; )
ഗോകുലം കേരള എഫ് സിയുടെ റിസേര്‍വ് ടീമില്‍ നിന്നും ഡിഫന്‍ഡര്‍ അലക്‌സ് സാജി കൂടി ഗോകുലത്തിന്റെ ഐ ലീഗ് സ്‌ക്വാഡില്‍ ചേര്‍ന്നു. ഇതോടെ കഴിഞ്ഞ വര്‍ഷത്തെ റിസേര്‍വ് ടീമില്‍ നിന്നും സീനിയര്‍ ടീമിലേക്കു 4 കളിക്കാരാണ് പ്രൊമോട്ട് ചെയ്യപ്പെട്ടത്.
എമില്‍ ബെന്നി, മുഹമ്മദ് ജാസിം, താഹിര്‍ സമാന്‍, എന്നിവരാണ് റിസേര്‍വ് ടീമില്‍ നിന്നും ഐ ലീഗ് സ്‌ക്വാഡില്‍ കയറിയ മറ്റുള്ള താരങ്ങള്‍.
ഈ സീസണിലെ ഐ-ലീഗ് സ്‌ക്വാഡില്‍ 11 മലയാളികളാണ് ഉള്ളത്. വയനാട് സ്വദേശിയായ അലക്‌സ് കേരളത്തിന്റെ സന്തോഷ് ട്രോഫി ടീമില്‍ രണ്ടു പ്രാവശ്യം കളിച്ചിരുന്നു. ഗോകുലത്തിനു വേണ്ടി കഴിഞ്ഞ വര്ഷം കരാറില്‍ ഏര്‍പ്പെട്ട അലക്‌സ്, കേരള പ്രീമിയര്‍ ലീഗ് കളിച്ചിരുന്നു.
”വളരെയധികം സന്തോഷം ഉണ്ട് ഗോകുലത്തിന്റെ ഐ ലീഗ് സ്‌ക്വാഡില്‍ ചേരുവാന്‍. ഗോകുലം ഒരുപാടു മലയാളികള്‍ക്ക് അവസരം നല്‍കുന്നുണ്ട്. കേരള ഫുട്‌ബോളിന് ഇത് വലിയ നേട്ടമാണ്. മലബാറിന് മാത്രം 9 കളിക്കാരാണ് ടീമില്‍ ഉള്ളത് ,” അലക്‌സ് പറഞ്ഞു.
ഇറ്റലിക്കാരന്‍ കോച്ച് വിന്‍സെന്‍സോ ആല്‍ബര്‍ട്ടോ അന്നീസെയുടെ കീഴില്‍ ഗോകുലം കൊല്‍ക്കത്തയില്‍ ഐ ലീഗിനായുള്ള തയാറെടുപ്പിലാണ്. ശനിയാഴ്ച ചെന്നൈ സിറ്റി എഫ് സിക്ക് എതിരെയാണ് ഗോകുലത്തിന്റെ ആദ്യ മത്സരം. ഈ പ്രാവശ്യം മത്സരങ്ങള്‍ എല്ലാം കൊല്‍ക്കത്തയില്‍ വെച്ചിട്ടാണ് നടക്കുന്നത്.
ഈ പ്രാവശ്യം ഐ ലീഗിന് റെജിസ്റ്റര്‍ ചെയ്ത മലയാളികള്‍: സി കെ ഉബൈദ്, പി എ അജ്മല്‍, ജസ്റ്റിന്‍ ജോര്‍ജ്, മുഹമ്മദ് ജാസിം, അലക്‌സ് സജി, മുഹമ്മദ് റാഷിദ്, ഷിബിന്‍ മുഹമ്മദ്, ജിതിന്‍ എം എസ്, സല്‍മാന്‍ കെ, എമില്‍ ബെന്നി, താഹിര്‍ സമാന്‍.