സ്മിത്ത് പോലും പതറിപ്പോയിരുന്നു, പിന്നെ പിടിച്ച് നില്‍ക്കാന്‍ ഇതേ വഴിയുണ്ടായിരുന്നുളളു, തുറന്ന് പറഞ്ഞ് പൂജാര
ഓസ്‌ട്രേലിയന്‍ പര്യടനത്തിനിടെ പൂജാര നടത്തിയ മെല്ലപ്പോക്ക് ബാറ്റിംഗ് ശൈലി ഏറെ ചര്‍ച്ചയായിരുന്നല്ലോ. ഓസ്‌ട്രേലിയന്‍ പേസര്‍മാരുടെ തീതുപ്പുന്ന ബൗളിംഗിന് മുന്നില്‍ വിരിമാറ് കാണിച്ച് പിടിച്ച് നിന്ന പൂജാര ഇന്ത്യയുടെ പരമ്പര വിജയത്തില്‍ നിര്‍ണ്ണായക സാന്നിധ്യമായി.
കഴിഞ്ഞ ഓസീസ് പര്യടനത്തില്‍ 41.41 സ്ട്രൈക്ക് റേറ്റിലാണ് പൂജാര റണ്‍സ് നേടിയിരുന്നത്. എന്തുകൊണ്ടാണ് സാവധാനം ബാറ്റ് ചെയ്തന്നെതിന്റെ കാരണം വ്യക്തമാക്കുകയാണ് പൂജാര. ഓസീസ് പര്യടനത്തിന് മുമ്പ് താളം വീണ്ടെടുക്കാന്‍ കഴിഞ്ഞിരുന്നില്ലെന്നാണ് പൂജാര പറുന്നത്.
‘ഓസ്ട്രേലിയയിലേക്ക് തിരിക്കുന്നതിന് മുമ്പ് ഫസ്റ്റ്ക്ലാസ് മത്സരങ്ങള്‍ കളിക്കണമെന്നുണ്ടായിരുന്നു. എന്നാല്‍ ഒന്ന് മാത്രമാണ് കളിക്കാന്‍ കഴിഞ്ഞത്. അതിലാവട്ടെ തൃപ്തികരമായ പ്രകടനം പുറത്തെടുക്കാനായില്ല. കൂടുതല്‍ സമയവും നെറ്റ് പ്രാക്ടീസിലായിരുന്നു. കൊവിഡ് കാലത്തിനിടെ കൂടുതല്‍ മത്സരങ്ങള്‍ കളിക്കാന്‍ കഴിയാതിരുന്നതുകൊണ്ടാണ് സ്ട്രൈക്ക് റേറ്റ് ഉയര്‍ത്താന്‍ സാധിക്കാതിരുന്നത്. സ്റ്റീവ് സ്മിത്തിനു പോലും പരമ്പരയുടെ തുടക്കത്തില്‍ ബാറ്റ് ചെയ്യാന്‍ ബുദ്ധിമുട്ടിയതായിട്ടാണ് എനിക്ക് അനുഭവപ്പെട്ടത്.’ പൂജാര പറഞ്ഞു.
ഇംഗ്ലണ്ടിനെതിരായ പരമ്പരയ്ക്ക് മുമ്പ് ടീമംഗങ്ങള്‍ മൊത്തം ആത്മവിശ്വാസത്തിലാണെന്നും പൂജാര പറഞ്ഞു.
‘ഇംഗ്ലണ്ടിനെതിരായ പരമ്പര വലിയ പ്രതീക്ഷയോടെയാണ് നോക്കി കാണുന്നത്. ടീമംഗങ്ങളെല്ലാം ആത്മവിശ്വാസത്തിലാണ്. ഓസീസിനെതിരേ അവരുടെ നാട്ടില്‍ നേടിയ ടെസ്റ്റ് പരമ്പര നേട്ടം എല്ലാവരെയും പ്രചോദിപ്പിച്ചിട്ടുണ്ട്. നമ്മുടെ ഇപ്പോഴത്തെ ടീമിനു ഇംഗ്ലണ്ടിനെതിരേ നന്നായി പെര്‍ഫോം ചെയ്യാനാവുമെന്ന ആത്മവിശ്വാസം എനിക്കുണ്ട്.” പുജാര വിശദമാക്കി.
ഫെബ്രുവരി അഞ്ചിനാണ് ഇന്ത്യ- ഇംഗ്ലണ്ട് ടെസ്റ്റ് പരമ്പര