സഹല്‍ അബ്ദുസമദിന് പിന്നാലെ മലയാളി താരം കെപി രാഹുലുമായും ദീര്‍ഘകാല കരാറില്‍ ഒപ്പിട്ട് കേരള ബ്ലാസ്റ്റേഴ്‌സ്. 2025 വരെയാണ് രാഹുലുമായും ബ്ലാസ്റ്റേഴ്‌സ് കരാര്‍ ഒപ്പിട്ടത്. രാഹുലുമായുളള കരാര്‍ അടുത്ത വര്‍ഷം അവസാനിക്കാനിരിക്കേയാണ് 2025 വരെ ബ്ലാസ്റ്റേഴ്‌സ് കരാര്‍ നീട്ടി നല്‍കിയത്. വിവിധ ഓണ്‍ലൈന്‍ മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്യുന്നത്.

വേഗതകൊണ്ട് ഇന്ത്യന്‍ ഫുട്ബോളിനെ അമ്പരപ്പിച്ച താരമാണ് കെപി രാഹുല്‍. ഇരുപാര്‍ശ്യങ്ങളിലും കളിക്കാന്‍ കഴിവുളള താരമായ രാഹുലിന് 20 വയസ്സാണ്. ഇന്ത്യയുടെ ഭാവി താരമായി വിലയിരുത്തപ്പെടുന്ന കളിക്കാരനാണ് തൃശൂര്‍ സ്വദേശി കൂടിയായ മലയാളി താരം.

കഴിഞ്ഞ ഐഎസ്എല്ലില്‍ എട്ട് മത്സരങ്ങളിലാണ് ബ്ലാസ്റ്റേഴ്‌സിനായി രാഹുല്‍ ബൂട്ടണിഞ്ഞത്. സഹലിന്റെ അസിസ്റ്റില്‍ ഒരു ഗോളും രാഹുല്‍ സ്വന്തമാക്കിയിരുന്നു.

ഇന്ത്യന്‍ ആരോസിലൂടെയാണ് രാഹുല്‍ ഇന്ത്യന്‍ ഫുട്‌ബോളിന്റെ ശ്രദ്ധപിടിച്ച് പറ്റിയത്. ആരോസിനായി 40 മത്സരങ്ങളില്‍ നിന്ന് ആറ് ഗോളുകളും സ്വന്തമാക്കിയിട്ടുണ്ട് ഇന്ത്യ അണ്ടര്‍ 17 ടീമിന്റെ ഭാഗമായിരുന്നു.