ജിങ്കനെ രാജാവാക്കാം, മറ്റെല്ലാ ക്ലബുകളുടേയും ഓഫര്‍ തള്ളാനാവശ്യപ്പെട്ട് ക്ലബുടമ

Image 3
FootballISL

ന്യൂഡല്‍ഹി: മുന്‍ കേരളാ ബ്ലാസ്റ്റേഴ്സ് താരം സന്ദേശ് ജിങ്കന്‍ മുംബൈ എഫ് സിയുടെയും എടികെ മോഹന്‍ഗാന്റെയും ഓഫറുകള്‍ തള്ളണമെന്ന് പരസ്യമായി ആവശ്യപ്പെട്ട് ഒഡീഷാ എഫ് സി ഉടമ രോഹന്‍ ശര്‍മ. പകരം ഒഡീഷ എഫ്‌സിയ്‌ക്കൊപ്പം ചേരണമെന്നാണ് രോഹന്‍ ശര്‍മ്മ ആവശ്യപ്പെടുന്നത്.

ജിങ്കന്‍ ഒഡീഷയ്ക്കൊപ്പം ചേരണം. താനും മറ്റ് താരങ്ങളും ജിങ്കന്റെ കടുത്ത ആരാധകരാണെന്നും രോഹന്‍ ശര്‍മ്മ പറഞ്ഞു. താരത്തെ സൈന്‍ ചെയ്യാന്‍ ക്ലബ്ബ് തയ്യാറാണ്. ജിങ്കന് വേണ്ടി മറ്റ് ക്ലബ്ബുകളുമായി ഏറ്റുമുട്ടാന്‍ ഞങ്ങള്‍ ഒരുക്കമാണ്. അവസാനം വരെ പോരാടും. ഐഎസ്എല്ലിലെ 10 ക്ലബ്ബില്‍ ഏഴ് ക്ലബ്ബുകളും ജിങ്കന് വേണ്ടി ട്രാന്‍സ്ഫര്‍ വിപണിയിലൂണ്ട്’ രോഹന്‍ ശര്‍മ്മ പറഞ്ഞു.

അടുത്തിടെയാണ് ആറ് വര്‍ഷത്തിനൊടുവില്‍ ഇന്ത്യന്‍ താരം സന്ദേശ് ജിങ്കന്‍ ബ്ലാസ്റ്റേഴ്സ് ക്ലബ്ബ് വിട്ടത്. മുമ്പ് തന്നെ മറ്റ് ക്ലബ്ബുകള്‍ തഴഞ്ഞതിനാലാണ് താന്‍ മികച്ച താരമായതെന്ന് ജിങ്കന്‍ അടുത്തിടെ വ്യക്തമാക്കിയിരുന്നു. ബ്ലാസ്റ്റേഴ്സുമായി യാതൊരു പ്രശ്നവുമില്ലെന്നും സ്വന്തം ഇഷ്ടപ്രകാരമാണ് ക്ലബ്ബ് വിട്ടതെന്നും താരം പറഞ്ഞിരുന്നു.

എന്നാല്‍ പുതിയ മാനേജ്മെന്റിനോടുള്ള അതൃപ്തിയാണ് താരം ക്ലബ്ബ് വിടാന്‍ കാരണമെന്നും റിപ്പോര്‍ട്ടുണ്ട്.