ഈ ബ്ലാസ്റ്റേഴ്സ് താരങ്ങള് യൂറോപ്പില് കളിക്കേണ്ടവര്, വിദേശ താരത്തിന്റെ വെളിപ്പെടുത്തല്
കേരള ബ്ലാസ്റ്റേഴ്സിലെയും ഇന്ത്യന് ഫുട്ബോളിലേയും ചില താരങ്ങള് യൂറോപ്പില് കളിക്കാന് കഴിവുളളവരാണെന്നും എന്നാല് അവര്ക്ക് അതിനെ കുറിച്ച് ധാരണയില്ലെന്നും മഞ്ഞപ്പടയുടെ സ്ലൊവേനിയന് സ്ട്രൈക്കര് മതേജ് പൊപ്ലാനിക്ക്. ഒരു ഇംഗ്ലീഷ് വെബ്സൈറ്റിന് അനുവദിച്ച അഭിമുഖത്തിലാണ് പൊപ്ലാനിക്ക് ഇക്കാര്യം പറഞ്ഞത്.
‘ആളുകള് കരുതുന്നത് ഇന്ത്യന് ലീഗ് തമാശയും മോശവുമാണെന്നാണ്. എന്നാല് അങ്ങനെയല്ല ഇന്ത്യന് ലീഗ് വളരെ മികച്ച ലീഗാണ്. സുനിലും, സന്ദേഷും, സഹലും ആഷിഖും അടക്കം മികച്ച കളിക്കാര് കളിക്കുന്ന ലീഗ്. ഇവര്ക്കല്ലാം അനായാസം യൂറോപ്പില് കളിക്കാനാകും എന്ന് എനിക്ക് ഉറപ്പുണ്ട്. അവര്ക്ക് മാനസികമായി ഒരു പരിശീലകനം നല്കിയാല് മാത്രം മതി. അവരെത്ര മികച്ചവരാണെന്ന് അവര്ക്ക് അറിയില്ല. സന്ദേഷിന്റെ ഫുട്ബോളിനോടുളള പാഷന് അപാരമാണ്. അവനൊരു പോരാളിയാണ്. അവന് അനായാസം യൂറോപ്പില് കളിക്കാനാകും’ പൊപ്ലാനിക്ക് വിലയിരുത്തുന്നു.
തനിക്ക് ഇന്ത്യയില് മികച്ച കളി പുറത്തെടുക്കാന് കഴിഞ്ഞിട്ടില്ലെന്നും അവസരം ലഭിക്കുകയാണെങ്കില് മെച്ചപ്പെടാനാകുമെന്നും പൊപ്ലാനിക്ക് തുറന്ന് പറയുന്നു. ഇന്ത്യയില് കരിയര് അവസാനിപ്പിക്കാനാണ് താന് ആഗ്രഹിക്കുന്നതെന്നും അദ്ദേഹം കൂട്ടിചേര്ത്തു. ഡേവിഡ് ജയിംസിന്റെ കളി ശൈലി ഇംഗ്ലീഷ് സ്റ്റെല് ആയതാണ് തനിയ്ക്ക് തിരിച്ചടിയതെന്നും വികൂനയുടെ പാസിംഗ് ഗെയിം തനിക്ക് ചേര്ന്നതാണെന്നും പൊപ്ലാനിക്ക് കൂട്ടിചേര്ത്തു.
‘കേരള ബ്ലാസ്റ്റേഴ്സില് ഞാന് സന്തുഷ്ടനായിരുന്നു. ഫുട്ബോളില് മാത്രമല്ല ഇന്ത്യയിലെ ജീവിതം തന്നെ മനോഹരമാണ്. അവിടത്തെ എല്ലാ ദിവസവും ഞാന് ആസ്വദിച്ചു. എന്റെ നാടിനേക്കാള് ഏറെ അകലെയാണെങ്കിലും ഇന്ത്യ എനിക്ക് വീടായി തന്നെയാണ് തോന്നിയത്. ഇന്ത്യയിലെത്തിയാല് ഒരു താരമായി ഞാന് മാറുന്നതായി എനിക്ക് തോന്നി. മത്സരശേഷം ആളുകള് ഫോട്ടോ എടുക്കുകയും അഭിമുഖം തയ്യാറാക്കുകയും എല്ലാ ചെയ്യും. ഒരു കളിക്കാരന് ആത്മവിശ്വാസം നല്കാന് അത് അത്യാവശ്യമാണ്’ പൊപ്ലാനിക്ക് പറയുന്നു.
2018 സീസണില് ബ്ലാസ്റ്റേഴ്സിനായി കളിച്ച താരമാണ് പൊപ്ലാനിക്ക്. കഴിഞ്ഞ സീസണില് ഹംഗേറിയന് ക്ലബായ കപോസ്വരി റകോസിലേക്ക് ഒരു വര്ഷത്തേയ്ക്ക്് പൊപ്ലാനിക്കിനെ ലോണിന് കൈമാറിയിരിക്കുകയായിരുന്നു ബ്ലാസ്റ്റേഴ്സ്.
2018-19 സീസണില് 16 മത്സരങ്ങള് ബ്ലാസ്റ്റേഴ്സിനായി കളിച്ച താരമാണ് പൊപ്ലാനിക്ക്. നാല് ഗോളും ഈ സ്ലൊവേനിയന് മുന്നേറ്റ നിര താരം സ്വന്തമാക്കിയിരുന്നു.