിങ്ങളുടെ മനസിനെ ബോധ്യപ്പെടുത്തേണ്ടതുണ്ട്. എപ്പോഴും ഞാൻ കളിക്കാനിറങ്ങുമ്പോൾ ഞാനാണ് ഏറ്റവും മികച്ചതെന്നു സ്വയം മന്ത്രിക്കാറുണ്ട്. മെസിയും ക്രിസ്ത്യാനോയും കളിച്ച കളിക്കളങ്ങളിൽ ഞാനും കളിച്ചിട്ടുണ്ട്. അവർ എന്നേക്കാൾ മികച്ച താരങ്ങളാണ്. അവർ എന്നേക്കാൾ ബില്യൺകണക്കിന് കാര്യങ്ങൾ ചെയ്തിട്ടുണ്ടാവാം. എന്നാൽ എന്റെ മനസ്സിൽ ഞാനാണ് എപ്പോഴും മികച്ചതെന്ന ഭാവമാണുള്ളത്. കാരണം അങ്ങനെ കരുത്തുമ്പോൾ നമുക്ക് മുന്നിൽ ഒരു പരിധി ഇല്ലാതാവുകയും മികച്ച പ്രകടനം കാഴ്ചവെക്കാനും സാധിക്കും.”എംബാപ്പെ പറഞ്ഞു.

  4. നെയ്മറും മെസിയും ഒരുമിച്ചു കളിക്കും, പരീസിലല്ല ബാഴ്സയിലെന്നു വ്യക്തമാക്കി നെയ്മറുടെ മുൻ ഏജന്റ്

    Leave a Comment

    ബാഴ്സയിലേക്ക് തിരിച്ചു വരണമെന്ന് മെസി ആഗ്രഹിക്കുന്ന ഏറ്റവും അടുത്ത സുഹുത്താണ് നെയ്മർ ജൂനിയർ. രണ്ടു വർഷം മുമ്പ് താരത്തെ തിരിച്ചെത്തിക്കാൻ ബാഴ്സയും വലിയ രീതിയിൽ ശ്രമിച്ചിരുന്നു. എന്നാൽ ചില സാങ്കേതിക പിഴവുമൂലം നടക്കാതെ പോവുകയായിരുന്നു. നെയ്മറിനും ബാഴ്സയിൽ നിന്നും പോയതിൽ വലിയ രീതിയിലുള്ള കുറ്റബോധം ഉണ്ടായിരുന്ന സാചര്യത്തിൽ ബാഴ്സയിലേക്ക് തിരിച്ചു വരാനുള്ള ആഗ്രഹം താരം തന്നെ പരസ്യമായി വെളിപ്പെടുത്തുകയും ചെയ്തിരുന്നു.

    എന്നാൽ ആ നീക്കം എങ്ങുമെത്താതെ പോയതോടെ പി എസ്ജിയിൽ തന്നെ തുടരുകയായിരുന്നു. നിലവിൽ പാരീസുമായി പുതിയ കരാറിൽ ഒപ്പിടുമെന്ന അഭ്യൂഹങ്ങൾ നിലവിലുണ്ടെങ്കിലും നെയ്മർ വീണ്ടും മെസിക്കൊപ്പം കളിക്കുമെന്ന വാദവുമായി രംഗത്തെത്തിയിരിക്കുകയാണ് നെയ്മറുടെ മുൻ ഏജൻ്റായ ആന്ദ്രെ കറി. അർജൻ്റീനിയൻ മാധ്യമമായ എൽ ലിറ്റോറലിനു നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

    ” നെയ്മറിനു ബാഴ്സയിലേക്ക് തുറന്ന വാതിലാണുള്ളത്. അവൻ ചെയ്തത് ഒരു പിഴവാണെന്നു അവരുടെ ഫാൻസിനുമറിയാം. കുറച്ചു കാലം കൊണ്ടു തന്നെ അത് അവനും പിന്നീട് മനസിലായിട്ടുണ്ട്. രണ്ടു വർഷം മുൻപ് നെയ്മർ ഔദ്യോഗികമായി ബാഴ്സയിലേക്കു തിരിച്ചു പോകാൻ ആഗ്രഹമുണ്ടെന്നു അറിയിച്ചിരുന്നു. ഞങ്ങളും അവനെ പാരീസിൽ നിന്നും പുറത്തെത്തിക്കാൻ വലിയ ശ്രമം നടത്തി. ചില കാരണങ്ങളാൽ അത് നടക്കാതെ പോവുകയായിരുന്നു.”

    “അവരെ ഒരുമിപ്പിക്കാൻ ഇനി ലപോർട്ടക്കു മാത്രമേ സാധിക്കുകയുള്ളു. മെസി ബാഴ്സ വിട്ടു പോവുകയില്ല. ബാഴ്സയിൽ തന്നെയാണ് തന്റെ ചരിത്രമെന്നു അദ്ദേഹത്തിനു ബോധ്യമുണ്ട്. എനിക്കു അത് വളരെ വ്യക്തമായ കാര്യമാണ്.നെയ്മർ മെസിക്കൊപ്പം കളിക്കും. അതു പക്ഷെ ഭാര്സായിലായിരിക്കുമെന്ന് മാത്രം.” കറി പറഞ്ഞു.

  5. പിഎസ്‌ജിക്കെതിരെ ചാമ്പ്യൻസ്‌ലീഗിൽ നിന്നും പുറത്ത്, മെസിയുടെ ഭാവിയെക്കുറിച്ച് കൂമാന്റെ വെളിപ്പെടുത്തൽ

    Leave a Comment

    പിഎസ്ജിക്കെതിരായ ചാമ്പ്യൻസ് ലീഗ് പ്രീ ക്വാർട്ടർ രണ്ടാം പാദമത്സരം 1 – 1 സമനിലയിൽ കലാശിച്ചതോടെ 5 – 2 എന്ന അഗ്രിഗേറ്റ് സ്കോറിന് ബാഴ്സലോണ ടൂർണമെൻ്റിൽ നിന്നും പുറത്തായിരിക്കുകയാണ്. മെസിയുടെ കരിയറിലെ മറ്റൊരു അവസരം കൂടി ബാഴ്സക്കൊപ്പം നഷ്ടമായതോടെ ബാഴ്സയിൽ തന്നെ തുടരുമോയെന്ന ആകാംക്ഷയാണ് ബാഴ്സ ആരാധകരിൽ വീണ്ടും ഉയർന്നു വന്നിരിക്കുന്നത്.

    നിലവിൽ ബാഴ്സയുടെ പ്രകടനത്തിൽ ക്യാപ്റ്റനായ മെസി സന്തോഷവാനാണെങ്കിലും കരിയറിൻ്റെ അവസാന ഘട്ടത്തിലേക്കടുക്കുന്ന മെസിക്ക് ഭാവി തീരുമാനങ്ങൾ കടുത്തതായിരിക്കുമെന്നതിൽ സംശയമില്ല. ഇക്കാര്യത്തിൽ തൻ്റെ അഭിപ്രായം പങ്കുവെച്ചിരിക്കുകയാണ് ബാഴ്സ പരിശീലകനായ റൊണാൾഡ് കൂമാൻ. മത്സരശേഷം സംസാരിക്കുകയായിരുന്നു കൂമാൻ.

    “ടീം മികവിലേക്ക് മെച്ചപ്പെട്ടു വരുന്നത് മെസി കുറച്ചു കാലമായി കണ്ടു കൊണ്ടിരിക്കുകയാണ്. അതിനായി ഞങ്ങൾ കൊണ്ടുവന്ന മാറ്റങ്ങൾക്കു നന്ദി പറയുകയാണ്. പ്രത്യേകമെടുത്തു പറയുകയാണെങ്കിൽ ഞങ്ങൾക്ക് മികച്ച നിലവാരമുള്ള യുവതാരങ്ങളുണ്ട്. ഞങ്ങൾക്ക് ഒരു മികച്ച ഭാവി മുന്നിലുണ്ട്.”

    “ഭാവിയിൽ ഈ ടീം എന്തുനൽകുമെന്നതിൽ ലിയോക്ക് യാതൊരു സംശയവും കാണില്ലെന്നുറപ്പാണ്‌. എനിക്ക് തോന്നുന്നത് ലിയോയുടെ ഭാവിയെക്കുറിച്ച് ലിയോക്ക് മാത്രമേ തീരുമാനമെടുക്കാൻ സാധിക്കുള്ളു എന്നതാണ്. അതിൽ ആർക്കും ഒന്നും ചെയ്യാനാവില്ല. എനിക്കു തോന്നുന്നത് ബാഴ്സ ശരിയായ പാതയിലാണെന്നു അദ്ദേഹത്തിനുമറിയാം എന്നതാണ്. തുടരാൻ ആഗ്രഹിക്കാത്തതിന്റെ കാരണവും ഇതല്ല എന്നാണ് എനിക്ക് തോന്നുന്നത്.” കൂമാൻ പറഞ്ഞു.

  6. മെസി ഫ്രീകിക്ക് പരിശീലിക്കുന്നതേ കണ്ടിട്ടില്ല, പരിശീലിച്ചില്ലെങ്കിലും മെസി പെർഫെക്ട് ആണെന്ന് മുൻ ബാഴ്സ താരം സെമെഡോ

    Leave a Comment

    ബാഴ്സയിൽ നിന്നും പ്രീമിയർ ലീഗ് ക്ലബ്ബായ വോൾവ്സിലേക്ക് ചേക്കേറിയ പോർച്ചുഗീസ് റൈറ്റ് ബാക്കാണ് നെൽസൺ സെമെഡോ. പ്രീമിയർ ലീഗിലേക്ക് ചേക്കേറിയെങ്കിലും ഇപ്പോഴും ബാഴ്സയിലെ സുന്ദര നിമിഷങ്ങളെക്കുറിച്ച് സെമെഡോ ഇപ്പോഴും ഓർക്കാറുണ്ട്. സൂപ്പർതാരം ലയണൽ മെസിയോടൊപ്പമുള്ള പരിശീലന നിമിഷങ്ങളെ കുറിച്ചും സെമെഡോ സംസാരിച്ചു.

    പ്രത്യേകിച്ചും ലയണൽ മെസിയുടെ ഫ്രീകിക്ക് പടവമാണ് സെമെഡോയെ അമ്പരപ്പിച്ചു കളഞ്ഞത്. ഡെഡ് ബോൾ സാഹചര്യങ്ങളിൽ മെസി കാണിക്കുന്ന അസാമാന്യ കൃത്യതയാണ് സെമെഡോയെ അത്ഭുതപ്പെടുത്താറുള്ളത്. ഇംഗ്ലീഷ് മാധ്യമമായ അത്ലെറ്റിക്കിന് നൽകിയ അഭിമുഖത്തിൽ സംസാരിക്കുകയായിരുന്നു സെമെഡോ.

    “ആശ്ചര്യകരമാണത്! അദ്ദേഹമെത്രത്തോളം മികച്ചതാണെന്നു വിശദീകരിക്കാൻ എന്റെ കയ്യിൽ വാക്കുകളില്ല. നിങ്ങൾക്കറിയുമോ ഇതിലും കൂടുതൽ അദ്ദേഹത്തെ അതിശയകരമാക്കുന്ന മറ്റൊരു കാര്യം. പരിശീലനത്തിൽ ഇതുവരെയും അദ്ദേഹം ഫ്രീകിക്ക് പരിശീലിക്കുന്നത് ഞാൻ കണ്ടിട്ടില്ല. ഞാൻ അവിടെ ഉണ്ടായിരുന്ന അത്രയും കാലത്തോളം.”

    “ഞാൻ ആണയിട്ട് പറയുന്നു അദ്ദേഹമൊരിക്കലും അതു ചെയ്തിട്ടില്ല. ഞങ്ങൾ ദൂരത്തു നിന്നും ഷൂട്ട്‌ ചെയ്തു പരിശീലിക്കാറുണ്ട്. എന്നാൽ മെസി ഒരിക്കലും ഫ്രീകിക്ക് എടുക്കാറില്ല. അദ്ദേഹത്തിന്റെ കാര്യത്തിൽ അതു സ്വഭാവികമായ ഒരു കാര്യമാണ്. എല്ലാവരും പറയും പരിശീലിക്കും തോറുമാണ് ഒരു ജോലിയിൽ പൂർണനാവുന്നതെന്നു. അദ്ദേഹത്തിന്റെ കാര്യത്തിൽ പരിശീലിച്ചില്ലെങ്കിലും അത് പെർഫെക്ട് തന്നെയാണ്.” സെമെഡോ പറഞ്ഞു.

  7. എൽച്ചെ ഗോൾകീപ്പറോട് ജേഴ്‌സി ചോദിച്ചു വാങ്ങി മെസി, അത്ഭുതപ്പെട്ടു എൽച്ചെയുടെ യുവഗോൾകീപ്പർ

    Leave a Comment

    ലാലിഗയിൽ എൽച്ചെക്കെതിരെ ക്യാമ്പ് നൂവിൽ വെച്ചു നടന്ന മത്സരത്തിൽ എതിരില്ലാത്ത മൂന്നു ഗോളുകൾക്ക് ബാഴ്സ വിജയം സ്വന്തമാക്കിയിരുന്നു. ഇരട്ട ഗോളുകൾ സ്വന്തമാക്കിയതോടെ ലാലിഗയിലെ ഗോൾവേട്ടക്കാരിൽ സുവാരസിനെ മറികടന്നു ലയണൽ മെസി ഒന്നാം സ്ഥാനത്തെത്തിയിരിക്കുകയാണ്. മൂന്നാം ഗോൾ സ്വന്തമാക്കിയത് ജോർദി ആൽബയാണ്.

    ഇരട്ടഗോളുകൾ സ്വന്തമാക്കിയെങ്കിലും മത്സരശേഷം നടന്ന മറ്റൊരു സംഭവമാണ് ലയണൽ മെസിയെ കൂടുതൽ ആരാധ്യനാക്കി തീർത്തിരിക്കുന്നത്. മത്സരത്തിലുടനീളം മികച്ച പ്രകടനം കാഴ്ച വെച്ച എൽച്ചെയുടെ യുവ ഗോൾകീപ്പർ എഡ്ഗർ ബാഡിയയുടെ ജേഴ്സി മെസി ചോദിച്ചു വാങ്ങുകയായിരുന്നു. സാധാരണ മറിച്ചാണ് ഉണ്ടാവാറുള്ളത്.

    മെസിയുടെ ജേഴ്സിക്കായി താരങ്ങൾ അങ്ങോട്ട്‌ ചെല്ലുകയാണ് പതിവ്. പലപ്പോഴും പലർക്കും ലഭിക്കാതെ നിരാശനാകുന്നതും നമ്മൾ കാണാറുണ്ട്. മത്സര ശേഷം ഗോൾ കീപ്പർക്ക് തന്റെ ജേഴ്‌സി നൽകുകയും തിരിച്ചു മെസി തന്നെ ബാഡിയയുടെ ജേഴ്സി ചോദിക്കുകയായിരുന്നു. ബാഡിയ ആദ്യം തെല്ലൊന്നു അത്ഭുതപ്പെടുകയും മെസിക്ക് ഉടനെ തന്നെ തന്റെ ജേഴ്സി നൽകുകയുമായിരുന്നു.

    എൽച്ചെക്കെതിരായ വിജയത്തോടെ സെവിയ്യയെ മറികടന്നു മൂന്നാം സ്ഥാനത്തേക്കുയരാൻ ബാഴ്സക്ക് സാധിച്ചിരിക്കുകയാണ്. രണ്ടാം സ്ഥാനത്തുള്ള റയൽ മാഡ്രിഡുമായി 2 പോയിന്റിന്റെ വ്യത്യാസമാണുള്ളത്. കോപ്പ ഡെൽ റെയിൽ സെവിയ്യയുമായാണ് ഇനി ബാഴ്സക്ക് മത്സരമുള്ളത്. ആദ്യപാദത്തിൽ 2-0നു ബാഴ്സക്ക് തോൽവിയേറ്റു വാങ്ങേണ്ടി വന്നിരുന്നു.

  8. മെസിയെ ആവശ്യമുണ്ട്, 430 മില്യണിന്റെ ഓഫറുമായി സിറ്റി

    Leave a Comment

    ചാമ്പ്യൻസ്‌ലീഗിലും ലാലിഗയിലും മികച്ച പ്രകടനം തുടരാൻ ബാഴ്സക്ക് സാധിക്കാത്തതു കൊണ്ടു തന്നെ ഈ സീസൺ അവസാനം മെസി ക്ലബ്ബ് വിടാനുള്ള സാധ്യതയാണ് ഉയർന്നു വന്നിരിക്കുന്നത്. മെസിക്കായി നിലവിൽ പ്രീമിയർലീഗ് വമ്പന്മാരായ മാഞ്ചസ്റ്റർ സിറ്റിയും ഫ്രഞ്ച് ശക്തികളായ പിഎസ്‌ജിയും ശ്രമങ്ങളാരംഭിച്ചിട്ടുണ്ട്. പിഎസ്‌ജി പരസ്യമായി മെസ്സിയോടുള്ള താത്പര്യം വ്യക്തമാക്കുമ്പോൾ നിശബ്ദമായി താരത്തിനെ സമീപിക്കാനാണ് സിറ്റിയുടെ ശ്രമം.

    കഴിഞ്ഞ സമ്മറിൽ മെസി ക്ലബ്ബ് വിടാൻ തീരുമാനമെടുത്ത സമയത്ത് മാഞ്ചസ്റ്റർ സിറ്റി താരത്തിനായി ശ്രമിച്ചിരുന്നു. എന്നാൽ മെസി ഈ സീസൺ കൂടി ക്ലബ്ബിൽ തുടരാമെന്നു തീരുമാനിക്കുകയായിരുന്നു. ഇംഗ്ലീഷ് മാധ്യമമായ സണ്ണിന്റെ റിപ്പോർട്ടുകൾ പ്രകാരം മെസിക്ക് മുന്നിൽ 600 മില്യൺ യൂറോയുടെ ഓഫർ മാഞ്ചസ്റ്റർ സിറ്റി കഴിഞ്ഞ സമ്മറിൽ മുന്നോട്ടുവെച്ചുവെന്നാണ് അറിയാനാവുന്നത്.

    അഞ്ച് വർഷത്തേക്കുള്ള ആ കരാറിൽ നിന്നും 170 മില്യൺ കുറച്ചു കൊണ്ട് 430 മില്യൺ യൂറോയുടെ പുതിയ ഓഫർ മെസിക്കായി സിറ്റി മുന്നോട്ടു വെച്ചുവെന്നാണ് റിപ്പോർട്ടുകൾ സൂചിപ്പിക്കുന്നത്. റിപ്പോർട്ടുകൾ പ്രകാരം കോവിഡ് മൂലമുണ്ടായ നിലവിലെ സാമ്പത്തിക പ്രതിസന്ധിയാണ് കരാറിൽ കാര്യമായ മാറ്റത്തിനു കാരണമായതെന്നാണ് അറിയാനാകുന്നത്.

    മെസിയുടെ കരിയറിലെ അവസാനവർഷങ്ങളിൽ ഒന്ന് കുറഞ്ഞു പോയതും സിറ്റി കണക്കിലെടുത്തിട്ടുണ്ട്. കഴിഞ്ഞ വർഷത്തെ ബയേൺ മ്യുണിക്കിനെതിരെ എട്ടു ഗോളിന്റെ ദയനീയ തോൽവിക്കു ശേഷമാണ് ബാഴ്സ വിടാനുള്ള ആഗ്രഹം മെസി ക്ലബ്ബിനെ അറിയിക്കുന്നത്. നിലവിൽ പിഎസ്‌ജിക്കെതിരെയും ക്യാമ്പ് നൂവിൽ ദയനീയ തോൽവി രുചിച്ചതോടെ ഈ സീസൺ അവസാനം ഫ്രീ ട്രാൻസ്ഫറിൽ മെസി ക്ലബ്ബ് വിടുമെന്ന് തന്നെയാണ് പ്രതീക്ഷിക്കുന്നത്.

  9. മെസി കളിച്ചത് ക്യാമ്പ് നൂവിലെ അവസാന ചാമ്പ്യൻസ്‌ലീഗ് മത്സരം, പിഎസ്‌ജിയിലേക്ക് പോവുമെന്നുറപ്പാണെന്നു റിവാൾഡോ

    Leave a Comment

    ചാമ്പ്യൻസ്‌ലീഗ് പ്രീക്വാർട്ടർ ആദ്യപാദ മത്സരത്തിൽ പിഎസ്‌ജിയോട് ബാഴ്സ ഒന്നിനെതിരെ നാലു ഗോളുകൾക്ക് ദയനീയ പരാജയം ഏറ്റുവാങ്ങിയിരുന്നു. എന്നാൽ ഈ തോൽവി ലയണൽ മെസിയെ ബാഴ്സയിൽ തുടരുന്നതിനെ പിന്തിരിപ്പിക്കുമെന്നാണ് ബാഴ്സ ഇതിഹാസം റിവാൾഡോയുടെ പക്ഷം. ബാഴ്സക്കായി ക്യാമ്പ് നൂവിലെ അവസാന മത്സരമായിരിക്കും ഇതെന്നാണ് റിവാൾഡോ ചൂണ്ടിക്കാണിച്ചത്.

    പിഎസ്‌ജിയിൽ ഒരുപാട് കിരീടങ്ങൾ മെസിക്ക് നേടാനാവുമെന്നും റിവാൾഡോ അഭിപ്രായപ്പെട്ടു. ക്ലബ്ബ് വിടുന്നത് കിരീടങ്ങൾ നേടുവാനുള്ള സാഹചര്യം ക്ലബ്ബ് ഉണ്ടാക്കികൊടുക്കാത്തതിനാലാണെന്നാണ് റിവാൾഡോ കാരണമായി ചൂണ്ടിക്കാണിച്ചത്. പ്രമുഖമാധ്യമായ ബെറ്റ്ഫെയറിനു നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

    ലയണൽ മെസ്സി ക്യാമ്പ് നൂവിലെ അവസാന ചാമ്പ്യൻസ് ലീഗ് മത്സരം കളിച്ചു കഴിഞ്ഞു.പി എസ് ജിക്ക് എതിരായ പരാജയമായിരിക്കും ബാഴ്സലോണക്ക് വേണ്ടി മെസ്സി കളിച്ച അവസാന ചാമ്പ്യൻസ് ലീഗ് ഹോം മത്സരം. സമ്മറിൽ ലയണൽ മെസ്സി പാരീസിലേക്ക് പോവുമെന്നെനിക്കുറപ്പാണ്. പി എസ് ജിയിൽ മെസ്സിക്ക് ഒരുപാട് കിരീടങ്ങൾ നേടാനുള്ള സാധ്യതകൾ കാണുന്നു.”

    “മെസ്സി ബാഴ്സലോണയിൽ നിൽക്കണമെന്നു എനിക്കും ആഗ്രഹം. എന്നാൽ മെസിക്ക് കിരീടങ്ങൾ നേടാനുള്ള അനുകൂലമായ ഒരു സാഹചര്യവും ക്ലബ് ഒരുക്കുന്നില്ല. ഒറ്റക്ക് ടീമിന്റെ ഉത്തരവാദിത്വം അവനു ഏറ്റെടുക്കാൻ കഴിയില്ല. സുവാരസിന്റെ ട്രാൻസ്ഫർ തന്നെ എന്തുകൊണ്ടാണെന്ന് മനസിലാക്കാൻ സാധിക്കാത്ത ഒന്നാണ്. അത് അത്ലറ്റിക്കോയെ ശക്തരാക്കുകയാണ് ചെയ്തത്. എനിക്ക് തോന്നുന്നത് സീസൺ അവസാനം അവൻ ക്ലബ്ബ് വിടുമെന്ന് തന്നെയാണ്. ” റിവാൾഡോ പറഞ്ഞു.

  10. എന്തു ചെയ്തിട്ടായാലും മെസിയെ ബാഴ്സയിൽ നിലനിർത്തും, മെസി ബാഴ്സയ്ക്കൊപ്പം വിജയിക്കാനാഗ്രഹിക്കുന്നുവെന്ന് പ്രസിഡന്റ് സ്ഥാനാർത്ഥി ലപോർട്ട

    Leave a Comment

    ചാമ്പ്യൻസ്‌ലീഗിലും ലാലിഗയിലും ബാഴ്സ മൽസരത്വരയില്ലാത്ത ഒരു ടീമായി മാറിക്കൊണ്ടിരിക്കുന്ന സ്ഥിതിവിശേഷത്തിൽ മാറ്റത്തിനായി മുന്നിൽ നിന്ന വ്യക്തിയാണ് സൂപ്പർതാരം ലയണൽ മെസി. ക്ലബ്ബ് വിടണമെന്ന ആഗ്രഹവുമായി മെസി മുൻ പ്രസിഡന്റായ ബർതോമ്യുവിനെ സമീപിച്ചതും മത്സരത്വരയും ദീർഘവീക്ഷണവുമുള്ള ഒരു പ്രൊജക്റ്റ്‌ ബാഴ്സയിൽ ഉണ്ടാവാത്തത് കൊണ്ടു തന്നെയാണ്. അത് ഗോളിനു നൽകിയ എക്സ്‌ക്ലൂസീവ് ഇന്റർവ്യൂവിൽ ലയണൽ മെസി തന്നെ വ്യക്തമാക്കിയിരുന്നു.

    എന്നാൽ പുതിയ ബോർഡും മികച്ച ഒരു പ്രൊജക്റ്റും വന്നാൽ ലയണൽ മെസി ബാഴ്സയിൽ തന്നെ തുടരാനും ചിലപ്പോൾ കാരണമായേക്കാം. എന്നാൽ മെസിയുടെ വയസും ഈ തീരുമാനത്തിൽ ഒരു പ്രധാനഘടകമായി നിലനിൽക്കുന്നുണ്ട്. പുതിയ പ്രൊജക്റ്റ്‌ എന്തായാലും ഒന്നിലധികം വർഷത്തെ അടിസ്ഥാനമാക്കുന്നതാണെങ്കിൽ മെസി ക്ലബ്ബ് വിടാനുള്ള സാധ്യതയും എറിയേക്കാം. എന്നാൽ എന്തു ചെയ്തിട്ടായാലും മെസിയെ ബാഴ്സയിൽ തന്നെ നിലനിർത്തുമെന്ന പ്രഖ്യാപനവുമായി രംഗത്തെത്തിയിരിക്കുകയാണ് പ്രസിഡന്റ് സ്ഥാനാർത്ഥിയായ ജൊവാൻ ലപോർട്ട. സ്കൈ സ്‌പോർട്സിനു നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.

    “ഞങ്ങൾക്ക് അതിനു ഒരു മത്സരത്വരയുള്ള സ്പോർട്ടിങ് ഓഫർ മുന്നോട്ടു വെക്കേണ്ടതുണ്ട്. അവനൊരു വിജയിയാണ്. ബാഴ്സയ്ക്കൊപ്പം എല്ലാം വിജയിക്കാൻ അവൻ ആഗ്രഹിക്കുന്നു. എനിക്ക് കഴിയാവുന്നത് എല്ലാം ഞാൻ ചെയ്യും. അവനിൽ ഒരുപാട് ആളുകൾ താത്പര്യം പ്രകടിപ്പിക്കുന്നുണ്ടെന്നു എനിക്കറിയാം. ഒരു സുപ്രധാനമായ ഓഫർ തന്നെ ഞങ്ങൾക്ക് ആവശ്യമായി വന്നേക്കും. പണം ഒരിക്കലും കിരീടങ്ങൾ ഉറപ്പു നൽകുന്നില്ല. മെസി ചെലവിനെക്കാൾ കൂടുതൽ വരുമാനമാണ് ഉണ്ടാക്കിത്തരുന്നത്. ”

    “ആകെയുള്ളതിന്റെ 8 ശതമാനം മാത്രമാണ് അവനു വേണ്ടി ചെലവ് വരുന്നത്. 30 ശതമാനത്തോളം വരുമാനം അവൻ ക്ലബ്ബിനുവേണ്ടി ഉണ്ടാക്കിക്കൊടുക്കുന്നുണ്ട്. അത് ബാഴ്സക്ക് ലാഭമാണുണ്ടാക്കുന്നതെങ്കിലും ഏറ്റവും പ്രധാനപ്പെട്ടതും വിലമതിക്കാനാവാത്തതുമായ കാര്യം നമ്മൾ ഒരു കുട്ടിയോട് ഈ ലോകത്തിലെ തന്നെ ഏറ്റവും മികച്ച താരം ആരാണെന്നു ചോദിച്ചാൽ വളരെ പെട്ടെന്നു തന്നെ മെസി എന്നു മറുപടി നൽകുന്നതാണ്.” ലപോർട്ട
    പറഞ്ഞു.