അഫ്ഗാൻ തകർന്നടിഞ്ഞു; ദക്ഷിണാഫ്രിക്ക ഫൈനലിൽ.. പകുതി സമയത്തിൽ അവസാനിച്ച് സെമി ഫൈനൽ
ടി20 ലോകകപ്പ് 2024 സെമി ഫൈനലിൽ ദക്ഷിണാഫ്രിക്ക, അഫ്ഗാനിസ്ഥാനെ ഒൻപത് വിക്കറ്റിന് തകർത്തു ഫൈനൽ ബർത്ത് നേടി. ഇതാദ്യമായാണ് ദക്ഷിണാഫ്രിക്ക ടി20 ലോകകപ്പ് ഫൈനലിൽ പ്രവേശിക്കുന്നത്.. ട്രിനിഡാഡിലെ ബ്രയൻ ലാറ ക്രിക്കറ്റ് സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത അഫ്ഗാനിസ്ഥാൻ വെറും 11.5 ഓവറിൽ 56 റൺസിന് ഓൾ ഔട്ട് ആയി. ദക്ഷിണാഫ്രിക്ക 8.5 ഓവറിൽ 60 റൺസ് നേടി വിജയം സ്വന്തമാക്കി.
അഫ്ഗാനിസ്ഥാൻ ബാറ്റിംഗ് തകർച്ച
ടോസ് നേടി ബാറ്റിംഗ് തിരഞ്ഞെടുത്ത അഫ്ഗാനിസ്ഥാന് തുടക്കം മുതൽ തന്നെ വിക്കറ്റ് നഷ്ടങ്ങളുടെ പരമ്പരയായിരുന്നു. ഓപ്പണർമാരായ റഹ്മാനുള്ള ഗുർബാസും (0) ഇബ്രാഹിം സർദാനും(2), പെട്ടെന്ന് പുറത്തായി. മുഹമ്മദ് നബിയും (0) ഇബ്രാഹിം സദ്രാനും (2) വേഗത്തിൽ പുറത്തായതോടെ ഒരുഘട്ടത്തിൽ അഫ്ഗാനിസ്ഥാൻ 28 റൺസിന് ആറ് വിക്കറ്റ് എന്ന നിലയിലായി.
ഗുൽബദിൻ നായിബും (9), അസ്മത്തുള്ള ഒമർസായി (10), കരീം ജനത്ത് (8) റഷീദ് ഖാൻ(8) എന്നിവർ മാത്രമാണ് ചെറിയ ചെറുത്തുനിൽപ്പെങ്കിലും നടത്തിയത്.
ദക്ഷിണാഫ്രിക്കയുടെ പേസ് ആക്രമണം
ദക്ഷിണാഫ്രിക്കൻ ബൗളർമാരായ ടബ്രൈസ് ഷംസി (3/6), മാർക്കോ ജാൻസെൻ (3/16), കാഗിസോ റബാഡ (2/14) ആൻറിച്ച് നോർട്ജെ (2/7),എന്നിവർ മികച്ച പ്രകടനം പുറത്തെടുത്തപ്പോൾ അഫ്ഗാൻ ബാറ്റർമാർക്ക് മറുപടിയുണ്ടായിരുന്നില്ല.
ദക്ഷിണാഫ്രിക്കയുടെ വിജയം
വെറും 57 റൺസ് എന്ന വിജയലക്ഷ്യം ദക്ഷിണാഫ്രിക്കയ്ക്ക് വലിയ വെല്ലുവിളിയായിരുന്നില്ല. ഓപ്പണർ ക്വിന്റൺ ഡി കോക്ക് (5) വേഗത്തിൽ പുറത്തായെങ്കിലും, റീസ ഹെൻഡ്രിക്‌സും (29*) ഐഡൻ മാർക്രവും (23*) ചേർന്ന് അനായാസം ടീമിനെ വിജയത്തിലെത്തിച്ചു.
മറ്റൊരു സെമിഫൈനലിൽ ഇന്ത്യയും ഇംഗ്ലണ്ടും ഏറ്റുമുട്ടും. മത്സര വിജയികളെ ദക്ഷിണാഫ്രിക്ക ഫൈനലിൽ നേരിടും.