ചുമച്ചാല്‍ ഇനി ചുവപ്പ് കാര്‍ഡ്, പുതിയ ഫുട്‌ബോള്‍ നിയമം വരുന്നു

ലണ്ടന്‍: കോവിഡ് മഹാമാരിയെ തുടര്‍ന്ന് ഫുട്‌ബോള്‍ കളി മൈതാനത്ത് ചില കര്‍ശന നിയമങ്ങള്‍ ഏര്‍പ്പെടുത്താന്‍ ആലോകിചിക്കുകയാണ് ലോകം മുഴുവനുമുളള വിവിധ കായിക ബോഡികള്‍. ഇതില്‍ ഇംഗ്ലീഷ് ഫുട്ബോള്‍ അസോസിയേഷന്‍ ശ്രദ്ധേയമായ ഒരു തീരുമാനമവുമായി രംഗത്തെത്തിയിരിക്കുകയാണ്.

കളത്തില്‍ ഒരു താരം എതിര്‍ത്താരത്തിന് സമീപത്ത് നിന്നോ അല്ലെങ്കില്‍ ഓഫീഷ്യല്‍സിന് സമീപത്ത് വച്ചോ മനപ്പൂര്‍വ്വം ചുമയ്ക്കുകയാണെങ്കില്‍ റഫറിക്ക് ഇനി മുതല്‍ മഞ്ഞ അല്ലെങ്കില്‍ ചുവപ്പ് കാര്‍ഡുകള്‍ കാണിക്കാനുള്ള അനുമതി നല്‍കി. അനാവശ്യമായ വാക്കുകള്‍ പ്രയോഗിച്ച് അപമാനിക്കുന്ന കുറ്റത്തിന് സമാനമായിരിക്കും ഇനിമുതല്‍ ഇത്തരം നീക്കങ്ങള്‍.

ദൂരെ നിന്ന് സ്വാഭാവികമായി ചുമയ്ക്കുന്നത് ഈ നിയമത്തിന്റെ പരിധിയില്‍ വരില്ല. അതേസമയം കളിക്കിടെ മൈതാനത്ത് കളിക്കാര്‍ തുപ്പുന്നത് തടയാന്‍ റഫറി ശ്രദ്ധിക്കേണ്ടതുണ്ടെന്നും അസോസിയേഷന്‍ പുറത്തിറക്കിയ റിപ്പോര്‍ട്ടില്‍ വ്യക്തമാക്കുന്നു.

നേരത്തെ ഫുട്‌ബോള്‍ കളിക്കളത്തിലെ സബ്‌സ്റ്റിറ്യൂട്ട് മൂന്നില്‍ നിന്നും അഞ്ചാക്കി ഉയര്‍ത്തിയിരുന്നു. കോവിഡ് മഹാമാരിയെ തുടര്‍ന്ന് ലോക്ഡൗണ്‍ ഏര്‍പ്പെടുത്തിയത് മൂലം കളിക്കാര്‍ക്കുണ്ടാകുന്ന ശാരീരിക പ്രശ്‌നങ്ങള്‍ പരിഹരിക്കുന്നതിനാണ് ഫിഫ സ്ബസ്റ്റിറ്റിയൂട്ടുകളുടെ എണ്ണം അഞ്ചായി പുതുക്കിയത്.

You Might Also Like