പ്രണവ് തെക്കേടത്ത്

ശ്രീലങ്കന്‍ ക്രിക്കറ്റിലെ ഹീറോ പരിവേഷമോ ഇതിഹാസ പദവിയോ ഒന്നും അയാള്‍ക്ക് ചേരാറില്ല ,ടെസ്റ്റ് ക്രിക്കറ്റിലെ ഒരു സ്ഥിര സ്ഥാനവും അയാളില്‍ നിന്നന്യം നിന്നിരുന്നു..

അപ്പോഴും തന്റെ 16 വര്‍ഷം നീണ്ടു നില്‍ക്കുന്ന ആ കരിയറില്‍ ഓര്‍മ്മയില്‍ സൂക്ഷിക്കാവുന്ന ചില ഇന്നിങ്സുകള് അയാള്‍ സമ്മാനിക്കുന്നുണ്ട് ,ഓഫ് സൈഡിലൂടെ ബൗണ്ടറിയേ പുല്‍കുന്ന ആ ഷോട്ടുകള്‍ ക്ലാസിക്കല്‍ ബാറ്റിങ്ങിന്റെ മനോഹാരിതയായി നിറഞ്ഞു നിന്നിരുന്നു ..

2006ല്‍ ഇംഗ്ലീഷുകാരെ അവരുടെ തട്ടകത്ത് വെള്ളപൂശുന്നൊരു ശ്രീലങ്കന്‍ ടീമുണ്ട് ആ പര്യടനത്തിലാണയാളെ അറിയുന്നത് അവിടെ ലീഡ്സിലെ അവസാനമത്സരത്തില്‍ പത്തു വിക്കറ്റിന് ഇംഗ്‌ളീഷുകാരെ കൊന്നുതള്ളിയപ്പോള്‍ 152റണ്‍സോടെ സംഹാര താണ്ഡവ മാടിയിരുന്ന ജയസൂര്യക്കൊപ്പം 102റണ്‍സുമായി തരങ്കയും ഒരറ്റം സുരക്ഷിതമാക്കിയിരുന്നു …

286റണ്ണുകള്‍ 34 ഓവറിനുള്ളില്‍ ആ സഖ്യം അടിച്ചെടുത്തപ്പോള്‍ ആ കാലങ്ങളിലെ ഓപ്പണിങ് റെക്കോര്‍ഡും അവിടെ പിറവി കൊണ്ടിരുന്നു .

അയാളുടേതായ ദിവസങ്ങളില്‍ കണ്ണിനെ കുളിര്‍മ്മയേകുന്ന ഷോട്ടുകളാല്‍ ആനന്ദിപ്പിക്കുമ്പോഴും ആ സ്ഥിരത അയാളില്‍ നിന്നൊരുപാടകലെയായിരുന്നു , അതിനാല്‍ തന്റെ ഏകദിന കരിയറില്‍ ഇതുവരെ നേടിയെടുത്ത ആ 15 സെഞ്ചുറികളും 7000ന് അടുത്തോളം വരുന്ന റണ്ണുകളും ആരുടേയും ശ്രദ്ധയും നേടുന്നില്ല …

പക്ഷെ 2011 വേള്‍ഡ് കപ്പില്‍ തന്റെ കരിയറില്‍ ആദ്യമായി സ്ഥിരതയോടെ ആ ബാറ്റയാള്‍ ചലിപ്പിക്കുന്നുണ്ട് ,ദില്‍ഷന്റെ പന്തിനെ പ്രഹരിക്കാനുള്ള ആ കഴിവുകള്‍ക്ക് അയാള്‍ ഉത്തമ പങ്കാളിയായി മാറിയിരുന്നു ,ചില ട്രിക്കി ചെയ്സുകളില്‍ അദ്ദേഹം ആ ക്ലാസ് പുറത്തെടുത്തിരുന്നു ,അവിടെ രണ്ടു ശതകങ്ങളുടെ സഹായത്താല്‍ 56 എന്ന ആവറേജില്‍ 9മത്സരങ്ങളില്‍ നിന്ന് 395 റന്‍സുകള്‍ സ്വന്തമാക്കിയപ്പോഴും ആരും ആ നാമം ഉച്ചത്തില്‍ പറഞ്ഞിരുന്നില്ല …

ഇന്ത്യക്കെതിരെ കിങ്സ്റ്റണില്‍ നേടിയെടുത്ത 174 റണ്ണുകള്‍ പോലുള്ള ഇന്നിങ്സുകള്‍ ..ഏകദിന കരിയറിലെ 15 സെഞ്ചുറികള്‍ …12 മാന്‍ ഓഫ് ദി മാച്ച് അവാര്‍ഡുകള്‍ …ഏകദിന ക്രിക്കറ്റില്‍ ശ്രീലങ്കക്ക് വേണ്ടി കൂടുതല്‍ റണ്‍സ് സ്വന്തമാക്കിയ ഒന്‍പതാമന്‍ …
തരങ്കയും പാഡ് അഴിക്കുകയാണ് …

കടപ്പാട്: സ്‌പോട്‌സ് പാരഡൈസോ ക്ലബ്