മോർക്കലല്ല, ബൗളിംഗ് പരിശീലകനായി സർപ്രൈസ് ഇന്ത്യൻ താരത്തെ അവതരിപ്പിച്ച് ബിസിസിഐ
മുൻ ഇന്ത്യൻ സ്പിന്നർ സെയ്‌രാജ് ബഹുതുലെയെ ശ്രീലങ്കയ്‌ക്കെതിരായ വൈറ്റ് ബോൾ പരമ്പരയ്ക്ക് ഇന്ത്യയുടെ ബൗളിംഗ് പരിശീലകനായി നിയമിച്ചേക്കുമെന്ന് റിപ്പോർട്ടുകൾ. ജൂലൈ 27 ന് പല്ലെകെലെയിൽ ആരംഭിക്കുന്ന മൂന്ന് ടി20 മത്സരങ്ങളും ഓഗസ്റ്റ് 2, 4, 7 തീയതികളിൽ കൊളംബോയിലെ ആർ. പ്രേമദാസ സ്റ്റേഡിയത്തിൽ നടക്കുന്ന മൂന്ന് ഏകദിനങ്ങളുമാണ് പരമ്പരയിലുള്ളത്.
ബൗളിംഗ് കോച്ചിനെ സംബന്ധിച്ചുള്ള ഔദ്യോഗിക പ്രഖ്യാപനം ബിസിസിഐ ഇതുവരെ നടത്തിയിട്ടില്ല. ബഹുതുലെയുടെ സാന്നിധ്യം ഇന്ത്യൻ ബൗളിംഗ് നിരയ്ക്ക് കൂടുതൽ കരുത്ത് പകരുമെന്ന് പ്രതീക്ഷിക്കുന്നു.
പുതിയ ക്യാപ്റ്റൻമാരും പരിശീലകനും
പുതിയ ക്യാപ്റ്റൻമാരുടെയും, പരിശീലകരുടെയും കീഴിലാണ് ടീം ഇന്ത്യ ഈ പരമ്പരയിൽ ഇറങ്ങുക. ടി20 ടീമിനെ സൂര്യകുമാർ യാദവും ഏകദിന ടീമിനെ രോഹിത് ശർമ്മയും നയിക്കും. ഗൗതം ഗംഭീർ ഇന്ത്യൻ പുരുഷ ക്രിക്കറ്റ് ടീമിന്റെ മുഖ്യ പരിശീലകനായി അരങ്ങേറ്റം കുറിക്കും.
ബഹുതുലെയുടെ അനുഭവ സമ്പത്ത്
51 കാരനായ ബഹുതുലെ, രണ്ട് ടെസ്റ്റുകളിലും എട്ട് ഏകദിനങ്ങളിലും ഇന്ത്യയെ പ്രതിനിധീകരിച്ചിട്ടുണ്ട്. കഴിഞ്ഞ മൂന്ന് വർഷമായി ബാംഗ്ലൂരിലെ ദേശീയ ക്രിക്കറ്റ് അക്കാദമിയിൽ (എൻസിഎ) ബൗളിംഗ് പരിശീലകനായി സേവനമനുഷ്ഠിക്കുന്ന അദ്ദേഹം മുൻ മുഖ്യ പരിശീലകൻ രാഹുൽ ദ്രാവിഡ്, എൻസിഎ തലവൻ വിവിഎസ് ലക്ഷ്മൺ എന്നിവരുടെ കീഴിൽ ഇന്ത്യ എ, ഇന്ത്യൻ ടീമുകളുടെ പരിശീലക ടീമിന്റെ ഭാഗമായും പ്രവർത്തിച്ചിട്ടുണ്ട്.
മോർക്കൽ ഭാവിയിൽ ബൗളിംഗ് പരിശീലകനാകുമോ?
ശ്രീലങ്കൻ പരമ്പരയ്ക്ക് ശേഷം മുൻ ദക്ഷിണാഫ്രിക്കൻ പേസർ മോനെ മോർക്കൽ ഇന്ത്യയുടെ ബൗളിംഗ് പരിശീലകനാകുമെന്നും റിപ്പോർട്ടുകളുണ്ട്. ഗംഭീർ ലഖ്‌നൗ സൂപ്പർ ജയന്റ്‌സിന്റെ ഉപദേഷ്ടാവായിരുന്ന കാലത്ത് മോർക്കലുമായി ഒരുമിച്ചു പ്രവർത്തിച്ചിട്ടുണ്ട്. മോർക്കൽ പാകിസ്ഥാന്റെ ബൗളിംഗ് പരിശീലകനായും സേവനമനുഷ്ഠിച്ചിരുന്നു.
പുതിയ ക്യാപ്റ്റൻന്റെയും, പരിശീലകരുടെയും നേതൃത്വത്തിൽ ഇന്ത്യൻ ടീം ശ്രീലങ്കയ്‌ക്കെതിരെ മികച്ച പ്രകടനം കാഴ്ചവെക്കുമെന്ന് പ്രതീക്ഷിക്കാം.