കേരള ബ്ലാസറ്റേഴ്‌സ് വിട്ട ഇന്ത്യന്‍ സൂപ്പര്‍ താരം സന്ദേഷ് ജിങ്കന്‍ എഫ്‌സി ഗോവയുമായി അടുക്കുന്നതായി റിപ്പോര്‍ട്ട്. ജിങ്കനോട് അടുത്ത വൃത്തങ്ങളാണ് ഇത് സംബന്ധിച്ച് സൂചനകള്‍ പുറത്ത് വിടുന്നത്. നേരത്തെ സന്ദേഷ് ജിങ്കന്‍ കൊല്‍ക്കത്തിയിലേക്ക് ചേക്കേറുമെന്ന വാര്‍ത്തകളുണ്ടായിരുന്നു.

എന്നാല്‍ അന്തിമ കരാറില്‍ ഇരുവര്‍ക്കും എത്താനാകാതെ പോയതോടെ ജിങ്കന്‍ മറ്റ് സാധ്യതകള്‍ തേടുകയായിരുന്നു. നിലവില്‍ നിരവധി സൂപ്പര്‍ താരങ്ങളെ ഇതിനോടകം തന്നെ നഷ്ടപ്പെട്ട എഫ്‌സി ഗോവ ജിങ്കനെ ടീമിലെത്തിച്ച് മുഖം രക്ഷിക്കാനുളള നീക്കമാണ് നടത്തുന്നത്.

എഎഫ്സി ചാമ്പ്യന്‍ഷിപ്പില്‍ ടീമിനെ ശക്തമാക്കാന്‍ ജിങ്കനെ പോലൊരു താരം ടീമില്‍ വേണമെന്നാണ് എഫ്‌സി ഗോവയുടെ വിലയിരുത്തല്‍. പുതിയ സ്പാനിഷ് പരിശീലകന്‍ ജുവാന്‍ ഫെറാണ്ടോയ്ക്ക് ജിങ്കനെ ഏതുവിധേനയും ടീമിലെത്തിച്ചാല്‍ കൊള്ളാമെന്നുണ്ട്. ബൗമസിനെ മുംബൈയ്ക്ക് കൈമാറുന്നതിലൂടെ ലഭിക്കുന്ന തുക ജിങ്കനായി ചിലവഴിക്കാനാണ് ഗോവ നീക്കം നടത്തുന്നത്.

നേരത്തെ ജിങ്കന്‍ വിദേശ ക്ലബിലേക്ക് ചേക്കേറിയേക്കും എന്ന റിപ്പോര്‍ട്ടുകളുണ്ടായിരുന്നെങ്കിലും കൊറോണയുടെ പശ്ചാത്തലത്തില്‍ ഇന്ത്യയില്‍ തന്നെ തുടരാനാണ് ജിങ്കന്‍ തീരുമാനിച്ചത്. അതിനിടെയാണ് കൊല്‍ക്കത്ത ജിങ്കനെ സ്വന്തമാക്കിയതായി പ്രമുഖ ബംഗാളി ദിനപത്രം ആനന്ദബസാര്‍ പത്രിക റിപ്പോര്‍ട്ട് ചെയ്തത്.

കഴിഞ്ഞ മാസമാണ് കേരള ബ്ലാസ്റ്റേഴ്സും സന്ദേഷ് ജിങ്കനും വഴിപരിഞ്ഞത്. ഇന്ത്യന്‍ സൂപ്പര്‍ ലീഗിന്റെ ആദ്യ സീസണായ 2014ല്‍ കേരള ബ്ലാസ്റ്റേഴ്സിനൊപ്പം ചേര്‍ന്ന ചണ്ഡീഗഡ് സ്വദേശിയായ ജിംഗന്‍ ക്ലബിനൊപ്പമുള്ള 6 സീസണുകള്‍ക്ക് ശേഷമാണ് കൂടുമാറുന്നത്. 26കാരനായ ജിംഗന്‍ ഇതുവരെ 76 മത്സരങ്ങളില്‍ കേരള ബ്ലാസ്റ്റേഴ്‌സ് ജഴ്‌സി അണിഞ്ഞിട്ടുണ്ട്.

ആരാധകര്‍ ‘ദി വാള്‍’ എന്ന് സ്നേഹപൂര്‍വ്വം വിളിക്കുന്ന സന്ദേഷ് എല്ലായ്പ്പോഴും മൈതാനത്തും പുറത്തും വളരെയധികം അഭിനിവേശവും ഉത്സാഹവും പ്രകടിപ്പിച്ചിട്ടുണ്ട്.

2014ല്‍ തന്റെ ഐഎസ്എല്‍ അരങ്ങേറ്റം മുതല്‍ ഐഎസ്എല്ലിന്റെയും എ.ഐ.എഫ്.എഫിന്റേയും എമേര്‍ജിങ് പ്ലയെര്‍ പുരസ്‌കാരത്തിന് സന്ദേശ് അര്‍ഹനായിരുന്നു. രണ്ട് ഐഎസ്എല്‍ ഫൈനലുകളില്‍ കളിച്ചിട്ടുള്ള സന്ദേശ് വിവിധ അവസരങ്ങളില്‍ ദേശീയ ടീമിന്റെ നായകനുമായിരുന്നു. 2017 ഐഎസ്എല്‍ സീസണില്‍ സന്ദേശ് കേരള ബ്ലാസ്റ്റേഴ്‌സിനെ നയിച്ചിട്ടുണ്ട്. എ.ഐ.എഫ്.എഫ് അര്‍ജുന അവാര്‍ഡിന് നാമനിര്‍ദ്ദേശം ചെയ്യപ്പെട്ട കളിക്കാരന്‍ കൂടിയാണ് ജിങ്കന്‍.