തകര്‍പ്പന്‍ ജയവുമായി ഗോകുലം, ഒന്നാം സ്ഥാനത്തേയ്ക്ക് കുതിക്കുന്നു!

ഐലീഗില്‍ ഗോകുലം കേരളയ്ക്ക് തകര്‍പ്പന്‍ ജയം. കൊല്‍ക്കത്തയില്‍ നടന്ന മത്സരത്തില്‍ ട്രാവു എഫ്സിയെ ഒന്നിനെതിരെ മൂന്ന് ഗോളുകള്‍ക്കാണ് ഗോകുലം കേരള തോല്‍പ്പിച്ചത്.

മലയാളി യുവതാരം എമില്‍ ബെന്നിയാണ് ഗോകുലത്തിനായി ആദ്യ ഗോള്‍ നേടിയത്. പതിനാറാം മിനുട്ടില്‍ ഒരു ഇടം കാലന്‍ വോളിയിലൂടെ ആയിരുന്നു എമിലിന്റെ ഗോള്‍. രണ്ടാം പകുതിയില്‍ 57ാം മിനുട്ടില്‍ ശരീഫ് മുഹമ്മദ് ഗോകുലത്തിന്റെ ലീഡ് ഇരട്ടിയാക്കി. ബെന്നിയുടെ കോര്‍ണറില്‍ നിന്ന് പന്ത് ലഭിച്ച ഷെറിഫിന്റെ ഷോട്ട് വല തുളച്ച് കയറുക ആയിരുന്നു.

86ാം മിനുട്ടില്‍ സൊഡിങ്‌ലിയാനയുടെ ഗോള്‍ ഗോകുലത്തിന്റെ മൂന്ന് പോയിന്റ് ഉറപ്പിച്ചു. 86ാം മിനുട്ടില്‍ ടര്‍സ്‌നോവ് ആണ് ട്രാവുവിന്റെ ആശ്വാസ ഗോള്‍ നേടിയത്.

ഈ വിജയം ഗോകുലം കേരളയെ 10 പോയിന്റുമായി നാലാം സ്ഥാനത്ത് എത്തിച്ചു. ഒന്നാമതുള്ള മുഹമ്മദന്‍സിനേക്കാല്‍ മൂന്ന് പോയിന്റ് മാത്രം പിറകിലാണ് ഇപ്പോള്‍ ഗോകുലം കേരള ഉള്ളത്. ട്രാവു ഏഴു കളികളില്‍ നിന്നും പത്തു പോയിന്റ് നേടി മൂന്നാം സ്ഥാനത്താണുള്ളത്.

You Might Also Like