Tag Archive: England Cricket Team

  1. സഞ്ജുവും ധവാനുമെല്ലാം അറിയാന്‍, ലങ്ക ദഹനം നടത്തി ഇംഗ്ലണ്ട്

    Leave a Comment

    ശ്രീലങ്കയ്ക്കെതിരായ സ്വന്തം നാട്ടില്‍ നടന്ന ടി20 പരമ്പര അനായാസം സ്വന്തമാക്കി ഇംഗ്ലണ്ട്. രണ്ടാം ടി20യില്‍ ഡക്ക്വര്‍ത്ത് ലൂയിസ് നിയമ പ്രകാരമാണ് ഇംഗ്ലണ്ട് ജയിച്ചത്. ടോസ് നേടി ബാറ്റിങ്ങിന് ഇറങ്ങിയ ശ്രീലങ്ക 20 ഓവറില്‍ ഏഴ് വിക്കറ്റ് നഷ്ടത്തില്‍ 111 റണ്‍സാണ് നേടിയത്. ഇതിനിടെ മഴയെത്തിയതോടെ ഇംഗ്ലണ്ടിന്റെ വിജയലക്ഷ്യം 18 ഓവറില്‍ 103 ആക്കി കുറച്ചു.

    16.1 ഓവറില്‍ അഞ്ച് വിക്കറ്റ് മാത്രം നഷ്ടത്തില്‍ ഇംഗ്ലണ്ട്  ലക്ഷ്യം മറികടന്നു. ഇതോടെ മൂന്ന് മത്സരങ്ങളുടെ പരമ്പര ആതിഥേയര്‍ സ്വന്തമാക്കി.

    പുറത്താവാതെ 29 റണ്‍സ് നേടിയ ലിയാം ലിവിങ്സ്റ്റണാണ് ഇംഗ്ലണ്ടിനെ വിജയത്തിലേക്ക് നയിച്ചത്. സാം ബില്ലിങ്സ് 24 റണ്‍സെടുത്തു. ജേസണ്‍ റോയ് (17), ജോണി ബെയര്‍സ്റ്റോ (0), ഡേവിഡ് മലാന്‍ (4), ഓയിന്‍ മോര്‍ഗന്‍ (11) എന്നിവരാണ് പുറത്തായ മറ്റുതാരങ്ങള്‍. സാം കറന്‍ (16) ലിവിങ്സ്റ്റണിനെപ്പെം പുറത്താവാതെ നിന്നു. വാനിഡു ഹസരങ്ക ലങ്കയ്ക്കായി രണ്ട് വിക്കറ്റ് വീഴ്ത്തി.

    നേരത്തെ 39 റണ്‍സെടുത്ത കുശാല്‍ മെന്‍ഡിസ് മാത്രമാണ് ശ്രീലങ്കന്‍ നിരയില്‍ തിളങ്ങിയിരുന്നത്. കുശാല്‍ പെരേര (21), ഇസുരു ഉഡാന (19) എന്നിവര്‍ മാത്രമാണ് രണ്ടക്കം കണ്ട മറ്റുതാരങ്ങള്‍. ധനുഷ്‌ക ഗുണതിലക (3), അവിഷ്‌ക ഫെര്‍ണാണ്ടോ (6), നിരോഷന്‍ ഡിക്വെല്ല (3), ദസുന്‍ ഷനക (8), ഹസരങ്ക (3) എന്നിവരാണ് പുറത്തായ മറ്റുതാരങ്ങള്‍. അകില ധനഞ്ജയ (2) ഉഡാനയ്ക്കൊപ്പം പുറത്താവാതെ നിന്നു.

    ലോക ടെസ്റ്റ് ചാമ്പ്യന്‍ഷിപ്പ് കഴിഞ്ഞതോടെ ഇന്ത്യയ്ക്കിനി ഇനി അടുത്തത് ലങ്കന്‍ പര്യടനമാണ് ഉളളത്. രാഹുല്‍ ദ്രാവിഡിന് കീഴില്‍ ഇന്ത്യന്‍ യുവനിരയാണ് ശ്രീലങ്കയെ അവരുടെ നാട്ടില്‍ നേരിടുന്നത്.

  2. റോബിന്‍സന് പകരക്കാനെ നിശ്ചയിച്ചു, വെട്ടിലായി ഇംഗ്ലീഷ് ക്രിക്കറ്റ് ബോര്‍ഡ്

    Leave a Comment

    എട്ടുവര്‍ഷം മുമ്പ് നടത്തിയ വംശീയ അധിക്ഷേപത്തിന്റെ പേരില്‍ ടീമില്‍ നിന്നും പുറത്താക്കപ്പെട്ട ഓലി റോബിന്‍സന് പകരക്കാരനെ നിശ്ചയിച്ച് വെട്ടിലായിരിക്കുകയാണ് ഇംഗ്ലീഷ് ക്രിക്കറ്റ് ബോര്‍ഡ്. പകരക്കാരനായി ഇംഗ്ലണ്ട് ടീമിലേക്ക് വിളിയെത്തിയത് ഡോം ബെസിലും സമാനമായ രീതിയില്‍ നേരത്തെ വംശീയ അധിക്ഷേപം നടത്തിയിട്ടുണ്ടെന്നാണ് ആരാധകര്‍ സോഷ്യല്‍ മീഡിയയില്‍ പരതി കണ്ടെത്തിയിരിക്കുന്നത്.

    ഇംഗ്ലണ്ട് ടീമില്‍ കളിക്കാന്‍ വിളിയെത്തിയതോടെ ഡോം ബെസ് തന്റെ ട്വിറ്റര്‍ അക്കൗണ്ട് ഒഴിവാക്കുകയാണ് ആദ്യം ചെയ്തത്. ഇതോടെ ക്രിക്കറ്റ് ആരാധകര്‍ താരത്തിന്റെ മറ്റ് സോഷ്യല്‍ മീഡിയ അക്കൗണ്ടുകള്‍ കുത്തിപ്പൊക്കി. ഇന്ത്യന്‍ താരങ്ങള്‍ക്കും ഇന്ത്യയ്ക്കുമെതിരെയാണ് ബെസിന്റെ അധിക്ഷേപം എന്നതാണ് മറ്റൊരു ശ്രദ്ധേയമായ കാര്യം.

    ബെസ് 2013ലെ ചാമ്പ്യന്‍സ് ട്രോഫി പോരാട്ടത്തില്‍ ദേശീയ ഗാനം ചൊല്ലാനായി എത്തിയ ഇന്ത്യന്‍ ടീമിനെ അവഹേളിക്കുന്ന തരത്തില്‍ ഇന്‍സ്റ്റഗ്രാമിലിട്ട പോസ്റ്റാണ് ആരാധകര്‍ ഇപ്പോള്‍ കുത്തിപ്പൊക്കിയിരിക്കുന്നത്. ഇന്ത്യന്‍ ദേശീയ ഗാനത്തെ അവഹേളിക്കുന്ന കുറിപ്പും അന്ന് പോസ്റ്റ് ചെയ്ത ചിത്രത്തിനൊപ്പം ചേര്‍ത്തിരുന്നു. ‘ഏറ്റവും പരിഹാസ്യമായ ദേശീയ ഗാനം’ എന്നാണ് താരം ഇന്ത്യന്‍ ദേശീയ ഗാനത്തെ പറഞ്ഞത്.

    മുന്‍ ഇന്ത്യന്‍ നായകന്‍ മഹേന്ദ്ര സിങ് ധോണിയെ കളിയാക്കുന്ന തരത്തില്‍ ഇട്ട ഇന്‍സ്റ്റഗ്രാം പോസ്റ്റും ആരാധകര്‍ പ്രചരിപ്പിക്കുന്നുണ്ട്. കളിക്കിടെ ബാറ്റ് മാറ്റാനായി ഒരുങ്ങുന്ന ധോണിയുടെ ചിത്രം പങ്കിട്ടായിരുന്നു പരിഹാസം. ‘നിങ്ങള്‍ക്ക് കളിക്കാന്‍ എത്ര ബാറ്റുകള്‍ വേണം’. ‘ധോണി’ എന്നും ‘വിഡ്ഢി’ എന്നും ഹാഷ്ടാഗിട്ടായിരുന്നു ഈ ചിത്രം പങ്കിട്ടത്.

    ഇതോടെ ബെസിനെതിരെ കടുത്ത പ്രതിഷേധമാണ് ഇപ്പോള്‍ ട്വിറ്ററില്‍ ഉയരുന്നത്. ഡോം ബെസിനെതിരെയും നടപടിയെടുക്കണമെന്നാണ് ആരാധകര്‍ ഇംഗ്ലണ്ട് ക്രിക്കറ്റ് ബോര്‍ഡിനോട് ആവശ്യപ്പെടുന്നത്. എന്തായാലും ഡോം ബെസിന്റെ കാര്യവും ഏതാണ്ട് തീരുമാനമായി എന്നാണ് ആരാധകര്‍ പറയുന്നത്. ചിലര്‍ ഇപ്പോള്‍ തന്നെ താരത്തിന് ഗുഡ്ബൈ പറഞ്ഞു കഴിഞ്ഞു.

  3. ക്രിക്കറ്റിനെ പുതിയ തലത്തിലേക്ക് ഉയര്‍ത്തിയ സൗന്ദര്യ റാണി, ഏറ്റവും മികച്ച വിക്കറ്റ് കീപ്പറെന്ന് ഗില്‍ക്രിസ്റ്റ് വിശേഷിപ്പിച്ച താരം

    Leave a Comment

    ധനേഷ് ദാമോദരന്‍

    ഡാനി ഹെസലിന്റെ പന്ത് ഓസീസ് താരം ജോഡി ഫീല്‍ഡ്‌സ് റിവേഴ്‌സ് സ്വീപ്പ് ചെയ്യുമ്പോള്‍ ഒരാളുടെയും ചിന്തയില്‍ പോലും അസാധ്യമായ വിധത്തിലാണ് സുന്ദരിയായ ആ വിക്കറ്റ് കീപ്പര്‍ അപാരമായ ആന്റിസിപ്പിഷനിലൂടെ ക്യാച്ച് ഒറ്റക്കൈയില്‍ ഒതുക്കിയത്. ഒരു പുരുഷ വിക്കറ്റ് കീപ്പര്‍ക്കു പോലും അസാധ്യമായ റിഫ്‌ളക്ഷന്‍ അതിനെ ലോക ക്രിക്കറ്റിലെ ഏറ്റവും മികച്ച ഒരു ക്യാച്ച് ആക്കി മാറ്റിയപ്പോള്‍ അമ്പയര്‍ ഇയാന്‍ ഗൗള്‍ഡും കാണികളും താരങ്ങളും ബാറ്റ്‌സ്മാനും തരിച്ചു നില്‍ക്കുകയായിരുന്നു .

    വെറുതെയല്ല 2006 മുതല്‍ 13 വര്‍ഷത്തെ കരിയറില്‍ തന്നിലൂടെ ലോക വനിതാ ക്രിക്കറ്റിന് പുതിയ മാനങ്ങള്‍ നല്‍കിയ ഇംഗ്ലീഷ് സുന്ദരി സാറ ടെയ്‌ലറെ പുരുഷ വനിതാ ക്രിക്കറ്റിലെ ഏറ്റവും മികച്ച വിക്കറ്റ് കീപ്പര്‍ എന്ന്‌സാക്ഷാല്‍ ആദം ഗില്‍ക്രിസ്റ്റ് പോലും വിശേഷിപ്പിച്ചത് .

    കഴിവും തനതായ ശൈലിയും കൊണ്ട് വനിതാ ക്രിക്കറ്റിനെ പുതിയ തലത്തിലേക്ക് കൊണ്ടു സാറ വനിതാ ക്രിക്കറ്റിന്റെ മുഖവും ശബ്ദവുമായിരുന്നു . വനിതാ ക്രിക്കറ്റില്‍ പ്രൊഫഷനലിസം കൊണ്ടുവന്നതും സാറയുടെ സംഭാവനയാണ് .

    മറ്റുള്ളവരില്‍നിന്നും വ്യത്യസ്തതമായി സ്പീഡ് ഗ്‌ളൗ വര്‍ക്കുകള്‍ , ലെഗ് സൈഡില്‍ വരുന്ന പന്തുകളില്‍ മറ്റാര്‍ക്കും സാധിക്കാത്ത തരത്തില്‍ സ്റ്റംപ് ചെയ്യല്‍ , ഫാസ്റ്റ് ബൗളര്‍മാര്‍ എറിയുമ്പോഴും സ്റ്റംപിന് തൊട്ടടുത്ത് നില്‍ക്കുന്ന ട്രേഡ് മാര്‍ക്ക് സ്റ്റാന്‍ഡ്, റിഫ്‌ലക്‌സ് ക്യാച്ചുകള്‍ ,അസാമാന്യ റണ്ണൗട്ടുകള്‍ ,ബാറ്റ്‌സ്മാന്‍ ഒരു നിമിഷം ക്രീസിനു വെളിയിലാകുമ്പോഴേക്കും പ്രതികരിക്കുന്ന കഴുകന്‍ കണ്ണുകള്‍, ബാറ്റിങ്ങിലാണെങ്കില്‍ നിരന്തരമായ റിവേഴ്‌സ് സ്വീപ്പുകള്‍ ,ഫ്‌ളിക് ഷോട്ടുകള്‍ ,സ്‌ട്രേറ്റ് ബൗണ്ടറിയിലേക്കുതിര്‍ക്കുന്ന തകര്‍പ്പന്‍ ഷോട്ടുകള്‍

    തന്റെ കയ്യില്‍ പന്തെത്തിക്കഴിഞ്ഞാല്‍ ബാറ്റ്‌സ്മാന്‍ പുറത്താകുമെന്ന് അവരെ തോന്നിപ്പിക്കാന്‍ കഴിയുന്ന മാനസിക ആധിപത്യം സാറക്ക് കരിയറിലുടനീളം നല്‍കിയെന്ന് അവകാശപ്പെടാം .

    ബ്രൈറ്റണ്‍ കോളേജില്‍ പഠിക്കുന്ന സമയത്ത് ഫുട്‌ബോള്‍ പ്രേമം തലയ്ക്കു കയറിയ സാറയുടെ ക്രിക്കറ്റ് മിടുക്ക് കോളേജില്‍ വന്ന ഒരു ക്രിക്കറ്റ് കോച്ച് കണ്ടെത്തിയതോടെയാണ് സാറയുടെ കരിയറില്‍ ഒരു വഴിത്തിരിവ് സംഭവിക്കുന്നത് . 2005 ല്‍ അന്താരാഷ്ട്ര അരങ്ങേറ്റത്തിന് മുന്‍പ് ഹോളി കോവിനൊപ്പം 16കാരിയായ സാറയ്ക്കും ബ്രൈറ്റണ്‍ കോളേജിന്റ പുരുഷ ടീമിന്റെ ഫസ്റ്റ് ഇലവനില്‍ സ്ഥാനം നല്‍കിയത് വലിയ ചര്‍ച്ചയായി .എതിര്‍ത്തും പിന്തുണച്ചും .കൃത്യം 10 വര്‍ഷം കഴിഞ്ഞ് സാറ ആസ്‌ട്രേലിയയില്‍ മെന്‍സ് ഗ്രേഡ് ക്രിക്കറ്റില്‍ പുരുഷ ടീമിനു വേണ്ടി കളിച്ച ആദ്യ വനിതയായപ്പോള്‍ ചരിത്രം ആവര്‍ത്തിച്ചത് യാദൃശ്ചികം മാത്രം .

    2006 ഇന്ത്യക്കെതിരെ ഇറങ്ങുമ്പോള്‍ സാറയ്ക്ക് പ്രായം വെറും 17 ആയിരുന്നു . 4 ആമത്തെ ഏകദിനത്തില്‍ ഇന്ത്യക്കെതിരെ 61 റണ്‍സുമായി തുടങ്ങിയ അവര്‍ വൈകാതെ ആസ്‌ട്രേലിയക്കെതിരെ തന്റെ കന്നി സെഞ്ചുറി കണ്ടെത്തി. രണ്ടുവര്‍ഷത്തിനുശേഷം ടോണ്ടനില്‍ ഇന്ത്യക്കെതിരായ മാച്ചില്‍ പുറത്താകാതെ 75 റണ്‍സ് നേടി ടീമിന് 10 വിക്കറ്റ് ജയം നേടിക്കൊടുത്ത ഇന്നിംഗ്‌സില്‍ സ്വന്തം സ്‌കോര്‍ 16 ലെത്തിയപ്പോള്‍ വനിതാ ഏകദിന ക്രിക്കറ്റില്‍ 1000 റണ്‍സ് തികച്ച പ്രായം കുറഞ്ഞ വനിതാ ക്രിക്കറ്റര്‍ ആയി സാറ ചരിത്രമെഴുതി . 7 ഫോറുകളും 1 സിക്‌സറും സാറ നേടിയപ്പോള്‍ ഇന്ത്യ നേടിയ 102 റണ്‍സ് ഓസീസ് 24.3 ഓവറില്‍ മറികടന്നു. സഹ ഓപ്പണര്‍ കരോളിന്‍ ആറ്റ്കിന്‍ 24 റണ്‍സുമായി ഒരുഭാഗത്ത് നങ്കൂരമിട്ടു കളിച്ചു .

    2008 സാറയുടെ കരിയറിലെ സുവര്‍ണ്ണ വര്‍ഷമായിരുന്നു .ഇംഗ്‌ളണ്ട് ആഷസ് ആര്‍ട്‌സ് നിലനിര്‍ത്തി. സൗത്ത് ആഫ്രിക്കെതിരായ രണ്ടാം ഏകദിനത്തില്‍ ലോഡ്‌സില്‍ ടീം 3 വിക്കറ്റിന് 310 റണ്‍സ് നേടിയപ്പോള്‍ 133 പന്തില്‍ 9 ഫോറുകളും 1 സിക്‌സറുമടക്കം 129 റണ്‍സടിച്ച സാറ 155 പന്തില്‍ 12 ഫോറുകളടക്കം 145 റണ്‍ നേടിയ കരോളിന്‍ അറ്റ്കിന്‍സിനൊപ്പം ഓപ്പണിങ്ങ് വിക്കറ്റില്‍ 268 റണ്‍സിന്റെ റെക്കോര്‍ഡ് കൂട്ടുകെട്ട് സൃഷ്ടിച്ച മത്സരത്തില്‍ ഇംഗ്‌ളണ്ട് ജയിച്ചത് 225 റണ്‍സിനായിരുന്നു .

    അടുത്തവര്‍ഷം നടന്ന 2009ഠ 20 ലോകകപ്പ് ഇംഗ്‌ളണ്ട് നേടിയപ്പോള്‍ സാറ നിര്‍ണായക സംഭാവനകള്‍ നല്‍കി ..അതേവര്‍ഷം ഓസീസിനെതിരെ 120 റണ്‍സ് അടിച്ചുകൂട്ടിയ സാറ 1973 ല്‍ എനിഡ് ബ്ലാക്ക് വെല്‍ കുറിച്ച് 118 റണ്‍സിന്റെ ഇംഗ്‌ളീഷ് റെക്കോര്‍ഡ് മറികടക്കുകയുണ്ടായി .

    ഓരോ സീസണിലും മെച്ചപ്പെട്ടു വന്ന സാറ 2012ലും 2013ലും കഇഇ വുമെന്‍ ക്രിക്കറ്റര്‍ ഓഫ് ദ ഇയര്‍ ബഹുമതി നേടിയതിനു പുറമെ തൊട്ടടുത്ത വര്‍ഷം കഇഇ ഏകദിന ക്രിക്കറ്റര്‍ കൂടിയായി തെരഞ്ഞെടുക്കപ്പെട്ടു .

    സാറ ആകെ കരിയറില്‍ കളിച്ചത് 226 മത്സരങ്ങളില്‍ .അതില്‍ ആദ്യ 158 മത്സരങ്ങള്‍ പിന്നിടുന്ന സമയത്തും വനിതാ ക്രിക്കറ്റില്‍ സെന്‍ട്രല്‍ കോണ്‍ട്രാക്ട് ഇല്ലാത്ത കാലമായിരുന്നു .അവര്‍ക്ക് ബാറ്റിംഗ്, കീപ്പിങ്ങ് മികവുകള്‍ മെച്ചപ്പെടുത്തുവാന്‍ പ്രത്യേക കോച്ചിംഗ് പോലും കിട്ടിയിരുന്നില്ല. ജന്മസിദ്ധമായ വാസന മാത്രം മുതല്‍കൂട്ടി ഒറ്റക്ക് മുന്നേറിയ സാറ വനിതാ ക്രിക്കറ്റില്‍ വിപ്ലവങ്ങള്‍ക്ക് അരങ്ങൊരുക്കി .

    2015ലെ സാറ ക്രിക്കറ്റ് ലോകത്ത് മറ്റൊരു ചരിത്രം സൃഷ്ടിച്ചു. ആസ്‌ട്രേലിയയുടെ മെന്‍സ് ഗ്രേഡ് ക്രിക്കറ്റില്‍ 26കാരിയായ സാറ നോര്‍ത്തേണ്‍ ഡിസ്ട്രിക്കിന് വേണ്ടി പോര്‍ട്ട് അഡലെയ്ഡിനെതിരെ പാഡണിഞ്ഞത് മറ്റൊരു വിപ്‌ളവമായിരുന്നു .അന്ന് സാറ പറഞ്ഞത് ഞാന്‍ വെറും ഒരു സ്ത്രീയെന്നതിലുപരി ഒരു ക്രിക്കറ്റര്‍ എന്ന നിലയില്‍ അംഗീകരിക്കപ്പെട്ടതില്‍ അഭിമാനിക്കുന്നു എന്നാണ.

    2016 ല്‍ മികച്ച ഫോമില്‍ തിളങ്ങി നില്‍ക്കുമ്പോഴാണ് ട്രെസ് കോത്തിക് ,ട്രോട്ട് തുടങ്ങിയ പ്രമുഖ ഇംഗ്ലീഷ് കളിക്കാരെ ബാധിച്ച വിഷാദരോഗം സാറയേയും പിടി കൂടിയത് .ഇന്ത്യയോട് ഠ20 ലോകകപ്പില്‍ തോറ്റതിന് പുറമെ 5 മാച്ചില്‍ വെറും 49 റണ്‍സ് മാത്രം നേടാന്‍ കഴിഞ്ഞതോടെ
    കളി ആസ്വദിക്കാന്‍ പറ്റാതെ പോയ സാറ ഹോട്ടല്‍ മുറിയില്‍ ഒറ്റക്ക് അടച്ചിട്ടിരിക്കുക അവള്‍ പലരുടെയും പരിഹാസത്തിന് പാത്രമാകുക പോലും ചെയ്തു. പത്തുമാസം അവര്‍ ക്രിക്കറ്റില്‍ നിന്നും മാറി നിന്നു .

    കോച്ച് മാര്‍ക് റോബിന്‍സണ്‍ സപ്പോര്‍ട്ട് ചെയ്തപ്പോള്‍ സാറ 2017 തന്നെ തന്റെ കവര്‍ ഡ്രൈവുകളുമായി വീണ്ടും വാര്‍ത്തയായി .2017 ലെ ഏക ദിന ലോകകപ്പില്‍ 49.5 ശരാശരിയില്‍ സാറ 396 റണ്‍സ് അടിച്ചുകൂട്ടി. ഒപ്പം സെമിഫൈനലില്‍ നേടിയ 54 റണ്‍സും ഫൈനലില്‍ നേടിയ 45 റണ്‍സും ടീമിന് സമ്മാനിച്ചത് ടുര്‍ണമെന്റ് കിരീടം കൂടിയായിരുന്നു . അതേ ടൂര്‍ണ്ണമെന്റില്‍ ബ്രിസ്റ്റോളില്‍ സൗത്താഫ്രിക്കക്കെതിരെ സാറ തന്റെ ഉയര്‍ന്ന സ്‌കോറും കണ്ടെത്തി. 49 പന്തില്‍ 50 ലെത്തിയ സാറക്ക് 100 തികക്കാന്‍ പിന്നീട് വേണ്ടിവന്നത് 31 പന്തുകള്‍ മാത്രമായിരുന്നു. 40 ആം ഓവറില്‍ ഷാബ്‌നിം ഇസ്മയിലിന്റ ഓവറില്‍ 5 ഫോറുകള്‍ കണ്ടെത്തിയ സാറ നേടിയത് 147 റണ്‍സായിരുന്നു .ഒപ്പം 118 പന്തില്‍ സെഞ്ച്വറി തികച്ച ടമി ബെമണ്ടിനൊപ്പം ചേര്‍ന്ന് രണ്ടാം വിക്കറ്റില്‍ 272 റണ്‍സിന്റെ ലോക റെക്കോര്‍ഡും പടുത്തുയര്‍ത്തിയപ്പോള്‍ ഇംഗ്ലണ്ട് നേടിയത് 5 വിക്കറ്റിന് 375 റണ്‍സ് . അന്ന് ചേസ് ചെയ്ത സൗത്താഫ്രിക്ക 9 വിക്കറ്റിന് 305 റണ്‍സ് നേടിയപ്പോള്‍ അതും ഒരു ലോക റെക്കോര്‍ഡ് ആയി. വനിതാ ക്രിക്കറ്റില്‍ രണ്ട് ടീമുകളും 300 കടന്ന ആദ്യ മത്സരം . കൂടാതെ മാച്ചില്‍ പിറന്ന 678 റണ്‍സ് മറ്റൊരു ലോക റെക്കോര്‍ഡ് ആയി .ഇംഗ്‌ളണ്ട് മത്സരം ജയിച്ചത് 68 റണ്‍സിനായിരുന്നു .

    പക്ഷേ വിഷാദരോഗം സാറയെ വിടാതെ പിന്തുടര്‍ന്നു.വീണ്ടുമൊരു തിരിച്ചുവരവിനായി അവള്‍ ശ്രമിച്ചെങ്കിലും 2019 ടി ട്വന്റി ലോകകപ്പിനുള്ള ടീമില്‍ നിന്നും സ്വയം പിന്മാറിയ സാറ മുപ്പതാം വയസ്സില്‍ എന്നെന്നേക്കുമായി കളി നിര്‍ത്തി .ആഷസിലെ സമനിലയില്‍ അവസാനിച്ച ടെസ്റ്റില്‍ 5 റണ്‍സ് നേടി സാറേ ഇന്റര്‍നാഷണല്‍ ക്രിക്കറ്റിനോട് വിടചൊല്ലി .പക്ഷേ അപ്പോഴേക്കും അവര്‍ ചരിത്രമെഴുതി കഴിഞ്ഞിരുന്നു. 226 മാച്ചുകളില്‍ 6533 റണ്‍സ് നേടിയ സാറക്കു മുന്നില്‍ മുന്‍ ഇംഗ്‌ളീഷ് ക്യാപ്റ്റന്‍ ചാര്‍ലട്ട് എഡ്ര്‍ഡ്‌സ് മാത്രം . 232 പുറത്താക്കലുകളുമായി ലോക റെക്കോര്‍ഡ് സ്ഥാപിച്ച സാറക്ക് അടുത്തെങ്ങും ആരുമുണ്ടായിരുന്നില്ല . ഇന്റര്‍നാഷണല്‍ വനിതാ ക്രിക്കറ്റില്‍ 100 സ്റ്റംപിങ്ങ് അവകാശപ്പെടാന്‍ മറ്റൊരാളില്ല . മാത്രമല്ല പുരുഷ വനിതാ ക്രിക്കറ്റില്‍ ഠ20 ല്‍ 50 സ്റ്റംപിങ്ങ് നടത്തിയ ഒരേയൊരു താരമാണ് സാറ. തീര്‍ന്നില്ല ഠ20 ല്‍ 2000 റണ്‍സ് നേടിയ ഒരേയൊരു വിക്കറ്റ്കീപ്പര്‍ സാറ മാത്രം . മൂന്ന് വിജയ് മൂന്നുതവണ ഐസിസി പ്ലെയര്‍ ഓഫ് ദ ഇയറിനെ കൂടാതെ രണ്ട് ലോകകപ്പുകള്‍ കൂടി നേടി അവസാന ഘട്ടത്തിലും വിക്കറ്റിന് സാറയുടെ നേട്ടങ്ങള്‍ സമാനതകളില്ലാത്തതാണ് .

    കരിയറിലെ അവസാന സീരീസിലും സാറയുടെ മിന്നലാട്ടം കണ്ടിരുന്നു .2019 ലെ ആഷസ് പരമ്പരയില്‍ നതാലിയ സില്‍വറിന്റെ ലെഗ് സൈഡില്‍ എറിഞ്ഞ നിരുപദ്രവമായ പന്തില്‍ എല്ലിസ പെറിക്ക് കാലൊന്ന് തെറ്റിയപ്പോള്‍ പന്തിനെ റാഞ്ചിയെടുത്ത് മിന്നല്‍ സ്റ്റംപിങ്ങ് നടത്തിയപ്പോള്‍ പെറി അന്തം വിട്ട് നിന്നു പോയി .ഇംഗ്ലണ്ടിന്റെ തന്നെ കീപ്പര്‍ ബെന്‍ ഫോക്‌സിനെയിം തന്റെ ടീം മേറ്റ് ആമി ജോണ്‍സിനെയും ഇതിഹാസം ധോണിയെയും ഏറെ ഇഷ്ടപ്പെടുന്ന സാറ ആര്‍സനണല്‍ ഫുട്‌ബോള്‍ ക്‌ളബ്ബിന്റെ കടുത്ത ആരാധിക കൂടിയാണ് .

    കൗണ്ടിയില്‍ സസെക്‌സിനുവേണ്ടി കളിച്ചിരുന്ന സാറ പിന്നീട് സസ്സക്‌സിന്റെ തന്നെ സീനിയര്‍ മെന്‍സ് ടീമിന്റെ കോച്ച് ആയി വീണ്ടും ഒരു ചരിത്രമെഴുതി . കളിക്കളത്തിന് പുറത്തും തന്റെ സൗന്ദര്യം കൊണ്ട് വാര്‍ത്തകളില്‍ നിറഞ്ഞ സാറ യുകെ ഹെല്‍ത്ത് വിഭാഗം സ്ത്രീകളുടെ ശാരീരിക പ്രശ്‌നങ്ങളുമായി ബന്ധപ്പെട്ട് നടത്തിയ ഫോട്ടോസ് സീരീസിന്റെ ഭാഗമായി നഗ്‌നയായി സ്റ്റംപ് ചെയ്ത ബയ്ല്‍ ഇളക്കുന്ന ഫോട്ടോ 2019 ലെ ഏറ്റവും വൈറലായിരുന്നു ഫോട്ടോകളില്‍ ഒന്നായിരുന്നു .

    ഇന്റര്‍നാഷണല്‍ മാച്ചുകളിലെ 6000 ത്തിലധികം റണ്‍സുകളും 7 സെഞ്ചുറികള്‍ക്കുമൊപ്പം കീപ്പിങ്ങിലും വനിതാ ക്രിക്കറ്റിലും വിപ്ലവം സൃഷ്ടിച്ച സാറയുടെ ഫ്രീ സ്‌ട്രോക്ക് പ്ലേ പോലെ തന്നെ പുഞ്ചിരി നിറഞ്ഞ ആ സുന്ദര മുഖത്തെ ഇഷ്ടപ്പെടാത്ത ക്രിക്കറ്റ്‌പ്രേമികള്‍ ഉണ്ടാകില്ല .

    കടപ്പാട്: മലയാളി ക്രിക്കറ്റ് സോണ്‍

  4. കടുത്ത തീരുമാനത്തിനൊരുങ്ങി ഇംഗ്ലീഷ് ക്രിക്കറ്റ് ടീം, കൈയ്യടിക്കടാ

    Leave a Comment

    സഹകളിക്കാരായ മുഈന്‍ അലിക്കും ജോഫ്ര ആര്‍ച്ചര്‍ക്കും നേരെ സോഷ്യല്‍ മീഡിയയില്‍ ഉയര്‍ന്ന അധിക്ഷേപങ്ങളില്‍ പ്രതിഷേധിച്ച് കടുത്ത നടപടി സ്വീകരിക്കാന്‍ ഒരുങ്ങി ഇംഗ്ലീഷ് താരങ്ങള്‍. ഇതിന്റെ ഭാഗമായി സോഷ്യല്‍ മീഡിയ തന്നെ ഉപേക്ഷിക്കാന്‍ തയ്യാറെന്ന് ഇംഗ്ലണ്ട് ക്രിക്കറ്റ് താരം സ്റ്റുവര്‍ട്ട് ബ്രോഡ് വ്യക്തമാക്കി.

    സോഷ്യല്‍ മീഡിയകൊണ്ട് ഒരുപാട് ഉപകാരങ്ങളുണ്ട് എന്നാല്‍ കൃത്യമായ ഒരു നിലപാടെടുക്കാന്‍ അത് കുറച്ച് കാലത്തേക്ക് വേണ്ടന്ന് വെക്കാനും താന്‍ ഒരുക്കമാണെന്ന് സ്റ്റുവര്‍ട്ട് ബ്രോഡ് പറഞ്ഞു.

    ഇക്കാര്യത്തില്‍ ഒരു തീരുമാനം ഡ്രസിങ് റൂമില്‍ നിന്നാണ് വരേണ്ടത്. ടീമിന് ഒരു മാറ്റം ആവശ്യമാണെന്ന് തോന്നിയാല്‍ ഞങ്ങളുടെ വിശ്വാസങ്ങള്‍ എന്തൊക്കെയാണെന്ന് തലപ്പത്തുള്ള വ്യക്തികളോട് തുറന്ന് പറയും. ഇത് ശരിക്കും ശക്തമായ സന്ദേശമാണ്. ഇത് തീര്‍ച്ചയായും നല്ല ഫലമുണ്ടാകുമെന്നാണ് ഉറച്ച വിശ്വാസം- സ്റ്റുവര്‍ട്ട് ബ്രോഡ് പറഞ്ഞു.

    കഴിഞ്ഞ ദിവസം മുഈന്‍ അലി ക്രിക്കറ്റ് കളിച്ചില്ലായിരുന്നെങ്കില്‍ ഐഎസില്‍ ചേര്‍ന്നേനെയെന്ന് പ്രശസ്ത എഴുത്തുകാരി തസ്ലീമ നസ്രിന്‍ പരിഹസിച്ചിരുന്നു. ഇതിനെതിരെ രൂക്ഷ വിമര്‍ശനവുമായി ഇംഗ്ലീഷ് താരങ്ങല്‍ രംഗത്ത് വന്നിരുന്നു. തസ്ലീമയുടെ പരിഹാസം ഏറെ ചര്‍ച്ച ചെയ്യപ്പെടുകയും ചെയ്തിരുന്നു.

  5. കെപി എന്തായിരുന്നെന്ന് കങ്കാരുക്കള്‍ ആദ്യമായി തിരിച്ചറിഞ്ഞ ദിവസം

    Leave a Comment

    സനല്‍കുമാര്‍ പദ്മനാഭന്‍

    തന്റെ കൂടെയുള്ളവരുടെ കൈക്കരുത്തിലും കരളുറപ്പിലും ഉള്ള അമിതാത്മവിശ്വാസത്തില്‍ , കാടിനെയറിയാതെ കാടിനെ അടക്കി ഭരിക്കുന്നവനെകുറിച്ചു അറിയാതെ അയാളുടെ കാടിനുള്ളിലെ നിയമങ്ങളെ കുറിച്ചു അറിയാതെ ബ്രിസ്റ്റോളിലെ കൊടുങ്കാടിനുള്ളില്‍ നാറ്റ്വെസ്റ്റ് നിധി തേടി പോയി അപകടം സ്വയം ചോദിച്ചു വാങ്ങിയ റിക്കി പോണ്ടിങ് എന്ന നായകനെ ഇന്നും ഓര്‍മയുണ്ട്…..

    ബ്രിസ്റ്റോളില്‍ മൂന്നാം ഏകദിനവിജയം എന്ന നിധി തേടിയുള്ള അയാളുടെ യാത്രക്ക് ( 252 റണ്‍സ് പ്രതിരോധിക്കുക ) വിലങ്ങു തടി ആയി എതിരെ വന്ന സ്ട്രോസ് , ട്രെസ്‌കൊതിക് , ഫ്‌ലിന്റോഫ് , വോന്‍ , കോളിങ്വുഡ് തുടങ്ങിയ വന്യജീവികളും കാട്ടാറുകളും കാട്ടു മരങ്ങളും തീവ്രവിഷമുള്ള ഇഴജീവികളും എല്ലാം, അയാളുടെ കൂടെയുള്ള കൈക്കരുത്തു കൊണ്ടും കുതന്ത്രം കൊണ്ടും മായാജാലം കാണിക്കുന്ന മഗ്രാത്ത് , ഗില്ലസ്പി , കാസ്പറോവിച്, ബ്രോഗ് എന്നിവരുടെ മുന്നില്‍ പിടഞ്ഞു വീണപ്പോള്‍ ബ്രിസ്റ്റോളില്‍ സ്‌കോര്‍ കാര്‍ഡില്‍ തെളിഞ്ഞു വന്ന ഇംഗ്ലണ്ട് 150/5 അക്കങ്ങള്‍ കണ്ടപ്പോള്‍ പോണ്ടിങ് നിധി തന്റെ കയ്യില്‍ ഇരിക്കുന്ന സ്വപ്നങ്ങള്‍ കണ്ടു തുടങ്ങിയിരുന്നു….

    ഇത് വരെയുള്ള യാത്രയില്‍ തങ്ങളുടെ വഴിക്കു കുറുകെ വന്നു പെട്ട പ്രതിബന്ധങ്ങളെ എല്ലാം തച്ചു തകര്‍ത്തു നില്‍ക്കുന്ന തന്റെ പോരാളികളെ കണ്ടപ്പോള്‍ അയാളുടെ കണ്ണിലെ തിളക്കത്തിന് പതിയെ ധാര്‍ഷ്ട്യത്തിന്റെ ഭാഷ്യം കലരുക ആയിരുന്നു….
    സ്‌കോര്‍ കാര്‍ഡില്‍ 160 ഇല്‍ നില്‍കുമ്പോള്‍ തങ്ങള്‍ക്കു തടസമായി നിന്ന ജോണ്‍സ് എന്ന കാട്ടുവള്ളിയെയും ബ്രോഗ് തുടച്ചു നീക്കിയപ്പോള്‍ , രികയേര്‍ഡ് റണ്‍ റേറ്റ് 7.76 എന്ന നിലയില്‍ 12 ഓവറില്‍ 93 റണ്‍സ്

    എതിരാളികള്‍ക്ക് ഏറെക്കുറെ അപ്രാപ്യമായ ലക്ഷ്യം തന്നെ എന്നുറപ്പിച്ചു പോണ്ടിങ് തന്റെ മുന്നില്‍ തെളിഞ്ഞു വന്ന നിധിപേടകത്തില്‍ ആര്‍ത്തിയില്‍ പൊതിഞ്ഞ ആവേശത്തോടെ കൈ വെച്ചു എടുക്കാന്‍ തുടങ്ങവേ ആണു , തന്റെ കയ്യുടെ മുകളില്‍ എന്തോ ഭാരം കയറ്റി വച്ചത് പോലെ അയാള്‍ക്ക് തോന്നിയത് !

    ഇരുണ്ട വെളിച്ചത്തില്‍ തന്റെ കയ്യുടെ മുകളില്‍ ഇരിക്കുന്നത് മറ്റൊരു കൈപ്പത്തി ആണെന്ന് പതിയെ ഒരല്പം ഞെട്ടലോടെ അയാള്‍ തിരിച്ചറിഞ്ഞു , പതിയെ മുഖമുയര്‍ത്തി ആ കൈപ്പത്തിയുടെ ഉടമയുടെ മുഖം തിരഞ്ഞ അയാളുടെ കണ്ണില്‍ ആദ്യം തടഞ്ഞത് തിളക്കമുള്ളൊരു കടുക്കന്‍ ആയിരുന്നു

    ചെവിയില്‍ തിളങ്ങുന്ന കടുക്കനും , നടുവില്‍ മുകളിലേക്കു ഉയര്‍ത്തി വെച്ച ചെമ്പിച്ച മുടിയും , കൈ തെറുത്തു വെച്ച ഹാഫ് സ്ലീവ് ജേഴ്‌സിയും ആ ജേഴ്‌സിയുടെ പിറകിലെ 24 എന്ന നമ്പറും കണ്ടപ്പോള്‍ പോണ്ടിങ്ങിന്റെ ചുണ്ടില്‍ നിന്നും വിറയലോടെ ആ പേര് പിറന്നു വീണു ‘ കെ പി ‘

    ആ കാടിനെ ഒരു ലോലിപോപ്പ് പോലെ നുണഞ്ഞു നടക്കുന്നവന്‍ !

    ബ്രിസ്റ്റോള്‍ എന്ന കാടിനെ അടക്കി ഭരിക്കുന്ന രാജാവും കാട്ടില്‍ നിധി തേടിയെത്തിയ കൊള്ളക്കാരുമായുള്ള യുദ്ധം അവിടെ തുടങ്ങുക ആയിരുന്നു….

    മിഴികളില്‍ ആളിക്കത്തുന്ന അഗ്‌നിയുമായി നില്‍ക്കുന്ന അയാള്‍ക്കെതിരെ പോണ്ടിങ് രംഗത്തിറക്കിയ കരുത്തന്മാരില്‍ കരുത്തനായ ഗില്ലസ്പിയെ തൂക്കിയെടുത്തു നിലത്തടിച്ചു ഒരോവറില്‍ 17 റണ്‍സ് എടുത്തതോടെ പോണ്ടിങ് അപകടം മണത്തു തുടങ്ങിയിരുന്നു…..
    12 ഓവര്‍ നീണ്ടു നില്‍ക്കും എന്ന് കരുതിയ യുദ്ധം 9.3 ഓവറില്‍ അവസാനിക്കുമ്പോള്‍ പോരാട്ട ഭൂവില്‍ ഒറ്റ ഒരാള്‍ മാത്രമേ ജീവനോടെ ഉണ്ടായിരുന്നുള്ളു

    65 ബോളില്‍ 91 റണ്‍സോടെ അജയ്യനായി നിന്ന കെ പി…..!
    2005 നാറ്റ്വെസ്‌റ് സീരിസ് മൂന്നാം ഏകദിനം..
    ഓസ്ട്രേലിയ 252
    മൈക് ഹസി 84.
    ഇംഗ്ലണ്ട് 253( 47.3)
    കെ പി 91**
    മാന്‍ ഓഫ് ദി മാച്ച് : കെ പി…

    കടപ്പാട്: മലയാളി ക്രിക്കറ്റ് സോണ്‍

  6. അരങ്ങേറ്റത്തില്‍ അവന്‍ ഉണ്ടാക്കിയ ഇംപാക്റ്റ് മറ്റാര്‍ക്കെങ്കിലും സ്വപ്‌നം കാണാനാകുമോ?

    Leave a Comment

    ഷമീല്‍ സ്വലാഹ്

    പതിവുപോലെ ഓസ്‌ട്രേലിയക്കു മുന്നില്‍ ഇംഗ്ലണ്ട് അടിയറവ് വെക്കാന്‍ പോകുന്നു. ത്രില്ലര്‍ ഗെയിമുകളൊന്നും അത്രകണ്ട് പ്രതീക്ഷിക്കണ്ട.. സാധാരണ പോലെ ഈ പരമ്പരയും കഴിയുമ്പോള്‍ ട്രോഫിയും പിടിച്ച് നില്‍ക്കുന്ന ഓസ്‌ട്രേലിയന്‍ ടീമിന്റെ ചിത്രങ്ങള്‍ മാധ്യമങ്ങളില്‍ അച്ചടിച്ചു വരുന്നു…..

    2005 ആഷസ് പരമ്പര തുടക്കം കുറിക്കുന്നതിന് മുന്നോടിയായി ചില കരുതലുകള്‍ ഇങ്ങനെയെല്ലാമായിരുന്നു. എന്നാല്‍. പരമ്പരയിലെ ആദ്യ ടെസ്റ്റ് മത്സരം ലോര്‍ഡ്‌സില്‍ സമാപിച്ചപ്പോള്‍ 239 റണ്‍സിന് ഓസ്‌ട്രേലിയയില്‍ നിന്നേറ്റ തോല്‍വിക്കിടയിലും ഇംഗ്ലീഷ് നിരയില്‍ ഒരു ‘സ്പാര്‍ക്ക്’ ലോകമെമ്പാടുമുള്ള ക്രിക്കറ്റ് ആരാധകര്‍ക്കിടയില്‍ ശ്രദ്ധയൂന്നി.

    മഗ്രാത്ത്, ബ്രെറ്റ് ലീ, ഷെയിന്‍ വോണ്‍, ജെയ്‌സന്‍ ഗില്ലെസ്പി….. തുടങ്ങി ഓസ്‌ട്രേലിയുടെ എക്കാലത്തേയും മികച്ചൊരു ബൗളിങ്ങ് യൂണിറ്റിനെതിരെ തന്റെ ആദ്യ ടെസ്റ്റ് മത്സരത്തിനിറങ്ങി, ഇംഗ്ലീഷ് ബാറ്റിങ്ങില്‍ ഇരു ഇന്നിങ്ങ്‌സിലും ടോപ് സ്‌കോററായ, നിര്‍ഭയനായി ബാറ്റ് ചെയ്‌തൊരു ഫ്രീക്കന്‍ യുവാവിലേക്കായിരുന്നു ആ ശ്രദ്ധകള്‍ പതിഞ്ഞത്. ഒരു fighting prowess മെന്റാലിറ്റിയുള്ള യുവാവ്..

    അത് ഇംഗ്ലീഷ് ടീമിനും ഊര്‍ജ്ജം കൂടി.. ഫ്‌ലിന്റോഫിനും, വോണിനും, സ്‌ട്രോസിനും,, ഹാര്‍മിസനുമെല്ലാം… ശൗര്യം കൂടി. പിന്നീടുള്ള മത്സരങ്ങളില്‍ വീറും വാശിയും വര്‍ധിച്ചു. മുന്‍കാല ‘ആഷസ് ത്രില്ലറുകള്‍’ മടങ്ങി വന്നു.

    ടെലിവിഷന് മുന്നില്‍ കൂടുതല്‍ സമയം ചിലവിടാന്‍ ലോകമെമ്പാടുമുള്ള ക്രിക്കറ്റ് ആരാധര്‍ സമയം കണ്ടെത്തി. ഈ നൂറ്റാണ്ടില്‍ വെച്ച് ലോകത്തില്‍ ഏറ്റവും കൂടുതല്‍ ക്രിക്കറ്റ് കളിയാരാധകര്‍ വീക്ഷിച്ച ടെസ്റ്റ് പരമ്പരയിലൊന്നിലേക്കായി ഈ പരമ്പരക്ക് രൂപമാറ്റവും സംഭവിച്ചു.

    തുടര്‍ച്ചയായി 8 പരമ്പരകള്‍ക്കൊപ്പം., രണ്ട് പതിറ്റാണ്ടോളമായി അന്യം നിന്നിരുന്ന ആഷസ് കിരീടം ഇംഗ്ലണ്ട് തിരിച്ച് പിടിച്ചു. കൂട്ടത്തില്‍ ഏറെ നിര്‍ണ്ണായക പങ്ക് വഹിച്ച്, ഏറ്റവും കൂടുതല്‍ റണ്‍ ശേഖരം സ്വന്തം പേരിലാക്കി പരമ്പരയവസാനിച്ച ആ യുവാവിന്റെ സ്മാഷിങ്ങ് ബാറ്റിങ്ങിനൊപ്പം, അയാളും കളി ആരാധകരുടെ മനസ്സുകളില്‍ ഇടം നേടി.

    സ്‌ട്രോങ്ങ് ഡ്രൈവുകള്‍, അതി മനോഹരമായ ഹുക്ക്&പുള്‍ ഷോട്ടുകള്‍., ആരാധകരുടെ ആവേശമായ സ്വിച്ച്- ഹിറ്റ്, പിന്നെ എല്ലാത്തിനുമുപരി അദ്ദേഹത്തിന്റെ സിഗ്‌നേചര്‍ ഷോട്ട് ‘flamingo’ യും.

    ഇതുകൊണ്ടെല്ലാം തന്നെ ആരാധകരുടെ പ്രിയപ്പെട്ട ‘KP’ എന്ന പേരില്‍ അറിയപ്പെട്ട്, അരങ്ങേറ്റ പരമ്പരയില്‍ തന്നെ… ചരിത്രത്തില്‍ ഏറ്റവും കൂടുതല്‍ ഇംപാക്ട് ഉണ്ടാക്കി. പില്‍കാലത്ത് ഇതിഹാസങ്ങളുടെ പട്ടികയിലേക്ക് നടന്ന് കയറിയ കെവിന്‍ പീറ്റേഴ്‌സനായിരുന്നു ആ യുവാവ്.

    കടപ്പാട്: മലയാളി ക്രിക്കറ്റ് സോണ്‍

     

  7. ഇംഗ്ലണ്ടിന് അടുത്ത തിരിച്ചടി, ആ താരം പുറത്ത്

    Leave a Comment

    ഇന്ത്യക്കെതിരെ ആദ്യ ടെസ്റ്റിന് ഒരുങ്ങുന്ന ഇംഗ്ലണ്ടിനെ തേടി ഒരു ദുഖവാര്‍ത്ത. യുവതാരം സാക് ക്രൗളിക്ക് പരമ്പരയിലെ ആദ്യ രണ്ട് ടെസ്റ്റുകള്‍ നഷ്്മാവും. കൈക്കുഴയ്ക്കേറ്റ പരിക്കിനെ തുടര്‍ന്ന് താരത്തിന് കളിക്കാനാവില്ലെന്ന് ഇംഗ്ലീഷ് ക്രിക്കറ്റ് ബോര്‍ഡ് വ്യക്തമാക്കി.

    ഗ്രൗണ്ടിലേക്ക് പരിശീലനത്തിനായി ഇറങ്ങുന്നതിനിടെ താരം തറയില്‍ കൈ കൂത്തി വീഴുകയായിരുന്നുവെന്നാണ് ടീം മാനേജ്മെന്റിന്റെ വിശദീകരണം. പിന്നീട് സ്‌കാന്‍ ചെയ്തശേഷം ക്രൗളിയുടെ കാര്യത്തില്‍ തീരുമാനമെടുക്കുകയായിരുന്നു.

    മൂന്നാമനായിട്ടാണ് താരം കളിക്കാറുള്ളത്. എന്നാല്‍ ശ്രീലങ്കന്‍ പര്യടനത്തില്‍ ഓപ്പണറുടെ റോളിലായിരുന്നു താരം. സ്ഥിരം ഓപ്പണര്‍ റോറി ബേണ്‍സ് അവധിയില്‍ പ്രവേശിച്ചതോടെയാണ് ക്രൗളി ഓപ്പണറായത്.

    എന്നാല്‍ ബേണ്‍സ് തിരിച്ചെത്തിയതോടെ താരത്തെ മൂന്നാം സ്ഥാനത്ത് കളിപ്പിക്കാന്‍ പദ്ധതിയുണ്ടായിരുന്നു,. ഇതിനിടെയാണ് പരിക്കേല്‍ക്കുന്നത്.

    എന്തായാലും ശ്രീലങ്കന്‍ പര്യടനത്തില്‍ അത്ര മികച്ച ഫോമിലൊന്നും അല്ലായിരുന്നു 23കാരന്‍. നാല് ഇന്നിങ്സില്‍ നിന്നായി 35 റണ്‍സ് മാത്രമാണ് താരം നേടിയിരുന്നത്. പരിക്കില്‍ നിന്നും മുക്തനായ ഒല്ലീ പോപ്പ് ടീമിനൊപ്പം ചേര്‍ന്നിന്നുണ്ട്. കൊവിഡിനെ തുടര്‍ന്ന് ശ്രീലങ്കന്‍ പര്യടനം നഷ്ടമായ മൊയീന്‍ അലിയും സ്‌ക്വാഡിലുണ്ടാവും.

     

  8. ഡ്രെസ്സിംഗ് റൂമില്‍ നിന്നും രഹസ്യ സന്ദേശങ്ങള്‍, വിവാദം കത്തുന്നു

    Leave a Comment

    ഇംഗ്ലണട് ദക്ഷിണാഫ്രിക്ക ടി20 മത്സരത്തിനിടെയുണ്ടായ ചില സംഭവവികാസങ്ങളില്‍ ക്രിക്കറ്റ് ലോകത്ത് ചര്‍ച്ചകള്‍engl ചൂടുപിടിക്കുകയാണ്. മത്സരത്തിനിടെ മൈതാനത്ത് നില്‍ക്കുന്ന ഇംഗ്ലീഷ് കളിക്കാര്‍ക്ക് ഡ്രസിങ് റൂമില്‍ നിന്നും രഹസ്യ സന്ദേശങ്ങള്‍ ലഭിച്ചതാണ് സംഭവം.

    ടീമിന്റെ അനലിസ്റ്റായ നതാന്‍ ലീമണ്‍ ബാല്‍ക്കണിയില്‍ നിന്ന് രഹസ്യ സന്ദേശങ്ങള്‍ ഇയാന്‍ മോര്‍ഗനും സംഘത്തിനും കൈമാറി. ഇംഗ്ലീഷ് അക്ഷരങ്ങളും സംഖ്യകളും കോര്‍ത്തിണക്കിയ കോഡ് സന്ദേശങ്ങള്‍ ക്ലിപ് ബോര്‍ഡില്‍ തൂക്കിയിട്ട നിലയിലാണ് ക്യാമറ പിടികൂടിയത്.

    c3, 4e എന്നിങ്ങനെ രണ്ടു സന്ദേശങ്ങളാണ് ലീമണ്‍ മൈതാനത്തേക്ക് കൈമാറിയത്. ഇവ മത്സരസാഹചര്യങ്ങളെ കുറിച്ചുള്ള സൂചനകള്‍ നല്‍കുന്നതാണത്രെ.

    എന്നാല്‍ ഇത് വിവാദമായതിന് പിന്നാലെ ഇക്കാര്യത്തില്‍ വിശദീകരണവുമായി ഇംഗ്ലീഷ് വക്താവ് രംഗത്തെത്തി. ‘തത്സമയ വിവര ഉറവിടമെന്നാണ്’ പുതിയ സന്ദേശ സംവിധാനത്തെ ഇംഗ്ലീഷ് മാനേജ്മെന്റ് വിശേഷിപ്പിക്കുന്നത്. ഇതിനായി ക്രിക്കറ്റ് നിയമത്തിലെ പഴുതും ഇംഗ്ലണ്ട് കണ്ടെത്തി. ഇലക്ട്രോണിക് ഉപകരണങ്ങള്‍ ഉപയോഗിച്ച് സന്ദേശങ്ങള്‍ കൈമാറുന്നതിനാണ് ക്രിക്കറ്റില്‍ വിലക്ക്. എന്നാല്‍ ഇവിടെ സന്ദേശം കൈമാറുന്നതിന് പേനയും കടലാസും മാത്രമുള്ള അടിസ്ഥാനരീതി ഇംഗ്ലണ്ട് അവലംബിച്ചു. മാച്ച് റഫറിയില്‍ നിന്നും കാലേകൂട്ടി അനുവാദം വാങ്ങിയതിന് ശേഷമാണ് അനലിസ്റ്റ് സന്ദേശങ്ങള്‍ കൈമാറിയതെന്ന് ടീമിലെ ഫാസ്റ്റ് ബൗളര്‍ മാര്‍ക്ക് വുഡ് പറഞ്ഞു.

    ‘ചട്ടലംഘനമാണെങ്കില്‍ മാച്ച് റഫറി ഈ ആവശ്യം അംഗീകരിക്കില്ലായിരുന്നു. southക്രിക്കറ്റിലെ പുതിയ പതിവായി തത്സമയ വിവര ഉറവിടം മാറാം. ക്രിക്കറ്റിനെ കൂടുതല്‍ മെച്ചപ്പെടുത്തുകയാണ് ഇംഗ്ലണ്ടിന്റെ ലക്ഷ്യം. മൈതാനത്തുള്ള ക്യാപ്റ്റന് വിവരങ്ങള്‍ ലഭിക്കുന്നത് നല്ല കാര്യംതന്നെ’, മത്സരശേഷം മാര്‍ക്ക് വുഡ് മാധ്യമങ്ങളോട് പറഞ്ഞു. ചൊവാഴ്ച്ച നടന്ന മത്സരത്തില്‍ മാര്‍ക്ക് വുഡ് കളിച്ചിരുന്നില്ല.

    കേവലം ഒരു ചെറിയ സഹായം മാത്രമാണ് ആ സന്ദേശങ്ങള്‍. ഇംഗ്ലണ്ട് ടീം പരീക്ഷണാര്‍ത്ഥം നടത്തിയത്. പുതിയ കാലത്ത് ഓരോ മത്സരത്തെക്കുറിച്ചും ഗഹനമായ വിവരം ആവശ്യമാണ്. ഈ പശ്ചാത്തലത്തില്‍ ഇയാന്‍ മോര്‍ഗനും നതാന്‍ ലീമണും ചേര്‍ന്ന് പുതിയൊരു പരീക്ഷണം നടത്തിയെന്നുമാത്രം, ദക്ഷിണാഫ്രിക്കയ്ക്ക് എതിരെ മൂന്നാം ട്വന്റി-20 ജയിച്ചതിന് ശേഷം ഉപനായകന്‍ ജോസ് ബട്ലര്‍ സംഭവത്തില്‍ വിശദീകരണം നല്‍കി.

    അനലിസ്റ്റ് നല്‍കുന്ന നിര്‍ദ്ദേശം കൈക്കൊള്ളണോ വേണ്ടയോ എന്ന് തീരുമാനിക്കാന്‍ മൈതാനത്തുള്ള ക്യാപ്റ്റന് പൂര്‍ണ സ്വാതന്ത്ര്യമുണ്ടെന്നാണ് സന്ദേശ കൈമാറ്റത്തില്‍ ഇംഗ്ലണ്ട് ടീമിന്റെ വാദം. തീരുമാനങ്ങളെടുക്കാന്‍ ക്യാപ്റ്റനെ ആരും നിര്‍ബന്ധിക്കുന്നില്ലെന്ന് ഇവര്‍ ചൂണ്ടിക്കാട്ടുന്നു. മത്സരം നടക്കവെ വിവിധ ക്രമത്തിലുള്ള രഹസ്യ സന്ദേശങ്ങള്‍ ലീമണ്‍ തയ്യാറാക്കിവെച്ചിരുന്നു. ഇതില്‍ രണ്ടു സന്ദേശങ്ങളാണ് ഇദ്ദേഹം കൈമാറിയതും.

  9. ഇംഗ്ലണ്ട് സൂപ്പര്‍ താരം ടീം വിടുന്നു, ഇനി കളിയ്ക്കുക മറ്റൊരു രാജ്യത്തിനായി

    Leave a Comment

    ഇംഗ്ലണ്ട് സൂപ്പര്‍ താരം ലിയാം പ്ലങ്കറ്റ് ടീം വിടുന്നതിനെ കുറിച്ചുളള ആലോചനയിലാണ്. ഭാവിയില്‍ അമേരിക്കയ്ക്കായി കളിക്കാനാണ് പ്ലങ്കറ്റ് സാധ്യത തേടുന്നത്. ഇംഗ്ലണ്ട് കിരീടം ചൂടിയ 2019 ലെ ഏകദിന ലോകകപ്പില്‍ തകര്‍പ്പന്‍ പ്രകടനം കാഴ്ച്ചവെച്ച താരമാണ് പ്ലങ്കറ്റ്,

    എന്നാല്‍ ലോകകപ്പിന് ശേഷം പ്ലങ്കറ്റ് ടീമില്‍ നിന്ന് പുറത്തായി. പിന്നീട് ദേശീയ ടീമില്‍ തിരിച്ചെത്താനും താരത്തിന് കഴിഞ്ഞിട്ടില്ല. കഴിഞ്ഞ ദിവസം ഇംഗ്ലണ്ട്, പരിശീലനത്തിനായി വിളിച്ച 55 താരങ്ങളില്‍ ഉള്‍പ്പെടാനും പ്ലങ്കറ്റിന് കഴിഞ്ഞിരുന്നില്ല. ഇതോടെയാണ് അമേരിക്കയ്ക്കായി കളിയ്ക്കുന്നതിന്റെ സാധ്യത പ്ലങ്കറ്റ് നേടുന്നത്.

    തന്റെ ഭാര്യ അമേരിക്കന്‍ പൗരയാണെന്നും അതിനാലാണ് ആ സാധ്യത പരിഗണിക്കുന്നതെന്നും പ്ലങ്കറ്റ് പറയുന്നു. അത് വഴി ഇംഗ്ലണ്ട്, യു എസ് എ ടീമുകള്‍ക്ക് വേണ്ടി കളിച്ച താരമെന്ന അപൂര്‍വ്വ നേട്ടം സ്വന്തമാക്കാന്‍ ആഗ്രഹമുണ്ടെന്നുമാണ് പ്ലങ്കറ്റ് കൂട്ടിചേര്‍ത്തു. അതേ സമയം നിലവില്‍ മുപ്പത്തിയഞ്ചുവയസുള്ള പ്ലങ്കറ്റിന്, അമേരിക്കന്‍ ദേശീയ ടീമില്‍ കളിക്കണമെന്നുണ്ടെങ്കില്‍ എത്രയും പെട്ടെന്ന് തന്നെ അങ്ങോട്ടേക്ക് താമസം മാറേണ്ടിവരും. അമേരിക്കന്‍ ടീമില്‍ കളിക്കാന്‍ യോഗ്യനാവണമെങ്കില്‍ 3 വര്‍ഷത്തെ റെസിഡന്‍ഷ്യല്‍ യോഗ്യത വേണം എന്നത് കൊണ്ടാണിത്.

    മാത്രമല്ല ഐസിസിയുടെ നിയമ പ്രകാരം ഒരു രാജ്യത്തിനായി കളിച്ച് നാല് വര്‍ഷം കഴിഞ്ഞാല്‍ മാത്രമാണ് മറ്റൊരു രാജ്യത്തിനായി കളിയ്ക്കാനാകു. ഇതോടെ പ്ലങ്കറ്റിന്റെ ആഗ്രഹം നടക്കുമോയെന്ന് കാത്തിരുന്ന് തന്നെ കാണണം.