ഓഗ്‌ബെചെയെ റാഞ്ചാന്‍ തീരുമാനിച്ച് സിറ്റി ഗ്രൂപ്പ്, ബ്ലാസ്റ്റേഴ്‌സിന് മുഖത്തടി!

സിറ്റി ഗ്രൂപ്പ് ഏറ്റെടുത്തതോടെ ഇന്ത്യയിലെ ഏറ്റവും സമ്പന്ന ക്ലബായി മാറിയ മുംബൈ സിറ്റി എഫ്‌സിയുടെ റഡാറില്‍ പതിഞ്ഞ് കേരള ബ്ലാസ്റ്റേഴ്‌സിന്റെ നായകനും കുന്തമുനയുമായുമായ ബെര്‍ത്തലോമവ ഓഗ്‌ബെചെ. നൈജീരിയിന്‍ താരത്തെ സ്വന്തമാക്കാന്‍ മുംബൈ സിറ്റി എഫ്‌സി ചര്‍ച്ച ആരംഭിച്ചതായി ഗോള്‍ ഡോട്ട് കോം റിപ്പോര്‍ട്ട് ചെയ്യുന്നു. കേരള ബ്ലാസ്‌റ്റേഴ്‌സ് ആരാധകരെ സംബന്ധിച്ച് ഏറെ നിരാശപ്പെടുത്തുന്ന വാര്‍ത്തയാണിത്.

മുംബൈ സിറ്റിയുടെ പുതിയ കോച്ച് സെര്‍ജിയോ ലൊബേരയുടെ പ്രത്യേക നിര്‍ദേശ പ്രകാരമാണ് മുന്‍ പിഎസ്ജി സൂപ്പര്‍ താരത്തെ സ്വന്തമാക്കാന്‍ ക്ലബ് ഒരുങ്ങുന്നത്. കഴിഞ്ഞ സീസണില്‍ ലൊബേര പരിശീലിപ്പിച്ച എഫ്‌സി ഗോവയ്‌ക്കെതിരെ ഓഗ്‌ബെചെ നടത്തിയ പ്രകടനത്തില്‍ ആകൃഷ്ടനായാണ് ലൊബേര ഓഗ്‌ബെചെയെ ടീമിലെത്തിക്കാന്‍ ക്ലബ് മാനേജുമെന്റിന് നിര്‍ദേശം നല്‍കിയിരിക്കുന്നത്.

നേരത്തെ തന്നെ എഫ്‌സി ഗോവയുടെ മികച്ച താരങ്ങളെ സ്വന്തമാക്കി മുംബൈ സിറ്റി എഫ്‌സി ഏഴാം സീസണ് വന്‍ തയ്യാറെടുപ്പാണ് നടത്തുന്നത്. എഫ്‌സി ഗോവ നായകനായിരുന്ന മന്ദാര്‍ റാവും ദേശായി, പ്രതിരോധനിരയിലെ വന്‍മതിലുകളായിരുന്ന മുര്‍തദ്ദ ഫാള്‍, അഹ്മദ് ജെഹ്‌റു എന്നിവരെ ഇതിനോടകം തന്നെ മുംബൈ സിറ്റി തങ്ങളുടെ നിരയിലെത്തിച്ച് കഴിഞ്ഞു. ഇതിന് പിന്നാലെയാണ് ഓഗ്‌ബെചെയെ സ്വന്തമാക്കാനും സിറ്റി ഗ്രൂപ്പ് നീക്കം നടത്തുന്നത്.

കഴിഞ്ഞ സീസണില്‍ കേരള ബ്ലാസ്റ്റേഴ്‌സിനായി തകര്‍പ്പന്‍ പ്രകടനം കാഴ്ച്ചവെച്ച താരമാണ് ഓഗ്‌ബെചെ. ടീം നേടിയ 29 ഗോളുകളില്‍ 15ഉം നേടിയത് ഈ നൈജീരിയന്‍ താരമായിരുന്നു. ഇതോടെ ബ്ലാസ്‌റ്റേഴ്‌സിന്റെ എക്കാലത്തേയും മികച്ച ഗോള്‍ വേട്ടക്കാരനായും ഓഗ്‌ബെചെ മാറിയിരുന്നു.

2018-19 സീസണില്‍ നോര്‍ത്ത് ഈസ്റ്റ് യുണൈറ്റഡില്‍ കളിച്ചാണ് ഓഗ്‌ബെചെ ഇന്ത്യയില്‍ ആദ്യമായി പന്ത് തട്ടിയത്. നോര്‍ത്ത് ഈസ്റ്റിന്റെ ഏറ്റവും കൂടുതല്‍ ഗോള്‍ നേടിയ താരമായ ശേഷമാണ് കോച്ച് എല്‍ക്കോ ഷറ്റോരിയ്‌ക്കൊപ്പം താരം കേരള ബ്ലാസ്റ്റേഴ്‌സിലേക്ക് കൂറുമാറിയത്. എല്‍ക്കോയെ ഒരു സീസണ് ശേഷം ബ്ലാസ്‌റ്റേഴ്‌സ് പുറത്താക്കിയതോടെയാണ് ടീമിന്റെ നായകനായ ഓഗ്‌ബെചെയും ക്ലബും തമ്മില്‍ ആസ്വാരസ്യങ്ങള്‍ ഉടലെടുക്കാന്‍ കാരണം. ഇതിനിടെ പ്രതിഫലം വെട്ടികുറക്കാന്‍ ക്ലബ് ആവശ്യപ്പെട്ടതും ഓഗ്‌ബെചെയെ ചൊടിപ്പിച്ചിരുന്നു.

You Might Also Like