ടി20 ലോകകപ്പിനൊരുങ്ങുന്ന ഇന്ത്യന്‍ ടീമിന് മുന്നറിയിപ്പുമായി മുന്‍ ക്യാപ്റ്റനും ബിസിസിഐ പ്രസിഡന്റുമായ സൗരവ് ഗാംഗുലി. ലോകകപ്പ് അനായാസമായി കാണരുതെന്നും ലോകകപ്പ് പെട്ടെന്ന് സ്വന്തമാക്കാം എന്ന് വിചാരിക്കരുതെന്നും ഗാംഗുലി വ്യക്തമാക്കി.

‘അനായാസമായി ഇന്ത്യക്ക് ചാമ്പ്യന്മാരാവാന്‍ കഴിയില്ല. ടൂര്‍ണമെന്റിലേക്ക് ഇറങ്ങിച്ചെല്ലുമ്പോള്‍ തന്നെ ലോകകപ്പ് ഉയര്‍ത്താമെന്ന് കരുതരുത്. പക്വത കാണിക്കണം. ഏതൊരു ടീമും കടന്നുപോകുന്ന ഘട്ടങ്ങളിലൂടെയാണ് ഇന്ത്യക്കും പോവേണ്ടത്’ ഗാംഗുലി പറഞ്ഞു.

‘ഇന്ത്യന്‍ ടീമിലെ എല്ലാവര്‍ക്കും കഴിവുണ്ട്. റണ്‍സ് കണ്ടെത്താനും വിക്കറ്റ് നേടാനും അവര്‍ക്ക് സാധിക്കും. മാനസികമായി തയ്യാറായിരിക്കുകയെന്നുള്ളത് പ്രധാമാണ്. അവസാന മത്സരത്തിന് ശേഷമാണ് കിരീടം ലഭിക്കൂ. അതിന് മുമ്പ് ഒരുപാട് ക്രിക്കറ്റ് കളിക്കാനുണ്ട്. കിരീടം എന്നതിലുപരി ഓരോ മത്സരവും ജയിക്കാനാണ് നമ്മള്‍ ലക്ഷ്യമിടേണ്ടത്’ ഗാംഗുലി പറഞ്ഞു.

‘ഏത് ചാംപ്യന്‍ഷിപ്പ് ആയാലും ഇന്ത്യന്‍ ടീം കിരീടപ്പോരിന് മുന്നിലുണ്ടാവാറുണ്ട്. ശ്രദ്ധയോടെ കാര്യങ്ങളെ നേരിട്ടാല്‍ മാത്രം മതി. ഫലത്തില്‍ ശ്രദ്ധിക്കേണ്ടതില്ല, ഓരോ മത്സരത്തിലും ഫോക്കസ് ചെയ്യുക’ ഗാംഗുലി വ്യക്തമാക്കി.

ഇതിനോടകം ലോകകപ്പിലെ യോഗ്യത മത്സരങ്ങള്‍ ആരംഭിച്ചിട്ടുണ്ട്. 23ന് മത്സരങ്ങള്‍ക്ക് ഔദ്യോഗിക തുടക്കമാവും. 24ന് പാകിസ്ഥാനെതിരെയാണ് ഇന്ത്യയുടെ ആദ്യ മത്സരം.