ബ്ലാസ്റ്റേഴ്‌സിലെത്തുന്നത് അപൂര്‍വ്വ പ്രതിഭയുളള താരം, വെളിപ്പെടുത്തലുമായി ഇഷ്ഫാഖ്
കേരള ബ്ലാസ്റ്റേഴ്സ് സൈന്‍ ചെയ്ത യുവ ഗോള്‍ കീപ്പര്‍ പ്രഭ്സുഖാന്‍ സിംഗിനെ പ്രശംസ കൊണ്ട് മൂടി കേരള ബ്ലാസ്റ്റേഴ്സ് അസിസ്റ്റന്റ് കോച്ച് ഇഷ്ഫാക്ക് അഹമ്മദ്. കൈയും കാലും കൊണ്ട് ഒരേപോലെ ശ്രമങ്ങള്‍ നടത്താന്‍ സാധിക്കുന്ന ഇന്ത്യയിലെ ചുരുക്കം ചില ഗോള്‍ കീപ്പര്‍മാരില്‍ ഒരാളായാണ് പ്രഭ്സുഖാന്‍ സിംഗിനെ ഇഷ്ഫാഖ് വിശേഷിപ്പിക്കുന്നത്.
’19 വയസുകാരനായ പ്രഭ്സുഖാന്‍, ഈ പ്രായത്തില്‍ തന്നെ വളരെ പക്വതയുള്ളവനും ആത്മവിശ്വാസമുള്ളതുമായ ഗോള്‍കീപ്പറുമാണ്. കൈയും കാലും കൊണ്ട് ഒരേപോലെ ശ്രമങ്ങള്‍ നടത്താന്‍ സാധിക്കുന്ന ഇന്ത്യയിലെ ചുരുക്കം ചില ഗോള്‍കീപ്പര്‍മാരില്‍ ഒരാളാണ് അദ്ദേഹം. അദ്ദേഹത്തിന്റെ വരവ് യുവ പ്രതിഭകളിലുള്ള നമ്മുടെ വിശ്വാസത്തെയും അവരുടെ വളര്‍ച്ചയിലും വികാസത്തിലുമുള്ള നമ്മുടെ ശ്രദ്ധയെ ശക്തിപ്പെടുത്തുന്നു. അദ്ദേഹം ഞങ്ങളോടൊപ്പം ചേരുന്നതില്‍ ഞാന്‍ ആവേശത്തിലാണ്, കൂടാതെ അദ്ദേഹം ടീമില്‍ ഒരു മികച്ച കളിക്കാരനാകുമെന്ന് ഞാന്‍ വിശ്വസിക്കുന്നു. ‘ കേരള ബ്ലാസ്റ്റേഴ്സ് എഫ്‌സി അസിസ്റ്റന്റ് കോച്ച് ഇഷ്ഫാക്ക് അഹമ്മദ് പറഞ്ഞു.
രണ്ട് വര്‍ഷത്തേക്കാണ് പ്രഭ്സുഖാന്‍ സിംഗുമായി ബ്ലാസ്റ്റേഴ്സ് കരാര്‍ ഒപ്പിട്ടിരിക്കുന്നത്. പഞ്ചാബിലെ ലുധിയാനയില്‍ ജനിച്ച 19 കാരനായ ഗില്‍, 2014 ല്‍ ചണ്ഡിഗഡ് ഫുട്ബോള്‍ അക്കാദമിയില്‍ നിന്നാണ് തന്റെ ഫുട്ബോള്‍ ജീവിതം ആരംഭിച്ചത്. 2017ല്‍ ഇന്ത്യയില്‍ നടന്ന ഫിഫ അണ്ടര്‍17 ലോകകപ്പിലേക്ക് തയ്യാറെടുക്കുന്ന എഐഎഫ്എഫ് എലൈറ്റ് അക്കാദമിയിലേക്ക് തിരഞ്ഞെടുക്കപ്പെടുന്നതിന് മുമ്പ് അവിടെ അദ്ദേഹം രണ്ട് വര്‍ഷം പരിശീലനം നേടി.
അതേ വര്‍ഷം തന്നെ ഇന്ത്യന്‍ ആരോസുമായി കരാറിലെത്തിയ അദ്ദേഹം ഐ-ലീഗില്‍ രണ്ട് സീസണുകളിലായി 30 ലധികം മത്സരങ്ങള്‍ ക്ലബ്ബിനായി കളിച്ചു. 2019 ലെ ഹീറോ സൂപ്പര്‍ കപ്പ് യോഗ്യതാ മത്സരത്തിലെ മിന്നുന്ന പ്രകടനത്തിലൂടെ ഈ യുവ ഷോട്ട്-സ്റ്റോപ്പര്‍ കെബിഎഫ്സി ടാലന്റ് ഹണ്ട് ടീമിന്റെ ശ്രദ്ധ പിടിച്ചുപറ്റി. 184 സെന്റിമീറ്റര്‍ ഉയരമുള്ള യുവ ഗോള്‍കീപ്പര്‍ ഐഎസ്എല്ലില്‍ തങ്ങളുടെ എതിരാളികളായ ബെംഗളൂരു എഫ്‌സിയില്‍ നിന്നാണ് കേരള ബ്ലാസ്റ്റേഴ്സ് എഫ്‌സിയില്‍ എത്തുന്നത്.