സഞ്ജുവും കോഹ്ലിയും രോഹിത്തുമെല്ലാം പുറത്ത്, സര്‍പ്രൈസ് ഐപിഎല്‍ ടീം പ്രഖ്യാപിച്ച് ഇന്ത്യന്‍ താരം
ഐപിഎല്ലിലെ ഈ സീസണിലെ ഏറ്റവും മികച്ച ഇലവന്‍ തെരഞ്ഞെടുത്ത് മുന്‍ ഇന്ത്യന്‍ താരവും കമന്റേറ്ററുമായ ആകാശ് ചോപ്ര. ഐപിഎല്ലില്‍ തിളങ്ങിയ മലയാളി താരങ്ങളായ സഞ്ജു സാംസണ്‍, ദേവ്ദത്ത് പടിക്കര്‍ എന്നിവരൊന്നും ടീമിലിടം പിടിച്ചില്ല. മാത്രമല്ല ഇന്ത്യന്‍ ക്രിക്കറ്റിലെ ശക്തിദുര്‍ഗകളായ രോഹിത് ശര്‍മ, എം എസ് ധോണി, വിരാട് കോഹ്ലി എന്നിവരും ചോപ്രയുടെ ഐപിഎല്‍ ടീമിലില്ല എന്നതും ശ്രദ്ധേയമായി.
ഡല്‍ഹി കാപിറ്റല്‍സ്, റോയല്‍ ചലഞ്ചേഴ്സ് ബാംഗ്ലൂര്‍ എന്നീ ടീമുകളില്‍ നിന്ന് മൂന്ന് താരങ്ങള്‍ വീതം ചോപ്രയുടെ ടീമില്‍ ഇടം കണ്ടെത്തി. ചെന്നൈ സൂപ്പര്‍ കിംഗ്സില്‍ രണ്ട് താരങ്ങളാണ് ടീമിലെത്തിയത്. രാജസ്ഥാന്‍ റോയല്‍സ്, പഞ്ചാബ് കിംഗ്സ്, മുംബൈ ഇന്ത്യന്‍സ് എന്നീ ടീമുകളില്‍ നിന്ന് ഓരോ താരങ്ങളും ടീമിലെത്തി. സണ്‍റൈസേഴ്സ് ഹൈദാരാബാദ്, കൊല്‍ക്കത്ത നൈറ്റ് റൈഡേഴ്സ് എന്നീ ടീമുകളില്‍ നിന്ന് ആര്‍ക്കും ടീമിലെത്താന്‍ സാധിച്ചില്ല.
ഓപ്പണര്‍ ശിഖര്‍ ധവാന്‍, വിക്കറ്റ് കീപ്പര്‍ റിഷഭ് പന്ത്, പേസര്‍ ആവേഷ് ഖാന്‍ എന്നിവരാണ് ഡല്‍ഹി താരങ്ങള്‍. ബാംഗ്ലൂരില്‍ നിന്ന് ഗ്ലെന്‍ മാക്സ്വെല്‍, എബി ഡിവില്ലിയേഴ്സ്, ഹര്‍ഷല്‍ പട്ടേല്‍ എന്നിവരും ടീമിലെത്തി. ചെന്നൈയുടെ രവീന്ദ്ര ജഡേജ, ഫാഫ് ഡു പ്ലെസിസ് എന്നിവരും ചോപ്രയുടെ ടീമില്‍ കളിക്കും.
രാജസ്ഥാനില്‍ നിന്ന് സഞ്ജു സാംസണ്‍ ടീമിലിടം കണ്ടെത്താനായില്ലെങ്കിലും ഓള്‍ റൗണ്ടര്‍ ക്രിസ് മോറിസ് ഇടം കണ്ടെത്തി. പഞ്ചാബ് ക്യാപ്റ്റന്‍ കെ എല്‍ രാഹുല്‍ ധവാനൊപ്പം ഓപ്പണ്‍ ചെയ്യും. മുംബൈയുടെ രാഹുല്‍ ചാഹറാണ് ടീമിലെ സ്പെഷ്യലിസ്റ്റ് സ്പിന്നര്‍.
ആകാശ് ചോപ്രയുടെ ടീം: ശിഖര്‍ ധവാന്‍, കെ എല്‍ രാഹുല്‍, ഫാഫ് ഡു പ്ലെസിസ്, ഗ്ലെന്‍ മാക്സ്വെല്‍, എബി ഡിവില്ലിയേഴ്സ്, റിഷഭ് പന്ത്, രവീന്ദ്ര ജഡേജ, ക്രിസ് മോറിസ്, രാഹുല്‍ ചാഹര്‍, ആവേശ് ഖാന്‍, ഹര്‍ഷല്‍ പട്ടേല്‍.