Tag Archive: KERALA BLASTERS

  1. ഇന്ന് ബ്ലാസ്റ്റേഴ്‌സിന്റെ വിധിയെഴുത്ത്, ടീമിലെ താരങ്ങൾ മാനസികമായി ഒരുങ്ങിയെന്ന് മൊഹമ്മദ് അയ്‌മൻ

    Leave a Comment

    ഇന്ത്യൻ സൂപ്പർ ലീഗിൽ ഇന്നത്തെ മത്സരം കേരള ബ്ലാസ്റ്റേഴ്‌സിന്റെ വിധിയെഴുതും. സീസണിൽ മികച്ച തുടക്കം ലഭിക്കുകയും ആദ്യപകുതി കഴിഞ്ഞപ്പോൾ ഒന്നാം സ്ഥാനത്തു വരികയും ചെയ്‌ത ടീമിപ്പോൾ മോശം പ്രകടനമാണ് നടത്തിക്കൊണ്ടിരിക്കുന്നത്. ടീമിലെ പ്രധാന താരങ്ങളിൽ പലരും പരിക്കിന്റെ പിടിയിലായതാണ് ബ്ലാസ്റ്റേഴ്‌സിന്റെ ഫോം ഇല്ലാതാവാൻ കാരണമെന്നത് വ്യക്തമാണ്. ആദ്യപകുതിയിലെ പ്രകടനമാണ് ബ്ലാസ്റ്റേഴ്‌സിനെ പ്ലേ ഓഫിലെത്തിച്ചത്.

    നിലവിലെ പ്രകടനം കണക്കിലെടുക്കുമ്പോൾ ഒഡിഷ എഫ്‌സിക്കെതിരെ കേരള ബ്ലാസ്റ്റേഴ്‌സ് വിജയം നേടാനുള്ള സാധ്യത വളരെ കുറവാണ്. പരിക്കിന്റെ പിടിയിലുള്ള നിരവധി താരങ്ങളുമായി ബ്ലാസ്റ്റേഴ്‌സ് ഇറങ്ങുമ്പോൾ ഒഡിഷ എഫ്‌സിക്ക് അവരുടെ പ്രധാന താരങ്ങളെല്ലാം ലഭ്യമാണ്. എങ്കിലും മികച്ച പോരാട്ടവീര്യം പുറത്തെടുത്താൽ വിജയം നേടാമെന്ന പ്രതീക്ഷ ടീമിനുണ്ട്. കഴിഞ്ഞ ദിവസം ടീമിന്റെ താരമായ മൊഹമ്മദ് അയ്‌മനും ഇതാണ് സൂചിപ്പിച്ചത്.

    “ടീമിലെ താരങ്ങളുടെ മാനസികാവസ്ഥയെല്ലാം വളരെ പോസിറ്റിവാണ്. ഇത് പ്ലേ ഓഫ് മത്സരമാണെന്നതിനാൽ തന്നെ ഒരു കളി മാത്രമേയുണ്ടാകൂ. അതിൽ ഞങ്ങൾക്ക് വിജയം നേടണം. ഞങ്ങളതിനു വേണ്ടി ഏറ്റവും മികച്ച രീതിയിൽ തയ്യാറെടുത്തിട്ടുണ്ട്.” ഇന്നലെ മത്സരത്തിന് മുൻപ് മാധ്യമങ്ങളോട് സംസാരിക്കുമ്പോൾ മൊഹമ്മദ് അയ്‌മൻ പറഞ്ഞു.

    പ്ലേ ഓഫ് മത്സരത്തിൽ കേരള ബ്ലാസ്റ്റേഴ്സിന്റെ പ്രധാനപ്പെട്ട പ്രതീക്ഷ പരിശീലകൻ ഇവാൻ വുകോമനോവിച്ചിൽ തന്നെയാണ്. ആദ്യത്തെ സീസണിൽ ബ്ലാസ്‌റ്റേഴ്‌സിനെ ഫൈനലിലെത്തിക്കാൻ അദ്ദേഹത്തിന് കഴിഞ്ഞിരുന്നു. കഴിഞ്ഞ സീസണിൽ ബെംഗളൂരുവിനെതിരായ മത്സരത്തിൽ പ്രതിഷേധിച്ച് ഇറങ്ങിപ്പോയതാണ് ബ്ലാസ്റ്റേഴ്‌സ് പുറത്താകാൻ കാരണം. ഇത്തവണ ഇവാന് ബ്ലാസ്‌റ്റേഴ്‌സിനെ വിജയിപ്പിക്കാൻ കഴിയുമെന്ന് ആരാധകർ വിശ്വസിക്കുന്നു.

  2. മുന്നിലുള്ളത് ഇതുവരെ സ്വന്തമാക്കാനാവാത്ത രണ്ടു നേട്ടങ്ങൾ, കലിംഗയിൽ ഇവാന്റെ ലക്‌ഷ്യം ചെറുതല്ല

    Leave a Comment

    ഐഎസ്എല്ലിന്റെ പ്ലേ ഓഫ് മത്സരത്തിൽ കേരള ബ്ലാസ്റ്റേഴ്‌സ് നാളെ ഒഡിഷ എഫ്‌സിയെ നേരിടാൻ ഒരുങ്ങുകയാണ്. കടലാസിൽ ബ്ലാസ്റ്റേഴ്‌സിനേക്കാൾ കരുത്തുറ്റ ടീമാണ് ഒഡിഷ എഫ്‌സി. അതിനു പുറമെ ഒഡിഷയുടെ മൈതാനത്താണ് മത്സരം നടക്കുന്നതെന്നതും ടീമിലെ താരങ്ങളുടെ പരിക്കുമെല്ലാം ബ്ലാസ്റ്റേഴ്‌സിനു വലിയ പ്രതിസന്ധി നൽകുന്ന കാര്യങ്ങളാണ്.

    അതേസമയം നാളെ നടക്കാനിരിക്കുന്ന മത്സരത്തിൽ വിജയം നേടാൻ കഴിഞ്ഞാൽ അത് ബ്ലാസ്റ്റേഴ്‌സിനും പരിശീലകൻ ഇവാൻ വുകോമനോവിച്ചിനും വലിയ നേട്ടമാണ്. ഒഡിഷ എഫ്സിയുടെ മൈതാനമായ കലിംഗ സ്റ്റേഡിയത്തിൽ ഇതുവരെ ഒരു മത്സരത്തിൽ പോലും കേരള ബ്ലാസ്റ്റേഴ്‌സ് വിജയിച്ചിട്ടില്ല. ആ റെക്കോർഡ് തിരുത്താനുള്ള ഒരു അവസരം കൂടിയാണിത്.

    കേരള ബ്ലാസ്റ്റേഴ്‌സ് അവരുടെ ചരിത്രത്തിൽ ഇന്ന് വരെ ഒരു പാദമായി നടന്ന പ്ലേ ഓഫ് മത്സരത്തിൽ വിജയം നേടിയിട്ടില്ല. ഒഡിഷക്കെതിരായ മത്സരം ഒരു പാദമായാണ് നടക്കുന്നത് എന്നതിനാൽ തന്നെ അതിൽ വിജയിച്ചാൽ ആ ആദ്യമായി ആ നേട്ടവും സ്വന്തമാകും. അങ്ങിനെ രണ്ടു പ്രധാന നേട്ടങ്ങൾ സ്വന്തമാക്കാൻ ബ്ലാസ്റ്റേഴ്‌സിനും ഇവാനും അവസരമുണ്ട്.

    ഇവാൻ വുകോമനോവിച്ച് പരിശീലകനായ കഴിഞ്ഞ രണ്ടു സീസണുകളിലും പ്ലേ ഓഫ് കളിച്ച ടീമാണ് കേരള ബ്ലാസ്റ്റേഴ്‌സ്. ആദ്യത്തെ സീസണിൽ ഫൈനൽ വരെ എത്തിയെങ്കിലും കഴിഞ്ഞ സീസണിൽ ബെംഗളൂരുവിനെതിരായ മത്സരത്തിൽ പ്രതിഷേധമുയർത്തി ഇറങ്ങിപ്പോയതാണ് ടീം പുറത്താകാൻ കാരണം. ഇവാന്റെ തന്ത്രങ്ങൾ വിജയിക്കുമെന്ന പ്രതീക്ഷയിലാണ് ഇത്തവണയും ആരാധകർ.

  3. അഡ്രിയാൻ ലൂണ കളിക്കുമെങ്കിലും ചെറിയൊരു പ്രശ്‌നമുണ്ട്, ഇവാൻ വുകോമനോവിച്ച് പറയുന്നു

    Leave a Comment

    ഒഡിഷ എഫ്‌സിക്കെതിരെ നാളെ നടക്കാനിരിക്കുന്ന ഇന്ത്യൻ സൂപ്പർ ലീഗ് പ്ലേ ഓഫ് മത്സരത്തിൽ അഡ്രിയാൻ ലൂണ കളിക്കുമോയെന്ന കാര്യത്തിൽ വ്യക്തത വരുത്തി പരിശീലകൻ ഇവാൻ വുകോമനോവിച്ച്. ടീമിനൊപ്പം പരിശീലനം ആരംഭിച്ച അഡ്രിയാൻ ലൂണ മത്സരത്തിനിറങ്ങാൻ തയ്യാറാണെങ്കിലും മുഴുവൻ സമയവും കളിക്കാൻ കഴിയില്ലെന്നാണ് ഇവാൻ പറയുന്നത്.

    കഴിഞ്ഞ ഡിസംബറിലാണ് അഡ്രിയാൻ ലൂണ പരിക്കേറ്റു പുറത്തായത്. ഈ സീസൺ മുഴുവൻ താരത്തിന് നഷ്‌ടമാകുമെന്നാണ് കരുതിയതെങ്കിലും നേരത്തെ തിരിച്ചെത്താൻ ലൂണക്കായി. എന്നാൽ ഡിസംബറിൽ പരിക്കേറ്റു പുറത്തു പോയ താരം അതിനു ശേഷം ഇതുവരെ ഒരു മത്സരം പോലും കളിച്ചിട്ടില്ലെന്നതാണ് താരത്തെ മുഴുവൻ സമയം ഇറക്കാനുള്ള പ്രധാന ബുദ്ധിമുട്ടായി ഇവാൻ പറയുന്നത്.

    “അഡ്രിയാൻ ലൂണ ടീമിനൊപ്പമുണ്ട്. അദ്ദേഹം ഒരുപാട് സമയത്തിന് ശേഷമാണ് തിരിച്ചു വരുന്നതെന്നത് ഞങ്ങൾ പ്രത്യേകം പരിഗണിക്കേണ്ട കാര്യമാണ്. അതിനാൽ തന്നെ തൊണ്ണൂറു മിനുട്ടും കളിക്കാൻ ലൂണക്ക് കഴിയില്ല. എന്നാൽ അടുത്ത മത്സരത്തിൽ ഒരുപാട് നാളുകൾക്ക് ശേഷം ലൂണ കളത്തിലിറങ്ങും, സന്തോഷത്തോടെ അത് നിങ്ങളെ അറിയിക്കുന്നു.” ഇവാൻ വുകോമനോവിച്ച് പറഞ്ഞു.

    ഒരുപാട് നാളുകൾക്ക് ശേഷം കളത്തിലിറങ്ങുകയാണ് എന്നതിനാൽ തന്നെ അഡ്രിയാൻ ലൂണ ആദ്യ ഇലവനിൽ ഇടം പിടിക്കാനുള്ള സാധ്യതയില്ലെന്നാണ് ഇവാൻ വുകോമനോവിച്ച് പറഞ്ഞതിൽ നിന്നും മനസിലാക്കേണ്ടത്. രണ്ടാം പകുതിയിലാവും താരത്തെ കളത്തിലിറക്കുക. എന്തായാലും ബ്ലാസ്‌റ്റേഴ്‌സിനെ സംബന്ധിച്ച് വളരെ കടുപ്പമേറിയ മത്സരമാകും ഒഡിഷക്കെതിരെയുള്ളത്.

  4. കൊച്ചിയിലെ മഞ്ഞക്കടലിനു മുന്നിൽ സെമി കളിക്കണം, പ്ലേഓഫിൽ പോരാടുമെന്ന് ഇവാൻ വുകോമനോവിച്ച്

    Leave a Comment

    ഇന്ത്യൻ സൂപ്പർ ലീഗിന്റെ പ്ലേ ഓഫ് മത്സരത്തിനായി കേരള ബ്ലാസ്റ്റേഴ്‌സ് ഒരുങ്ങുകയാണ്. ഏപ്രിൽ 19നു നടക്കുന്ന മത്സരത്തിൽ അഞ്ചാം സ്ഥാനത്തുള്ള ബ്ലാസ്റ്റേഴ്‌സിന് നാലാം സ്ഥാനത്തുള്ള ഒഡിഷ എഫ്‌സിയാണ് എതിരാളികൾ. ഒഡിഷ എഫ്‌സിയുടെ മൈതാനത്ത് ഇതുവരെ കളിച്ച ഒരു മത്സരത്തിൽ പോലും വിജയം നേടാൻ കഴിഞ്ഞിട്ടില്ലെന്നത് കേരള ബ്ലാസ്റ്റേഴ്‌സിന് തിരിച്ചടിയാണ്.

    എന്നാൽ കലിംഗ സ്റ്റേഡിയത്തിലെ മോശം റെക്കോർഡൊന്നും ബ്ലാസ്റ്റേഴ്‌സ് പരിശീലകനായ ഇവാൻ വുകോമനോവിച്ച് കണക്കിലെടുക്കുന്നില്ല. പ്ലേ ഓഫ് മത്സരം വിജയിച്ച് ബ്ലാസ്റ്റേഴ്‌സ് സെമിയിലേക്ക് മുന്നേറുന്നതും കൊച്ചിയിൽ വെച്ച് സെമി ഫൈനൽ കളിക്കുന്നതുമാണ് ഇവാനാശാൻ ചിന്തിക്കുന്നത്. അതിനായി ഏറ്റവും ശക്തമായ രീതിയിൽ പൊരുതുമെന്നും അദ്ദേഹം വ്യക്തമാക്കി.

    “സെമി ഫൈനലിലേക്ക് മുന്നേറി കൊച്ചിയിലെ ആരാധകരുടെ മുന്നിൽ വെച്ച് കളിക്കാനും കഴിഞ്ഞാൽ അതൊരു ആവേശകരമായ അനുഭവമായിരിക്കും. ഇതൊരു ബുദ്ധിമുട്ടേറിയ സീസണായിരുന്നു. പരിക്കും സസ്‌പെൻഷനും കാരണം നിരവധി താരങ്ങളെ ഞങ്ങൾക്ക് നഷ്‌ടമായി. മികച്ച കുതിപ്പിനിടയിലാണ് അത് സംഭവിച്ചത്. ഞങ്ങൾ ഏറ്റവും മികച്ചത് ചെയ്യും.” ഇവാൻ പറഞ്ഞു.

    ഒഡിഷ എഫ്‌സിയോടുള്ള മത്സരത്തിൽ ബ്ലാസ്റ്റേഴ്‌സ് വിജയിച്ചാലും സെമി ഫൈനൽ അതിനേക്കാൾ കടുപ്പമേറിയ മത്സരമായി മാറുമെന്നതിൽ സംശയമില്ല. കഴിഞ്ഞ ദിവസം ഷീൽഡ് വിജയിച്ച മോഹൻ ബഗാനാണ് സെമിയിൽ കേരള ബ്ലാസ്റ്റേഴ്‌സിന്റെ എതിരാളികളായി ഉണ്ടാവുക. അതുകൊണ്ടു തന്നെ ഫൈനലിലേക്ക് മുന്നേറാമെന്ന ടീമിന്റെ പ്രതീക്ഷകൾ കുറവാണ്.

  5. ഐഎസ്എൽ സെമി മത്സരങ്ങളുടെ ചിത്രവും തെളിഞ്ഞു, മുന്നേറിയാലും ബ്ലാസ്റ്റേഴ്‌സിന് കടുപ്പമാകും

    Leave a Comment

    ഇന്ത്യൻ സൂപ്പർ ലീഗിലെ അവസാനത്തെ മത്സരത്തിൽ മുംബൈ സിറ്റിയെ കീഴടക്കി മോഹൻ ബഗാൻ ഷീൽഡ് സ്വന്തമാക്കി. ഷീൽഡ് നേട്ടത്തിന് ഒരു സമനില മാത്രം മതിയായിരുന്നു മുംബൈ സിറ്റിയെ ഒന്നിനെതിരെ രണ്ടു ഗോളുകൾക്ക് കീഴടക്കിയാണ് ഒരു പോയിന്റിന്റെ വ്യത്യാസത്തിൽ മോഹൻ ബഗാൻ പോയിന്റ് ടേബിളിൽ ഒന്നാം സ്ഥാനത്തേക്ക് മുന്നേറി ഷീൽഡ് സ്വന്തമാക്കിയത്.

    മോഹൻ ബഗാൻ ഒന്നാം സ്ഥാനത്തും മുംബൈ സിറ്റി രണ്ടാം സ്ഥാനത്തും വന്നതോടെ ഐഎസ്എൽ സെമി ഫൈനലുകളുടെ ചിത്രവും തെളിഞ്ഞിട്ടുണ്ട്. മോഹൻ ബഗാനും മുംബൈ സിറ്റിയും നേരിട്ട് സെമി ഫൈനലിലേക്ക് മുന്നേറുമ്പോൾ മൂന്നു മുതൽ ആറു വരെ സ്ഥാനങ്ങളിലുള്ള ടീമുകൾ പ്ലേ ഓഫ് കളിച്ച് അതിൽ വിജയം നേടിയാലാണ് സെമിയിലേക്ക് മുന്നേറുക.

    മൂന്നാം സ്ഥാനത്തുള്ള ഗോവ ആറാം സ്ഥാനത്തുള്ള ചെന്നൈയിൻ എഫ്‌സിയെ പ്ലേ ഓഫിൽ നേരിടുമ്പോൾ ഒഡിഷ എഫ്‌സിയും കേരള ബ്ലാസ്റ്റേഴ്‌സും തമ്മിലാണ് മറ്റൊരു പ്ലേ ഓഫ് നടക്കുന്നത്. ഒഡിഷ എഫ്‌സിയും കേരള ബ്ലാസ്റ്റേഴ്‌സും തമ്മിൽ നടക്കുന്ന മത്സരത്തിൽ വിജയം നേടുന്ന ടീം സെമിയിൽ മോഹൻ ബഗാനെ നേരിടുമ്പോൾ അടുത്ത പ്ലേ ഓഫിൽ വിജയിക്കുന്ന ടീം മുംബൈ സിറ്റിയെ സെമിയിൽ നേരിടും.

    കേരള ബ്ലാസ്‌റ്റേഴ്‌സിനെ സംബന്ധിച്ച് പ്ലേ ഓഫ് പോരാട്ടം തന്നെ വളരെ കടുപ്പമേറിയ ഒന്നാണ്. അതിൽ നിന്നും മുന്നേറിയാലും സെമിയിൽ മോഹൻ ബഗാനെ മറികടക്കാൻ ടീമിന് കഴിഞ്ഞേക്കില്ല. പരിക്കാണ് ബ്ലാസ്റ്റേഴ്‌സിന് വിലങ്ങുതടിയായി നിൽക്കുന്ന പ്രധാന പ്രശ്‌നം. എന്നാൽ ഒന്നും നഷ്ടപ്പെടാൻ ഇല്ലാത്തതിനാൽ തന്നെ എല്ലാം മറന്നു പൊരുതാൻ ബ്ലാസ്റ്റേഴ്‌സിന് കഴിയും.

  6. ദിമിത്രിയോസിന്റെ പരിക്ക് ഇവാന്റെ മറ്റൊരു തന്ത്രമോ, ബ്ലാസ്റ്റേഴ്‌സ് പരിശീലകൻ മൈൻഡ് ഗെയിം പുറത്തെടുക്കുന്നു

    Leave a Comment

    ഇന്ത്യൻ സൂപ്പർ ലീഗിന്റെ പ്ലേ ഓഫ് മത്സരം കളിക്കാൻ ഒരുങ്ങുന്ന കേരള ബ്ലാസ്റ്റേഴ്‌സിന് വലിയ തിരിച്ചടി നൽകിയാണ് ടീമിന്റെ സ്‌ട്രൈക്കറായ ദിമിത്രിയോസ് പരിക്കേറ്റു പുറത്തായത്. ഈ സീസണിൽ പതിമൂന്നു ഗോൾ നേടി ഐഎസ്എല്ലിലെ ടോപ് സ്കോററായ താരത്തിന്റെ പരിക്ക് ടീമിനെ വളരെയധികം ബാധിക്കുന്ന ഒന്നാണെന്നതിൽ സംശയമില്ല.

    ദിമിത്രിയോസിന്റെ പരിക്കിനെക്കുറിച്ച് മാധ്യമങ്ങളോട് സംസാരിക്കുമ്പോൾ ഇവാൻ വുകോമനോവിച്ച് പറഞ്ഞത് താരം പ്ലേ ഓഫിന് മുൻപ് തിരിച്ചെത്താനുള്ള സാധ്യത കുറവാണെന്നാണ്. എന്നാൽ ആ വാക്കുകൾ ഇവാൻ വുകോമനോവിച്ചിന്റെ മൈൻഡ് ഗെയിം ആയും വിലയിരുത്തപ്പെടുന്നുണ്ട്. ദിമിത്രിയോസ് പ്ലേ ഓഫിൽ കളിക്കുമെന്ന് തന്നെയാണ് പല ഭാഗങ്ങളിൽ നിന്നും ലഭിക്കുന്ന സൂചനകൾ.

    ദിമിത്രിയോസ് കളിക്കാനുള്ള സാധ്യത ഇല്ലെന്ന ധാരണ എതിരാളികളിൽ ഉണ്ടാക്കിയെടുത്താൽ അവർ താരത്തെ നേരിടാൻ വലിയ തയ്യാറെടുപ്പുകൾ നടത്തില്ല, തന്ത്രങ്ങളിലും മാറ്റം വരുത്തും. ഈ സാഹചര്യത്തിൽ അപ്രതീക്ഷിതമായി ദിമിത്രിയോസിനെ കളിപ്പിച്ചാൽ എതിരാളികളുടെ തന്ത്രങ്ങൾ പൊളിയുകയും ബ്ലാസ്റ്റേഴ്‌സിന് മുൻ‌തൂക്കം ലഭിക്കുകയും ചെയ്യും. ഇവാൻ ലക്‌ഷ്യം വെക്കുന്നത് ഇതാണെന്നാണ് സൂചനകൾ.

    ചില ഉറവിടങ്ങളിൽ നിന്നും ലഭിക്കുന്ന സൂചനകൾ പ്രകാരം ദിമിത്രിയോസ് പരിശീലനം ആരംഭിച്ചിട്ടുണ്ട്. താരത്തിന്റെ പരിക്ക് ഗുരുതരമല്ലെന്ന് ഇവാന്റെ വാക്കുകളിൽ നിന്നും വ്യക്തവുമാണ്. അതുകൊണ്ടു തന്നെ താരം പ്ലേ ഓഫ് കളിക്കുമെന്നാണ് കരുതേണ്ടത്. ഇവാന്റെ മൈൻഡ് ഗെയിം വിജയിച്ചാലും ഇല്ലെങ്കിലും ദിമിത്രിയോസ് പ്ലേ ഓഫ് കളിച്ചാൽ തന്നെ ബ്ലാസ്റ്റേഴ്‌സിനത് മുൻ‌തൂക്കം നൽകും.

  7. കൂനിന്മേൽ കുരു, പ്ലേ ഓഫിൽ ബ്ലാസ്റ്റേഴ്‌സിന്റെ പ്രധാന താരം കളിക്കില്ലെന്നുറപ്പായി

    Leave a Comment

    ഈ ഐഎസ്എൽ സീസൺ മികച്ച രീതിയിൽ തുടങ്ങുകയും സീസണിന്റെ ആദ്യത്തെ പകുതി കഴിഞ്ഞപ്പോൾ ഒന്നാം സ്ഥാനത്തു നിൽക്കുകയും ചെയ്‌ത കേരള ബ്ലാസ്റ്റേഴ്‌സിന് തിരിച്ചടി നൽകിയത് തുടർച്ചയായ പരിക്കുകളായിരുന്നു. നിരവധി പ്രധാന താരങ്ങൾ പരിക്കേറ്റു പുറത്തു പോയപ്പോൾ ഒന്നാം സ്ഥാനത്തു നിന്നും ബ്ലാസ്റ്റേഴ്‌സ് അഞ്ചാം സ്ഥാനത്തേക്ക് വീണു.

    അഞ്ചാം സ്ഥാനത്താണെങ്കിലും പ്ലേ ഓഫിന് യോഗ്യത നേടാൻ ബ്ലാസ്റ്റേഴ്‌സിന് കഴിഞ്ഞു. പ്ലേ ഓഫിൽ ഒഡിഷ എഫ്‌സിയെ നേരിടാനൊരുങ്ങുന്ന ബ്ലാസ്റ്റേഴ്‌സ് പരിക്കിന്റെ തിരിച്ചടികൾ നേരിടുന്നുണ്ട്. ടീമിന്റെ പ്രധാന സ്‌ട്രൈക്കറായ ദിമിത്രിയോസ് കളിക്കുമോയെന്ന കാര്യത്തിൽ സംശയം നിലനിൽക്കുന്നുണ്ട്. അതിനു പുറമെ ടീമിന്റെ ഫുൾബാക്കായ നവോച്ച സിങ്ങിന് വിലക്കും ലഭിച്ചിരിക്കുകയാണ്.

    നോർത്ത് ഈസ്റ്റ് യുണൈറ്റഡിനെതിരായ മത്സരത്തിൽ എതിരാളിയെ തലകൊണ്ടിടിച്ചതിനു നവോച്ച സിങ്ങിന് ചുവപ്പുകാർഡ് ലഭിച്ചിരുന്നു. അതിനു ശേഷം നടന്ന രണ്ടു മത്സരങ്ങളിൽ താരം പുറത്തിരുന്നു. കഴിഞ്ഞ ദിവസം എഐഎഫ്എഫ് നവോച്ച സിങ്ങിന് മൂന്നു മത്സരങ്ങളിൽ വിലക്കുണ്ടെന്ന് സ്ഥിരീകരിച്ചതോടെയാണ് താരത്തിന് പ്ലേ ഓഫ് മത്സരം നഷ്ടമാകുമെന്ന് ഉറപ്പായത്.

    ഐബാൻ പരിക്കേറ്റു പുറത്തു പോയതോടെ ടീമിൽ സ്ഥിരസാന്നിധ്യമായ നവോച്ച സിങ് മികച്ച പ്രകടനമാണ് നടത്തിയിരുന്നത്. ഐബാൻ പ്ലേ ഓഫ് മത്സരങ്ങൾക്കുള്ള സ്‌ക്വാഡിൽ ഉണ്ടെങ്കിലും മാസങ്ങളോളം പുറത്തിരുന്ന താരത്തെ കളിപ്പിക്കാൻ കഴിയുമോയെന്ന് സംശയമാണ്. അതുകൊണ്ടു തന്നെ ലെഫ്റ്റ് ബാക്ക് സ്ഥാനത്ത് മികച്ചൊരു താരമില്ലാത്തത് ബ്ലാസ്റ്റേഴ്‌സിന് പ്ലേ ഓഫിൽ വലിയൊരു തിരിച്ചടിയാണ്.

  8. പ്ലേ ഓഫ് എതിരാളികൾ ആരെന്നു തീരുമാനമായി, ബ്ലാസ്റ്റേഴ്‌സിന് അഗ്നിപരീക്ഷ

    Leave a Comment

    ഇന്ത്യൻ സൂപ്പർ ലീഗിലെ അവസാനത്തെ മത്സരത്തിൽ കേരള ബ്ലാസ്റ്റേഴ്‌സ് ഇന്നലെ ഹൈദരാബാദ് എഫ്‌സിയെ നേരിട്ടപ്പോൾ മികച്ച വിജയമാണ് സ്വന്തമാക്കിയത്. ദുർബലരായ ഹൈദരാബാദ് എഫ്‌സിയുടെ മൈതാനത്ത് നടന്ന മത്സരത്തിൽ ഒന്നിനെതിരെ മൂന്നു ഗോളുകൾക്കായിരുന്നു ബ്ലാസ്റ്റേഴ്‌സിന്റെ വിജയം. മത്സരത്തിൽ ഇന്ത്യൻ താരങ്ങൾ മികച്ച പ്രകടനമാണ് നടത്തിയത്.

    ബ്ലാസ്‌റ്റേഴ്‌സിനെ സംബന്ധിച്ച് അപ്രധാനമായ മത്സരത്തിന് ശേഷം പ്ലേ ഓഫിൽ എതിരാളികൾ ആരെന്നു തീരുമാനമായിട്ടുണ്ട്. സീസണിൽ ബ്ലാസ്റ്റേഴ്‌സ് അഞ്ചാം സ്ഥാനത്താണ് ഫിനിഷ് ചെയ്‌തത്‌ എന്നതിനാൽ നാലാം സ്ഥാനത്തുള്ള ഒഡിഷ എഫ്‌സിയെയാണ് ബ്ലാസ്റ്റേഴ്‌സ് നേരിടുക. ഒഡിഷ എഫ്‌സി ബ്ലാസ്റ്റേഴ്‌സിനേക്കാൾ മുന്നിലാണ് എന്നതിനാൽ അവരുടെ മൈതാനത്താണ് മത്സരം നടക്കുക.

    ഒഡിഷ എഫ്‌സിയുടെ മൈതാനത്ത് കളിക്കാനിറങ്ങുമ്പോൾ ബ്ലാസ്‌റ്റേഴ്‌സിനെ സംബന്ധിച്ച് വലിയൊരു വെല്ലുവിളി ആ ഗ്രൗണ്ടിൽ ഇതുവരെയുള്ള ടീമിന്റെ പ്രകടനമാണ്. ഒരിക്കൽപോലും ഒഡിഷയുടെ മൈതാനത്ത് വിജയം നേടാൻ കേരള ബ്ലാസ്റ്റേഴ്‌സിന് കഴിഞ്ഞിട്ടില്ല. പരിക്കിന്റെ പ്രശ്‌നങ്ങൾ കാരണം ബ്ലാസ്റ്റേഴ്‌സ് മോശം ഫോമിലാണെന്നത് ആരാധകർക്ക് ആശങ്ക നൽകുന്നു.

    എന്നാൽ മത്സരത്തിൽ വിജയിച്ചാൽ അത് ചരിത്രം കുറിക്കലാകും. ഒഡിഷയുടെ മൈതാനത്ത് ആദ്യമായി വിജയിക്കുക എന്നതിനൊപ്പം ഒരുപാട് തിരിച്ചടികളുടെ ഇടയിൽ നേടുന്ന വലിയൊരു നേട്ടമായിരിക്കും. ഇവാൻ വുകോമനോവിച്ചിന്റെ തന്ത്രങ്ങളും ബ്ലാസ്റ്റേഴ്‌സ് താരങ്ങളുടെ ആത്മവിശ്വാസത്തോടെയുള്ള പൊരുതലും ടീമിന് വിജയം സമ്മാനിക്കുമെന്ന പ്രതീക്ഷയിലാണ് ആരാധകർ.

  9. ഒറ്റയടിക്ക് നാല് താരങ്ങളെ നഷ്‌ടമായേക്കും, ഹൈദരാബാദിനെതിരെ ബ്ലാസ്റ്റേഴ്‌സിന് തീക്കളി

    Leave a Comment

    ഇന്ത്യൻ സൂപ്പർ ലീഗിന്റെ ഈ സീസണിലെ അവസാനത്തെ മത്സരത്തിനായി കേരള ബ്ലാസ്റ്റേഴ്‌സ് ഇന്ന് കളത്തിലിറങ്ങുകയാണ്. ഈ സീസണിൽ ഐഎസ്എല്ലിൽ ഏറ്റവും മോശം ഫോമിലുള്ള ഹൈദരാബാദ് എഫ്‌സിയാണ് ബ്ലാസ്റ്റേഴ്‌സിന്റെ എതിരാളികൾ. കേരള ബ്ലാസ്‌റ്റേഴ്‌സിനെ സംബന്ധിച്ച് പ്ലേ ഓഫിന് മുൻപുള്ള ഒരു തയ്യാറെടുപ്പ് എന്നതിനപ്പുറം മത്സരത്തിന് യാതൊരു പ്രാധാന്യവുമില്ല.

    എന്നാൽ ഈ മത്സരത്തിന് ബ്ലാസ്റ്റേഴ്‌സിന്റെ ഇനിയുള്ള മുന്നോട്ടുപോക്കിൽ ഒരുപാട് സ്വാധീനം ചെലുത്താൻ കഴിയുമെന്നത് ശ്രദ്ധിക്കേണ്ട കാര്യമാണ്. ഇന്നത്തെ മത്സരത്തിൽ പരിശീലകന്റെയും താരങ്ങളുടെയും ചുവടൊന്നു പിഴച്ചാൽ നാല് ബ്ലാസ്റ്റേഴ്‌സ് താരങ്ങൾക്കാണ് സസ്‌പെൻഷൻ വാങ്ങി പ്ലേ ഓഫിൽ കളിക്കാനുള്ള സാധ്യത പൂർണമായും ഇല്ലാതാവുക.

    ടീമിന്റെ പ്രതിരോധതാരമായ പ്രീതം കോട്ടാൽ, ഫുൾ ബാക്കായ സന്ദീപ് സിങ്, മധ്യനിരയിലെ മലയാളി താരമായ മുഹമ്മദ് അസ്ഹർ എന്നിവരെല്ലാം മൂന്നു മഞ്ഞക്കാർഡുകൾ വാങ്ങിയിട്ടുണ്ട്. ഒരു മഞ്ഞക്കാർഡ് കൂടി നേടിയാൽ അവർക്ക് അടുത്ത മത്സരത്തിൽ സസ്പെഷൻ ലഭിക്കും. അതുകൊണ്ടു തന്നെ ഇന്നത്തെ മത്സരത്തിൽ ഈ താരങ്ങളെ ഇറക്കുന്നത് സാഹസം തന്നെയാണ്.

    കഴിഞ്ഞ മത്സരത്തിൽ ഇന്ത്യൻ താരങ്ങൾക്ക് കൂടുതൽ അവസരം ബ്ലാസ്റ്റേഴ്‌സ് പരിശീലകൻ നൽകിയിരുന്നു. ഈ മത്സരം ദുർബലമായ ടീമിനെതിരെയാണ് എന്നതിനാൽ റിസ്‌കുള്ള താരങ്ങളെ മുഴുവൻ അദ്ദേഹം ഒഴിവാക്കാനോ അല്ലെങ്കിൽ ഏതാനും മിനുട്ടുകൾ മാത്രം ഇറക്കാനോ ആണ് സാധ്യത. എന്തായാലും ഈ താരങ്ങൾ കളത്തിലുള്ള സമയത്തെല്ലാം ബ്ലാസ്റ്റേഴ്‌സ് ആരാധകർക്ക് ആശങ്ക തന്നെയാണ്.

  10. ക്യാപ്റ്റൻ ലിത്വാനിയയും പ്ലേഓഫ് കളിക്കാനുണ്ടായേക്കില്ല, ബ്ലാസ്റ്റേഴ്‌സിന് മറ്റൊരു തിരിച്ചടി കൂടി

    Leave a Comment

    ഇന്ത്യൻ സൂപ്പർ ലീഗിന്റെ പ്ലേ ഓഫ് മത്സരങ്ങൾ അടുത്തിരിക്കെ കേരള ബ്ലാസ്റ്റേഴ്‌സിന് തിരിച്ചടി വർധിക്കുന്നു. നിലവിൽ പുറത്തു വരുന്ന റിപ്പോർട്ടുകൾ പ്രകാരം ബ്ലാസ്റ്റേഴ്‌സിന്റെ ലിത്വാനിയൻ സ്‌ട്രൈക്കർ ഫെഡോർ ചെർണിച്ചും പരിക്കിന്റെ പിടിയിലാണ്. ഇതോടെ ബ്ലാസ്റ്റേഴ്‌സിന് പ്ലേ ഓഫിൽ വിദേശസ്‌ട്രൈക്കർമാർ ഇല്ലാതെ കളിക്കേണ്ടി വരുന്ന സാഹചര്യമാണുള്ളത്.

    ബ്ലാസ്റ്റേഴ്‌സുമായി ബന്ധപ്പെട്ട വൃത്തങ്ങളിൽ നിന്നും പുറത്തു വരുന്ന റിപ്പോർട്ടുകൾ പ്രകാരം ഫെഡോർ ചെർണിച്ചിന് ഹാംസ്ട്രിങ് ഇഞ്ചുറിയാണ് പറ്റിയിരിക്കുന്നത്. ഫുട്ബോൾ താരങ്ങളെ സംബന്ധിച്ച് ഗുരുതരമായ പരിക്കാണ് ഹാംസ്ട്രിങ് ഇഞ്ചുറി. പരിക്ക് ഗുരുതരമാണെങ്കിൽ ബ്ലാസ്റ്റേഴ്‌സ് താരത്തിന് മാസങ്ങളോളം പുറത്തിരിക്കേണ്ടി വരുമെന്നതിൽ സംശയമില്ല.

    അതേസമയം ഫെഡറിന്റെ പരിക്കിന്റെ ഗുരുതരാവസ്ഥ എത്രത്തോളമുണ്ടെന്ന് വ്യക്തമല്ല. ചെറിയ പരിക്കാനെങ്കിൽ താരം പെട്ടന്ന് തന്നെ ഫിറ്റ്നസ് വീണ്ടെടുത്തേക്കും. പ്ലേ ഓഫ് മത്സരങ്ങൾ ആരംഭിക്കാൻ ഒരാഴ്‌ച ബാക്കിയുള്ളതിനാൽ അത്രയും സമയം ലഭിക്കും. അതേസമയം പരിക്ക് സാരമുള്ളതാണെങ്കിൽ ഈ സീസണിലിനി ഫെഡോർ കളിക്കാനുള്ള സാധ്യതയില്ല.

    ഫെഡോർ കൂടി പുറത്തായാൽ ഒരു വിദേശസ്‌ട്രൈക്കർ പോലുമില്ലാത്ത ബ്ലാസ്റ്റേഴ്‌സ് പ്ലേ ഓഫ് മത്സരങ്ങൾ കളിക്കേണ്ട അവസ്ഥയാണുള്ളത്. നിലവിൽ ടീമിലുള്ള സ്‌ട്രൈക്കർമാരായ ദിമിത്രിയോസ്, പെപ്ര, ജസ്റ്റിൻ ഇമ്മാനുവൽ എന്നിവരെല്ലാം പരിക്കിന്റെ പിടിയിലാണ്. ഇന്ത്യൻ താരമായ ഇഷാൻ പണ്ഡിറ്റയെ പൂർണമായതും ആശ്രയിക്കേണ്ട സാഹചര്യമാണ് ടീമിനുള്ളത്.