പൊരുതിയത് സുന്ദറും ശ്രേയസും മാത്രം, ഇന്ത്യയ്‌ക്കെതിരെ കിവീസ് വിജയലക്ഷ്യം കുറിച്ചു
ഇന്ത്യയ്‌ക്കെതിരെ മൂന്നാം ഏകദിനത്തില്‍ ന്യൂസിലന്‍ഡിന് 220 റണ്‍സ് വിജയലക്ഷ്യം. ടോസ് നഷ്ടമായി ആദ്യം ബാറ്റ് ചെയ്ത ഇന്ത്യ 47.3 ഓവറില്‍ 219 റണ്‍സിന് ഓള്‍ഔട്ടാകുകയായിരുന്നു. അര്‍ധ സെഞ്ച്വറി നേടിയ വാഷിംഗ്ടണ്‍ സുന്ദറാണ് ഇന്ത്യയെ വന്‍ തകര്‍ച്ചയില്‍ നിന്നും രക്ഷിച്ചത്.
ഏഴാമനായി ഇറങ്ങിയ വാഷിംഗ്ടണ്‍ സുന്ദര്‍ 64 പന്തില്‍ അഞ്ച് ഫോറും ഒരു സിക്‌സും സഹിതം 51 റണ്‍സാണ് നേടിയത്. സുന്ദറിനെ കൂടാതെ ശ്രേയസ് അയ്യരും മൂന്നാം ഏകദിനത്തില്‍ തിളങ്ങി. 59 പന്തില്‍ എട്ട് ഫോറടക്കം 49 റണ്‍സാണ് ശ്രേയസ് നേടിയത്. മറ്റാര്‍ക്കും ഇന്ത്യന്‍ നിരയില്‍ കാര്യമായി തിളങ്ങാനായില്ല.
ശിഖര്‍ ധവാന്‍ (28), ശുഭ്മാന്‍ ഗില്‍ (13), റിഷഭ് പന്ത് (10), സൂര്യകുമാര്‍ യാദവ് (6), ദീപക് ഹൂഡ (12), ദീപക് ചഹര്‍ (12), യുസ് വേന്ദ്ര ചഹല്‍ (8), അര്‍ഷദീപ് സിംഗ് (9), ഉമ്രാന്‍ മാലിക്ക് (0) എന്നിങ്ങനെയാണ് മറ്റ് ഇന്ത്യന്‍ താരങ്ങളുടെ പ്രകടനം.
ന്യൂസിലന്‍ഡിനായി ഡെയ്ല്‍ മിച്ചലും ആദം മില്‍നെയും മൂന്ന് വിക്കറ്റ് വീഴ്ത്തി. ഏഴ് ഓവറില്‍ വെറും 25 റണ്‍സ് വഴങ്ങിയാണ് മിച്ചല്‍ മൂന്ന് വിക്കറ്റ് വീഴ്ത്തിയത്. മില്‍നെ ആകട്ടെ 10 ഓവറില്‍ 57 റണ്‍സ് വഴങ്ങിയാണ് മൂന്ന് വിക്കറ്റ് സ്വന്തമാക്കിയത്. ടിം സൗത്തി രണ്ടും ലോക്കി ഫെര്‍ഗുസണും മിച്ചല്‍ സാത്‌നെറും ഒരോ വിക്കറ്റ് വീതവും സ്വന്തമാക്കി.
നേരത്തെ ആദ്യ ഏകദിന മത്സരം ന്യൂസിലന്‍ഡ് ജയിച്ചിരുന്നു. രണ്ടാം മത്സരം മഴമൂലം ഉപേക്ഷിക്കപ്പെട്ടു. അതിനാല്‍ തന്നെ പരമ്പര നഷ്ടപ്പെടാതിരിക്കാന്‍ ഇന്ത്യയ്ക്ക് മത്സരം ജയിക്കേണ്ടത് അനിവാര്യമാണ്.
India: 1 Shikhar Dhawan (capt), 2 Shubman Gill, 3 Shreyas Iyer, 4 Suryakumar Yadav, 5 Rishabh Pant (wk), 6 Deepak Hooda, 7 Washington Sundar, 8 Deepak Chahar, 9 Umran Malik, 10 Arshdeep Singh, 11 Yuzvendra Chahal
New Zealand: 1 Finn Allen, 2 Devon Conway, 3 Kane Williamosn (capt), 4 Daryl Mitchell, 5 Tom Latham (wk), 6 Glenn Phillips, 7 Mitchell Santner, 8 Adam Milne, 9 Matt Henry, 10 Tim Southee, 11 Lockie Ferguosn