ദ്രാവിഡ് സാര്‍ ആണ് ആ കുറവ് പരിഹരിച്ചത്, ഇനി എനിക്ക് ആത്മവിശ്വസത്തോടെ ടി20 കളിക്കാമെന്ന് പൂജാര
ഇന്ത്യയുടെ ടെസ്റ്റ് സ്‌പെഷ്യലിസ്റ്റായ ചേതേശ്വര്‍ പൂജാരയെ എല്ലാവരേയും അമ്പരപ്പിച്ച് കൊണ്ട് താരലേലത്തിലൂടെ ചെന്നൈ സൂപ്പര്‍ കിംഗ്‌സ് സ്വന്തമാക്കുകയായിരുന്നു. അടിസ്ഥാന വിലയായ 50 ലക്ഷം രൂപയ്ക്കാണ് ചെന്നൈ താരലേലത്തിലൂടെ പൂജാരയെ ടീമിലെത്തിച്ചത്. 2014ന് ശേഷം ഇതാദ്യമായി ഐപിഎല്‍ കളിക്കാനാകുന്നതിന്റെ ത്രില്ലിലാണ് പൂജാര.
നേരത്തെ കഴിഞ്ഞ കുറച്ച് വര്‍ഷങ്ങളായി അദ്ദേഹത്തെ ടീമിലെടുക്കാന്‍ ഐപിഎല്‍ ഫ്രാഞ്ചൈസികള്‍ പോലും തയ്യാറായിരുന്നില്ല
അടുത്തിടെ പൂജാര വലിയ ഷോട്ടുകള്‍ കളിക്കുന്ന വീഡിയോ വൈറലായിരുന്നു. ടെസ്റ്റ് ബാറ്റ്‌സ്മാന്‍ എന്ന് മാത്രം അറിയപ്പെടുന്ന താരം ലിമിറ്റഡ് ഓവര്‍ ക്രിക്കറ്റും വമ്പന്‍ ഷോട്ടുകളും തനിക്ക് വഴങ്ങും എന്ന് തെളിയിക്കുവാനുള്ള ശ്രമത്തിലാണ് ഈ സീസണില്‍ .
അതേസമയം ഇപ്പോള്‍ ടി20 ക്രിക്കറ്റിന് വേണ്ടി താന്‍ നടത്തുന്ന കഠിനമായ തയ്യാറെടുപ്പുകളും തനിക്ക് എല്ലാവിധ സപ്പോര്‍ട്ടുകളും നല്‍കുന്ന മുന്‍ ഇന്ത്യന്‍ ക്യാപ്റ്റനും നാഷണല്‍ ക്രിക്കറ്റ് അക്കാദമി തലവനുമായ രാഹുല്‍ ദ്രാവിഡിനെ കുറിച്ചും ഏറെ വാചാലനാവുകയാണ് പൂജാര .
”നേരത്തെ ഐപിഎല്ലിന്റെ ഭാഗമായിരുന്നു ഞാന്‍. അന്ന് ഐപിഎല്ലിന് ശേഷം ടെസ്റ്റ് കളിക്കുമ്പോള്‍ സാങ്കേതികമായി ചില പിഴവുകള്‍ സംഭവിച്ചിരുന്നു. കൂടുതല്‍ ടി20 കളിക്കുമ്പോള്‍ ടെസ്റ്റ് കളിക്കാനുള്ള മികവിന് എന്തേലും കുറവ് വരുമോ എന്നൊരു ആശങ്ക എനിക്കുണ്ടായിരുന്നു’ പൂജാര പറയുന്നു.
എന്നാല്‍ എന്റെ എല്ലാവിധ ആശങ്കകളും സംശയങ്ങളും അതിവേഗം മാറ്റിതന്നത് ദ്രാവിഡായിരുന്നു. ബാറ്റിങ്ങില്‍ നമ്മള്‍ എന്തൊക്കെ മാറ്റം വരുത്തിയാലും സ്വാഭവിക കളിക്ക് കോട്ടം തട്ടില്ലെന്ന് ദ്രാവിഡ് സാര്‍ എനിക്ക് വ്യക്തമാക്കി തന്നു . അദ്ദേഹത്തിന്റെ വാക്കുകള്‍ ശരിയായിരുന്നു. രണ്ട് ഫോര്‍മാറ്റിലും വ്യത്യസ്ത ശൈലിയില്‍ മികവോടെ കളിക്കാനാകുമെന്ന് നല്ല ബോധ്യം ഇപ്പോള്‍ എനിക്കുണ്ട് ‘ പൂജാര പറഞ്ഞ് നിര്‍ത്തി.