സീസൺ അവസാനം കരാർ അവസാനിക്കാനിരിക്കുന്ന മാഞ്ചസ്റ്റർ സിറ്റിയുടെ അർജന്റൈൻ സൂപ്പർതാരമാണ് കുൻ അഗ്വേറോ. ജനുവരിയിൽ ഫ്രീ ഏജന്റായി മാറിയ അഗ്വേറോക്ക് പിന്നാലെ നിരവധി ക്ലബ്ബുകൾ ഉണ്ടായിരുന്നുവെങ്കിലും നിലവിൽ ബാഴ്സലോണയിലേക്ക് ചേക്കേറുമെന്ന അഭ്യൂഹങ്ങളാണ് ഉയർന്നു വരുന്നത്.
പ്രീമിയർ ലീഗിലെ തന്നെ മറ്റൊരു വമ്പന്മാരായ ചെൽസിയിലേക്ക് ചേക്കേറുമെന്നു അഭ്യൂഹങ്ങളുണ്ടായിരുന്നുവെങ്കിലും നിലവിൽ കുറച്ചു ആഴ്ചകളായി ബാഴ്സയുമായി ചർച്ചകൾ നടന്നു കൊണ്ടിരിക്കുകയായിരുന്നു. എന്നാലിപ്പോൾ ബാഴ്സയിലേക്ക് തന്നെ ചേക്കേറുമെന്നാണ് അർജന്റൈൻ മാധ്യമമായ ടിവൈസി സ്പോർട്സ് റിപ്പോർട്ട് ചെയ്തിരിക്കുന്നത്.
REPORT: Sergio Aguero has received a two-year offer from Barcelonahttps://t.co/XpJhlwEK6D
— beIN SPORTS USA (@beINSPORTSUSA) April 20, 2021
രണ്ടുവർഷത്തേക്കുള്ള കരാറാണ് താരം ബാറസയുമായി ഒപ്പിടാൻ പോവുന്നതെന്നാണ് ഇതേ മാധ്യമം തന്നെ റിപ്പോർട്ട് ചെയ്യുന്നത്. മറ്റൊരു മധ്യമമായ ലാ പോർട്ടെയിറോ റിപ്പോർട്ട് ചെയ്യുന്നത് ബാഴ്സയിലേക്ക് ചേക്കേറാൻ വേതനം വെട്ടിക്കുറക്കാനും അഗ്വേറോ തയ്യാറായി എന്നതാണ്.
ഇതോടെ പത്തുവർഷത്തെ പ്രീമിയർലീഗിലെ മികച്ച പ്രകടനത്തിനു ശേഷം ലാലിഗയിലേക്കുള്ള തിരിച്ചു വരവിനുള്ള ശ്രമങ്ങളാണ് നടന്നുകൊണ്ടിരിക്കുന്നത്. തന്റെ പ്രിയ സുഹൃത്തായ ലയണൽ മെസിക്കൊപ്പം ഒത്തുചേരാനുള്ള അവസരമാണ് ഉയർന്നുവന്നിരിക്കുന്നത്. കൂടാതെ അഗ്വേറോയുടെ വരവ് മെസിയെ ബാഴ്സയിൽ തന്നെ പിടിച്ചു നിർത്തുമെന്നാണ് പ്രതീക്ഷിക്കപ്പെടുന്നത്.