അവനെ ടീം ഇന്ത്യയിലേക്ക് ഇനി പരിഗണിക്കില്ല, സെലക്ടറുടെ വെളിപ്പെടുത്തല്‍ പരസ്യമാക്കി ഇന്ത്യന്‍ താരം
തകര്‍പ്പന്‍ ഫോമില്‍ പന്തെറിയുന്ന ജയദേവ് ഉനദ്ഘട്ടിനെ ഇനി ടീം ഇന്ത്യയിലേക്ക് പരിഗണിക്കില്ലെന്ന് വെളിപ്പെടുത്തി മുന്‍ ഇന്ത്യന്‍ താരവും സൗരാഷ്ട്ര പരിശീലകനുമായ കര്‍സന്‍ ഗാര്‍വി. ഇന്ത്യയുടെ ഒരു സെലക്ടറോട് സംസാരിച്ചപ്പോഴാണ് ഉനദ്ഘട്ടിനെ ഇനിയൊരിക്കലും ഇന്ത്യയുടെ ജഴ്‌സി അണിയാന്‍ അനുവദിക്കില്ലെന്ന് തന്നോട് വെളിപ്പെടുത്തിയതെന്ന് ഗാര്‍വി പറയുന്നു.
കഴിഞ്ഞ ദിവസം ഇന്ത്യന്‍ ടീമിലേക്ക് പരിഗണിക്കാത്തതിലുളള നിരാശ ഉനദ്ഘട്ട് പരസ്യമായി പ്രകടിപ്പിച്ചിരുന്നു. ഇതിന് പിന്നാലെയാണ് ഗാര്‍വി ഇക്കാര്യം വെളിപ്പെടുത്തിയത്.
‘2019-20 സീസണിലെ രഞ്ജി ട്രോഫി ഫൈനലിനിടെ ഞാനൊരു സെലക്ടറോട് ചോദിച്ചു, ഒരു ബോളര്‍ 60ലധികം വിക്കറ്റുകള്‍ വീഴ്ത്തി തന്റെ ടീമിനെ ഫൈനലില്‍ എത്തിച്ചിരിക്കുകയാണ്. അവനെ ഇന്ത്യന്‍ എ ടീമിലേക്കെങ്കിലും പരിഗണിക്കാന്‍ സാധ്യതയുണ്ടോ? അപ്പോള്‍ ആ സെലക്ടര്‍ പറഞ്ഞത് ‘കാഡു ഭായ്,ഇനി ഒരിക്കലും അവനെ ഇന്ത്യന്‍ ടീമിലേക്ക് പരിഗണിക്കില്ല. അവന്റെ പേര് ഞങ്ങളുടെ പരിഗണനാ പട്ടികയിലില്ലെന്നും ഇല്ലെന്നാണ്.’ ഗാര്‍വി പറഞ്ഞു.
എന്തുകൊണ്ടാണ് ഈ അവഗണയെന്നും ഇത്രയും വിക്കറ്റുകള്‍ നേടിയതിന് ഒരു വിലയും ഇല്ലേയെന്ന് ഞാന്‍ ചോദിച്ചു. അതിന്റെ മറുപടിയായി അവന്റെ പ്രായമാണ് അദ്ദേഹം ചൂണ്ടികാട്ടിയത്. ഇത്രയും പ്രായമുള്ള ഒരു താരത്തെ എന്തിനാണ് ഇനിയും ടീമിലേക്ക് പരിഗണിക്കുന്നത്. 21, 22, 23 വയസുള്ള യുവതാരങ്ങളെ പരിഗണിച്ച് വളര്‍ത്തിക്കൊണ്ടുവന്നാല്‍ 10-12 വര്‍ഷം ഇന്ത്യക്കായി സേവനം ചെയ്യാനാവും. ഇപ്പോള്‍ ഉനദ്ഘട്ടിനെ എടുത്താല്‍ എത്ര നാള്‍ അവന് ടീമിനായി കളിക്കാന്‍ സാധിക്കും? ആ ചോദ്യമാണ് സെലക്ടര്‍ ചോദിച്ചത്’ കര്‍സന്‍ കൂട്ടിച്ചേര്‍ത്തു.
2010ല്‍ ഇന്ത്യയ്ക്കായി ടെസ്റ്റ് കളിച്ച താരമാണ് ജയദേവ് ഉനദ്ഘട്ട്. എന്നാല്‍ അന്ന് താരത്തിന് വിക്കറ്റൊന്നും വീഴ്ത്താനായില്ല. ഇന്ത്യ്യക്കായി ഏഴ് ഏകദിനത്തില്‍ നിന്ന് എട്ട് വിക്കറ്റും 10 ടി20യില്‍ നിന്ന് 14 വിക്കറ്റും ഉനദ്ഘട്ടിന്റെ പേരിലുണ്ട്. 84 ഐ.പി.എല്ലില്‍ നിന്നായി 85 വിക്കറ്റും താരം വീഴ്ത്തിയിട്ടുണ്ട്.