കോപ്പ അമേരിക്ക കളിക്കാന്‍ ഇന്ത്യയ്ക്ക് ക്ഷണം, വലിയ വാര്‍ത്ത

Image 3
FootballFootball News

കോപ്പ അമേരിക്ക ഫുട്‌ബോള്‍ ടൂര്‍ണമെന്റില്‍ പന്ത് തട്ടാന്‍ ഇന്ത്യക്ക് ക്ഷണം. കോവിഡ് മഹാമാരി കാരണം ഈ വര്‍ഷത്തേക്ക് മാറ്റിവെച്ച ടൂര്‍ണമെന്റിലേക്കാണ് ഇന്ത്യയെ ക്ഷണിച്ചിരിക്കുന്നത്.

ഇക്കാര്യം ആവശ്യപ്പെട്ട് സംഘാടകര്‍ ബന്ധപ്പെട്ടതായി അഖിലേന്ത്യാ ഫുട്‌ബോള്‍ ഫെഡറേഷന്‍ ജനറല്‍ സെക്രട്ടറി കുശാല്‍ ദാസ് സ്ഥിരീകരിച്ചു. ഈ വര്‍ഷം ജൂണ്‍ 11നാണ് കോപ്പ അമേരിക്ക മല്‍സരങ്ങള്‍ ആരംഭിക്കുന്നത്. അര്‍ജന്റീനയും കൊളംബിയയുമാണ് ആതിഥേയര്‍. ടൈംസ് ഓഫ് ഇന്ത്യയാണ് ഇന്ത്യയുടെ പ്രവേശനം വ്യക്തമാക്കി വാര്‍ത്ത റിപ്പോര്‍ട്ട് ചെയ്തത്.

കോപ്പ അമേരിക്ക ടൂര്‍ണമെന്റില്‍ അതിഥി രാജ്യങ്ങളായി മല്‍സരിക്കേണ്ട ആസ്‌ട്രേലിയയും ഖത്തറും പിന്‍മാറിയതോടെയാണ് ഇന്ത്യക്ക് അവസരം കൈവന്നത്. ആസ്‌ട്രേലിയയാണ് അവര്‍ക്ക് പകരക്കാരായി ഇന്ത്യയെ നിര്‍ദ്ദേശിച്ചത്.

അതെ സമയം ഏഷ്യന്‍ ഫുട്‌ബോള്‍ ഫെഡറേഷന്‍ ലോക കപ്പ് യോഗ്യതാ മല്‍സരങ്ങള്‍ മാര്‍ച്ച്, ഏപ്രില്‍ മാസങ്ങളില്‍ നിന്നും ജൂണിലേക്ക് മാറ്റിയതോടെ കോപ്പയില്‍ മല്‍സരിക്കുന്ന കാര്യത്തില്‍ ഇന്ത്യ ഇതുവരെ മറുപടി നല്‍കിയിട്ടില്ല.

ഇന്ത്യക്ക് കൈവന്ന ഭാഗ്യത്തില്‍ ഇന്ത്യന്‍ കോച്ച് ഇഗര്‍ സ്റ്റിമാക് സന്തോഷം പ്രകടിപ്പിച്ചു. ലയണല്‍ മെസ്സി, നെയ്മര്‍, ലൂയിസ് സുവാരസ്, ജെയിംസ് റോഡ്രിഗസ് അടക്കമുള്ളവരോടൊപ്പം കളിക്കുന്നത് ആവേശകരമാകുമെന്നും വലിയ അനുഭവമാകുമെന്നും കോച്ച് പ്രതികരിച്ചു.